អូស្រ្តាលី-កូវីដ១៩៖ទីក្រុងមែលបួនលើកការបិទខ្ទប់ ក្រោយពីត្រូវបានបិទអស់រយៈពេល ៣ខែ
នៅក្នុងប្រទេសអូស្រ្តាលី ទីក្រុងមែលបួននៃរដ្ឋវ៉ិចតូរីយ៉ាបានលើកការបិទខ្ទប់នាថ្ងៃពុធ ទី២៨ តុលា ក្រោយពីបានបិទអស់រយៈពេល ៣ខែដើម្បីទប់ស្កាត់ការឆ្លងរាលដាលនៃជំងឺកូវីដ១៩។ ប្រជាជនទាំង ៥លាននាក់រស់ក្នុងទីក្រុងមែលបួនដែលជាទីក្រុងធំទី២ របស់អូស្រា្តលីផ្តើមមានសេរីភាពដើរហើរពេញលេញឡើងវិញ។ ទោះជាយ៉ាងនេះក្តី ព្រំដែនខាងក្រៅដែលរដ្ឋាភិបាលអូស្រ្តាលីបានបិទតាំងពីខែមីនានឹងត្រូវបន្តបិទរហូតដល់មានការសម្រេចចិត្តថ្មី។ ដោយឡែកនៅអឺរ៉ុប មានប្រទេសខ្លះ ពិសេសបារាំង និងអាល្លឺម៉ង់កំពុងស្គាល់កំណើនករណីឆ្លង ហើយកំពុងត្រៀមវិធានការថ្មីដើម្បីទប់ស្កាត់រលកឆ្លងទី២។
ចុះផ្សាយនៅថ្ងៃ៖
ស្តាប់ - ០២:០៥
ក្រៅពីប្រជាជនដែលទទួលបានសេរីភាពដើរហើរជាថ្មី ភោជនីយដ្ឋាន និងហាងលក់ទំនិញក៏បានផ្តើមបើកទ្វារឡើងវិញចាប់ពីអធ្រាត្រយប់ថ្ងៃអង្គារ ទី២៧ឆ្លងចូលថ្ងៃពុធ ទី២៨ តុលា។ ដើម្បីភ្លក់រសជាតិសេរីភាពឡើងវិញនេះឲ្យបានមុនគេ មានអ្នកខ្លះបានក្រោកតាំងពីព្រលឹមអុលទៅរកកាហ្វេ ឬទៅស្រស់ស្រូបអាហារពេកព្រឹកនៅតាមហាង។« អស់រយៈពេលជាយូរមកហើយដែលយើងបានរងចាំថ្ងៃនេះ » នេះជាសម្តីរបស់អ្នកទទួលខុសត្រូវហាងទំនិញម្នាក់ប្រាប់ AFP។ តែទោះជាយ៉ាងនេះក្តី ការវិលត្រឡប់រកភាពធម្មតាទាំងស្រុងហាក់នៅឆ្ងាយនៅឡើយ។ ស្រ្តីអ្នករកស៊ីអាយុ ៧១ឆ្នាំម្នាក់បានសង្កេតឃើញថា នៅមានហាងលក់ទំនិញជាច្រើនបន្តបិទទ្វារ និងមានមួយចំនួនហាក់បានបិទទ្វារជាស្ថាពរ។
« ពិតជាអស្ចារ្យណាស់ដែលបានមកកាន់ទីក្រុងជាថ្មី តែជាទីក្រុងមួយខុសពីមុនឆ្ងាយណាស់ ព្រោះដូចជាស្ងាត់ជ្រងំ » នេះជាការបន្ថែមរបស់រូបស្រ្តីអ្នករកស៊ីដដែល។ គួររម្លឹកថាក្នុងខែសីហា ទីក្រុងមែលបួនបានស្គាល់រលកឆ្លងកូវីដ១៩ លើកទី២ ដោយមានករណីឆ្លងថ្មីចំនួន ៧០០ករណីក្នុងមួយថ្ងៃ។ កាលណោះ រដ្ឋអំណាចបានប្រើវិធានការដាក់បម្រាមគោចរដើម្បីទប់ស្កាត់រហូតដល់ដំណាច់ខែកញ្ញា រួចបន្ថែមវិធានការបិទខ្ទប់ពេញមួយខែតុលា។ ជាមួយនឹងវិធានការបិទខ្ទប់នេះ ប្រជាជនត្រូវនៅផ្ទះ និងអាចធ្វើដំណើរតែក្នុងរង្វង់ ៥គីឡូម៉ែត្រពីលំនៅដ្ឋានសម្រាប់តែការងារមួយចំនួនដែលបានអនុញ្ញាត។
ការសម្រេចលើកការបិទខ្ទប់ពេលនេះដោយរដ្ឋាភិបាលបានសម្គាល់ឃើញថា ករណីឆ្លងថ្មីមានតែ ៣ករណីប៉ុណ្ណោះក្នុងមួយថ្ងៃក្នុងរយៈពេល ២សប្តាហ៍ចុងក្រោយនេះ។ ចាប់ពីពេលនេះតទៅ រដ្ឋាភិបាលអាចគ្រប់គ្រងបានវិញនូវស្ថានភាពជំងឺកូវីដ១៩ នៅក្នុងទីក្រុងមែលបួន។ តែទោះជាយ៉ាងនេះក្តី រដ្ឋាភិបាលមិនធ្វេសប្រហែស និងរក្សាភាពប្រយ័ត្នប្រយែង។ ព្រំដែនខាងក្រៅដែលបានបិទតាំងពីខែមីនាអាចនឹងបន្តបិទរហូតដល់ដំណាច់ឆ្នាំ ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ