អាមេរិកប្រកាសលក់អាវុធក្នុងតម្លៃ ២,៤ ពាន់លានដុល្លារឲ្យទៅតៃវ៉ាន់
សហរដ្ឋអាមេរិកកាលពីថ្ងៃចន្ទ ទី ២៦ តុលាម្សិលមិញ បានសម្រេចលក់ប្រព័ន្ធមីស៊ីលការពារឆ្នេរសមុទ្រហាភូន (The Harpoon) ចំនួន ១០០ គ្រឿងក្នុងតម្លៃ ២ ៤០០ លានដុល្លារឲ្យទៅតៃវ៉ាន់។ ការប្រកាសនេះ ហាក់ផ្គើនទៅនឹងប្រតិកម្មប្រឆាំងរបស់ចិន។ ចិនដែលពីពេលថ្មីៗនេះទើបតែបានចេញមុខប្រាប់អាមេរិកឲ្យលុបចោលជាបន្ទាន់នូវផែនការលក់អាវុធទៅឲ្យកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:០៧
អាមេរិកបានប្រកាសលក់អាវុធទៅឲ្យតៃវ៉ាន់តែប៉ុន្មានម៉ោងប៉ុណ្ណោះ បន្ទាប់ពីទីក្រុងប៉េកាំង និយាយថាខ្លួននឹងដាក់ទណ្ឌកម្មលើក្រុមហ៊ុនអាមេរិកណាដែលមានជាប់ពាក់ព័ន្ធទៅនឹងការលក់អាវុធទៅឲ្យតៃវ៉ាន់។ តៃវ៉ាន់ដែលចិនតែងតែបានអះអាងក្តែងៗថាគឺជាផ្នែកមួយនៃទឹកដីរបស់ខ្លួន។
ក្រសួងការបរទេសអាមេរិកតាមរយៈសេចក្តីថ្លែងការណ៍មួយបានបញ្ជាក់ថាការលក់ប្រព័ន្ធមីស៊ីលការពារឆ្នេរសមុទ្រហាភូន នឹងជួយឲ្យសន្តិសុខនៅតៃវ៉ាន់មានភាពល្អប្រសើរជាងមុន ជួយថែរក្សាស្ថិរភាពនយោបាយ តុល្យភាពយោធា ... និងវឌ្ឍនភាពនៅក្នុងតំបន់។
កិច្ចព្រមព្រៀងលក់ប្រព័ន្ធមីស៊ីលការពារឆ្នេរសមុទ្រហាភូនចំនួន ១០០ គ្រឿង (HCDS) រួមមានមីស៊ីលបាញ់ពីលើដីចំនួន ៤០០ គ្រាប់ (RGM-84L-4) ។ មីស៊ីលប្រភេទនេះ អាចបាញ់បានចម្ងាយរហូតដល់ប្រមាណ ១២៥ គីឡូម៉ែត និងត្រូវបានផលិតឡើងដោយក្រុមហ៊ុនប៊ូអ៊ីងរបស់អាមេរិក។
ភ្លាមៗក្រោយការប្រកាសយល់ព្រមលក់សព្វាវុធរបស់សហរដ្ឋអាមេរិក ការិយាល័យប្រធានាធិបតីតៃវ៉ាន់របស់លោកស្រីឆៃ អ៊ីងវេន បានចេញសេក្តីថ្លែងអំណរគុណដល់អាមេរិក ដោយនិយាយថាខ្លួននឹងបង្កើនសមត្ថភាពយោធាឲ្យបានខ្លាំងជាងមុន។
គួររំឭកជូនថា ក្នុងរយៈពេលពីរសប្តាហ៍ជាប់ៗគ្នាហើយដែលអាមេរិកប្រកាសលក់អាវុធក្នុងតម្លៃទឹកប្រាក់ដ៏ច្រើនឲ្យទៅកោះតៃវ៉ាន់។ កាលពីសប្តាហ៍មុន នៅថ្ងៃពុធ ទី ២១ តុលា អាមេរិកបានយល់ព្រមលក់អាវុធ ក្នុងតម្លៃប្រមាណ ១ ៨០០ លានដុល្លារ ឲ្យទៅតៃវ៉ាន់។ គ្រឿងសញ្វាវុធកាលណោះរួមជាអាទិ៍មានមីស៊ីលចម្ងាយមធ្យម និងកាណុងបាញ់រ៉ុកែតដែលអាចហោះទៅដល់ទឹកដីចិនបាន។
ភ្លាមៗនោះ ចិនបានខឹងសម្បាជាខ្លាំង ហើយបានចេញមុខប្រាប់ឲ្យអាមេរិកលុបចោលជាបន្ទាន់នូវគម្រោងលក់អាវុធទៅឲ្យតៃវ៉ាន់ និងថែមទាំងបានគំរាមដាក់ទណ្ឌកម្មលើក្រុមហ៊ុនអាមេរិកណា ដែលមានជាប់ពាក់ព័ន្ធនឹងការលក់អាវុធទៅឲ្យតៃវ៉ាន់ផងដែរ។
តែទោះជាបែបនេះក្តី អាមេរិកហាក់មិនអើពើនឹងសម្តីរបស់ចិនឡើយ។ បន្ថែមលើនេះ កាលពីថ្ងៃចន្ទម្សិលមិញ អាមេរិកបែរទាំងបានប្រកាសបន្តលក់អាវុធបន្ថែមទៅឲ្យកោះតៃវ៉ាន់ និងថាវាឆ្លើយតបទៅនឹងផលប្រយោជន៍សេដ្ឋកិច្ច ហើយនិងសន្តិសុខជាតិរបស់អាមរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ