ឥណ្ឌារៀបចំសមយុទ្ធជាមួយជប៉ុន អាមេរិក និងអូស្រា្តលីនៅក្នុងឈូងសមុទ្របង់ហ្កាល់
នៅថ្ងៃអង្គារ ទី៣ វិច្ឆិកា ប្រទេសឥណ្ឌា ជប៉ុន សហរដ្ឋអាមេរិក និងប្រទេសអូស្រា្តលីបានផ្តើមសមយុទ្ធកងនាវាចររួមគ្នានៅក្នុងឈូងសមុទ្របង់ហ្កាល់ដោយផ្តោតចក្ខុលើចិន។ គឺកំណើនមហាអំណាចយោធាចិននៅក្នុងតំបន់ដែលជាក្តីបារម្ភរបស់ប្រទេសទាំង៤។ មួយវិញទៀត សមយុទ្ធកងនាវាចររវាង ៤ប្រទេសដែលនឹងមានរយៈពេល ៣ថ្ងៃបានចាប់ផ្តើមឡើង ខណៈដែលឥណ្ឌាកំពុងមានជម្លោះតានតឹងព្រំដែនជាមួយចិននៅតំបន់ភ្នំហេមពាន្ត និងដែលឥណ្ឌាកំពុងស្វះស្វែងរកការជួយគាំទ្រអន្តរជាតិ ពិសេសពីក្រុមសន្ទនាសន្តិសុខចតុភាគីហៅកាត់ Quad។
ចុះផ្សាយនៅថ្ងៃ៖
ស្តាប់ - ០១:៥៦
ក្រុមសន្ទនាសន្តិសុខចតុភាគីដែលមានសហរដ្ឋអាមេរិក ជប៉ុន ឥណ្ឌា និងអូស្រា្តលីត្រូវបានបង្កើតឡើងក្នុងឆ្នាំ ២០១៧ ដើម្បីប្រឆាំងទប់នឹងឥទ្ធិពលរបស់កងទ័ពចិន ពិសេសកងទ័ពជើងទឹកដែលចិនបានចំណាយលុយយ៉ាងច្រើនដើម្បីធ្វើទំនើបកម្មនារយៈពេលប៉ុន្មានចុងក្រោយនេះ។ សមយុទ្ធកងនាវាចររយៈពេល ៣ថ្ងៃរវាងអាមេរិក ជប៉ុន ឥណ្ឌា និងអូស្រា្តលីដែលមានឈ្មោះ «ម៉ាឡាបា» នឹងមានលំហាត់សឹកប្រឆាំងយន្តហោះ និងប្រឆាំងនាវាមុជទឹក។ បន្ទាប់ពីឈូងសមុទ្របង់ហ្កាល់ សមយុទ្ធដដែលនេះនឹងបន្តធ្វើនៅក្នុងសមុទ្រអារ៉ាប៊ីជាបន្តទៀត។
នាដំណើរទស្សនកិច្ចមួយជុំវិញទ្វីបអាស៊ីរបស់ប្រមុខការទូតអាមេរិកលោកប៉ុមប៉េអូនៅក្នុងប្រទេសឥណ្ឌា ស្រីលង្កា ម៉ាល់ឌីវ ឥណ្ឌូណេស៊ី និងវៀតណាមកាលពីសប្តាហ៍កន្លងទៅ លោកប៉ុមប៉េអូបានព្រមាន និងបរិហារចិនចាស់ដៃ។ ជាក់ស្តែងនៅឥណ្ឌា លោកប៉ុមប៉េអូបានបរិហារពីកំណើនឈ្លានពាន និងសកម្មភាពបង្កអស្ថិរភាពរបស់ចិន។ គួរបញ្ជាក់ថាក្រៅពីអាមេរិក ជប៉ុន ឥណ្ឌា និងអូស្រ្តាលីក៏កំពុងស្គាល់ទំនាក់ទំនងតានតឹងជាមួយចិនដូចគ្នា។ ក្នុងខែមិថុនាកន្លងទៅ កងទ័ពចិន និងកងទ័ពឥណ្ឌាបានវាយប្រតាយប្រតប់គ្នានៅព្រំដែនមានជម្លោះលើតំបន់ភ្នំហេមពាន្តដោយបណ្តាលឲ្យមានស្លាប់រៀងៗខ្លួន។
កងទ័ពជើងទឹកឥណ្ឌាបានអះអាងថា សមយុទ្ធពេលនេះនឹងបង្ហាញចេញនូវការរួមកម្លាំងកម្រិតខ្ពស់ និងការសម្របសម្រួលរវាងកងទ័ពជើងទឹកមិត្តដោយផ្អែកលើការចែករំលែកតម្លៃរវាងគ្នា។ ចំណែក
ប្រមុខការពារជាតិអូស្រ្តាលីលោកស្រី Linda Reynolds បានថ្លែងនាដំណាច់ខែតុលាថា ការចូលរួមលើកដំបូងរបស់អូស្រ្តាលីនៅក្នុងសមយុទ្ធមានគោលដៅបង្ហាញការប្តេជ្ញាចិត្តរួមរបស់អូស្រ្តាលីក្នុងការគាំទ្រតំបន់ឥណ្ឌូ ប៉ាស៊ីហ្វិកបើកចំហ និងរីកចម្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ