លោកអ៊ុយហ្គោ ជែនី៖អាមេរិកលក់អាវុធឲ្យតៃវ៉ាន់ជាឆន្ទៈរបស់អាមេរិកដើម្បីគាំទ្រតៃវ៉ាន់តាមផ្លូវយោធា
នៅថ្ងៃចន្ទ ទី២៦ តុលា សហរដ្ឋអាមេរិកបានប្រកាសពីការលក់គ្រឿងសព្វាវុធឲ្យកោះតៃវ៉ាន់ដែលមានទឹកប្រាក់ដល់ទៅ ២ ៤០០លានដុល្លារ។ ក្នុងរយៈពេលចុងក្រោយ និងដើម្បីបន្តនយោបាយប្រឆាំងនឹងឥទ្ធិពលរបស់ចិននៅក្នុងតំបន់អាស៊ី ប៉ាស៊ីហ្វិក ក្រុងវ៉ាស៊ីនតោនបានបង្កើនការលក់អាវុធជាបន្តបន្ទាប់ឲ្យតៃវ៉ាន់។ តៃវ៉ាន់ដែលចិនដីគោកបន្តចាត់ទុកជាខេត្តឧទ្ទាមរបស់ខ្លួន។ លោកអ៊ុយហ្គោ ជែនី បណ្ឌិត និងជាអ្នកជំនាញភូមិសាស្រ្តនយោបាយបានគូសបញ្ជាក់ក្នុងថ្ងៃអង្គារ ទី២៧ តុលាថា អាមេរិកលក់អាវុធឲ្យតៃវ៉ាន់ជាថ្មីពេលនេះបានកើតមានឡើងនៅក្នុងបរិបទនៃការរឹតចំណងរវាងក្រុងវ៉ាស៊ីនតោន និងក្រុងតៃប៉ិក។ តាមលោកអ៊ុយហ្គោ ជែនីដដែល កាយវិការរបស់អាមេរិកនេះក៏ជាសញ្ញាមួយដែលអាមេរិកចង់ប្រាប់ចិន និងសហគមន៍អន្តរជាតិថា តៃវ៉ាន់មិនមែនស្ថិតនៅឯកោទេ។
ចុះផ្សាយនៅថ្ងៃ៖
ស្តាប់ - ០១:២៨
« រឿងអាមេរិកលក់អាវុធឲ្យតៃវ៉ាន់ជាទម្លាប់មួយ គ្មានអ្វីគួរឲ្យភ្ញាក់ផ្អើលទេ។ តែអ្វីដែលគួរឲ្យកត់សម្គាល់ពេលនេះ គឺចំនួនលក់ដល់ទៅ ៤ដងក្នុងរយៈពេលតែមួយសប្តាហ៍ដែលបានធ្វើឲ្យចិនក្តៅស្លឹកត្រចៀកខ្លាំង។ ការលក់នេះបានកើតមានឡើងនៅក្នុងបរិបទមួយពិសេស គឺបរិបទនៃការរំកិលចូលជិតគ្នាផ្នែកបច្ចេកវិទ្យារវាងក្រុងវ៉ាស៊ីនតោន និងក្រុងតៃប៉ិកជាមួយនឹងការសាងសង់រោងចក្រ Semi-conducteur តៃវ៉ាន់នៅលើទឹកដីអាមេរិក និងការសាងសង់ Data center របស់ក្រុមហ៊ុន Google និង Microsoft របស់អាមេរិកនៅលើទឹកដីតៃវ៉ាន់។
ទាំងអស់នេះសុទ្ធសឹងជាសញ្ញានៃខិតចូលជិតគ្នារវាងអាមេរិក និងតៃវ៉ាន់។ ខ្ញុំគិតថា ទង្វើរបស់អាមេរិករបៀបនេះមានឆន្ទៈគាំទ្រតៃវ៉ាន់តាមផ្លូវយោធា ហើយអាមេរិកពិតជាចង់លាតត្រដាងនូវបំណងមួយនេះ។ សូមបញ្ជាក់ថា គ្រឿងសព្វាវុធដែលអាមេរិកបានប្រកាសលក់ឲ្យតៃវ៉ាន់ពេលនេះមិនមែនបញ្ជូនទៅឲ្យតៃវ៉ាន់ភ្លាមៗទេ។ នៅក្នុងសេចក្តីប្រកាសរបស់អាមេរិក គឺមានបង្កប់ដោយរឿងនយោបាយដែលអាមេរិកចង់ផ្តល់សញ្ញាប្រាប់ចិន និងសហគមន៍អន្តរជាតិថា តៃវ៉ាន់មិនមែនកំពុងស្ថិតនៅឯកោទេ។
សហរដ្ឋអាមេរិកបង្កើតការគាំទ្រយ៉ាងពិតប្រាកដដល់កោះតៃវ៉ាន់ ទោះជាអាមេរិក និងតៃវ៉ាន់គ្មានសន្ធិសញ្ញាសម្ព័ន្ធភាពរវាងគ្នាក៏ដោយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ