កាណាដាប្រកាសព្យួរសន្ធិសញ្ញាធ្វើបត្យាប័ន និងការនាំសម្ភារៈបរិក្ខារយោធាជាមួយហុងកុង
នៅថ្ងៃសៅរ៍ ទី៤ កក្កដា អ្នកទទួលខុសត្រូវជាន់ខ្ពស់ហុងកុងជាច្រើនរូបបានបញ្ចេញប្រតិកម្មតបនឹងការប្រកាសរបស់នាយករដ្ឋមន្រ្តីកាណាដាលោក Justin Trudeau នាថ្ងៃសុក្រ ទី៣ កក្កដា។ នៅក្នុងសេចក្តីប្រកាសនោះ លោក Trudeau នឹងព្យួរសន្ធិសញ្ញាធ្វើបត្យាប័នដែលកាណាដាមានជាមួយហុងកុង ព្រមទាំងផ្អាកការនាំសម្ភារៈបរិក្ខារយោធាទៅឲ្យហុងកុង។ កាយវិការរបស់ទីក្រុងអូតាវ៉ានេះជាប្រតិកម្មតបនឹងប្រទេសចិនដែលបានទើបបានអនុម័តច្បាប់សន្តិសុខជាតិលើទឹកដីស្វយ័តហុងកុង។ ទីក្រុងប៉េកាំងនៅមិនទាន់បានឆ្លើយតបនឹងការប្រកាសរបស់កាណាដាពេលនេះទេ តែអ្នកទទួលខុសត្រូវជាន់ខ្ពស់ហុងកុងបានសម្តែងការខកចិត្តយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:២០
« យើងកំពុងមានក្តីបារម្ភយ៉ាងខ្លាំងចំពោះស្ថានការណ៍នៅហុងកុង » នេះជាការថ្លែងរបស់នាយករដ្ឋមន្រ្តីកាណាដាលោក Justin Trudeau នៅក្នុងសន្និសីទកាសែតមួយនាថ្ងៃសុក្រ ទី៣ កក្កដា។ លោក Trudeau បានគូសបញ្ជាក់ពីសារៈសំខាន់ និងបញ្ជាក់ច្បាស់ៗពីជំនឿយ៉ាងមុតមាំរបស់កាណាដាចំពោះប្រទេសមួយ ប្រព័ន្ធពីរ។ តាមលោក Trudeau ប្រទេសមួយប្រព័ន្ធពីរដែលទឹកដីស្វយ័តហុងកុងកំពុងទទួលបានមិនត្រឹមតែធានាពីសេរីភាពពេញលេញរបស់ពលរដ្ឋហុងកុងទាំង ៧៥ ០០០ ០០០នាក់ប៉ុណ្ណោះទេ តែក៏សម្រាប់ពលរដ្ឋកាណាដាទាំង ៣០០ ០០០នាក់ដែលកំពុងរស់នៅលើទឹកដីហុងកុងដែរ។ ប្រតិកម្មរបស់នាយករដ្ឋមន្រ្តីកាណាដាយ៉ាងដូចនេះបានធ្វើឡើង បន្ទាប់ពីរដ្ឋអំណាចចិនដីគោកទើបបានប្រកាសដាក់ឲ្យប្រើនូវច្បាប់សន្តិសុខជាតិសម្រាប់ហុងកុង។
ដើម្បីជាការដាក់គំនាបលើរដ្ឋាភិបាលចិនដីគោក និងរដ្ឋបាលនៅហុងកុង នាយករដ្ឋមន្រ្តីកាណាដាបានប្រកាសឲ្យដឹងនូវគម្រោងវិធានការមួយចំនួន ដូចយ៉ាងព្យួរសន្ធិសញ្ញាធ្វើបត្យាប័នជាមួយហុងកុង និងការនាំសម្ភារៈបរិក្ខារយោធាទៅឲ្យហុងកុង រួមទាំងចិនដីគោក។ បន្ទាប់មក លោក Trudeau ក៏បានប្រាប់ឲ្យដឹងពីគម្រោងសិក្សាលើវិធានការផ្សេងទៀត ក្នុងនោះទាក់ទងនឹងរឿងអន្តោប្រវេសន៍ដោយជួយសម្រួលការសុំតាំងលំនៅដ្ឋានលើទឹកដីកាណាដារបស់ពលរដ្ឋហុងកុងដែលមានក្រុមគ្រួសារនៅកាណាដាស្រាប់។ ចំណែកប្រមុខការទូតកាណាដាបានពន្យល់បន្ថែមថា ហុងកុងជាទឹកដីស្វ័យតដែលត្រូវបានបង្កើតឡើងដោយផ្អែកលើប្រទេសមួយ ប្រព័ន្ធពីរ ហើយបើគោលការណ៍មួយនេះត្រូវបានរំលោភ កាណាដាត្រូវបង្ខំចិត្តសើរើ ពិនិត្យមើលឡើងវិញលើគ្រប់កិច្ចព្រមព្រៀង និងសន្ធិសញ្ញាដែលខ្លួនមានជាមួយរដ្ឋបាលហុងកុង។
នៅថ្ងៃសៅរ៍ ទី៤ កក្កដានេះ ពោលប៉ុន្មានម៉ោងក្រោយការប្រកាសរបស់នាយករដ្ឋមន្រ្តីកាណាដា អ្នកទទួលខុសត្រូវជាន់ខ្ពស់ហុងកុងជាច្រើននាក់បានបញ្ចេញប្រតិកម្មសោកស្តាយ និងខកចិត្ត។ ប្រមុខសន្តិសុខហុងកុងលោកចន លីបានទាមទារឲ្យកាណាដាពន្យល់លើការសម្រេចចិត្តរបស់ខ្លួននៅចំពោះមុខនីតិរដ្ឋ និងពិភពលោក។ ប្រតិកម្មស្រដៀងគ្នានេះក៏មានពីរដ្ឋមន្រ្តីក្រសួងយុត្តិធម៌ហុងកុង និងបានចាត់ទុកទង្វើរបស់កាណាដាជាការបំពានច្បាប់អន្តរជាតិ។ ចំណែកនៅចិនដីគោក ទីក្រុងប៉េកាំងនៅមិនទាន់បានបញ្ចេញប្រតិកម្មយ៉ាងណានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ