អាមេរិក អូស្ត្រាលី ជប៉ុន និងឥណ្ឌា ចង់បង្កើត ផ្លូវសូត្រ ដូចចិន ឬដើម្បីប្រកួតចិន ?
សារព័ត៌មានអូស្ត្រាលី Australian Financial Review បានបង្ហើបឱ្យដឹងនៅថ្ងៃចន្ទទី ១៩ កុម្ភៈនេះ ថា អាមេរិក អូស្ត្រាលី ជប៉ុន និងឥណ្ឌា កំពុងពិចារណាចង់បង្កើតបណ្តាញផ្លូវសូត្រមួយ ជារបស់ខ្លួន ដើម្បីកំរិតឥទ្ធិពលរបស់ចិននាអនាគត។ ប៉ុន្តែសម្រាប់ប្រមុខដឹកនាំប្រទេសទាំងបួន គម្រោងនេះ មិនមែនជាប្រជែងជាមួយនឹងផ្លូវសូត្រ នៃផែនការ “ផ្លូវមួយខ្សែក្រវ៉ាត់មួយ” របស់ចិនឡើយ។
ចុះផ្សាយនៅថ្ងៃ៖
ស្តាប់ - ០៥:១៦
គម្រោងដែលក្រុមបួនប្រទេស (អាមេរិក អូស្ត្រាលី ឥណ្ឌា និងជប៉ុន) កំពុងពិចារណា ទើបតែប៉ិចពន្លកទេ។ នៅសប្តាហ៍នេះ នៅពេលនាយករដ្ឋមន្ត្រីអូស្ត្រាលីអញ្ជើញទៅបំពេញទស្សនកិច្ចនៅសហរដ្ឋអាមេរិក ហើយនឹងត្រូវមានជំនួបជាមួយលោកប្រធានាធិបតីត្រាំ ប្រមុខដឹកនាំទាំងពីរ នឹងជជែកគ្នាអំពីគម្រោងសាងសង់ផ្លូវនេះ តែនឹងគ្មានទេសេចក្តីថ្លែងការណ៍ជាផ្លូវការនោះ។
គំនិតរបស់ក្រុមប្រទេសទាំងបួន គឺចង់បង្កើតផែនការ សាងសង់ហេដ្ឋារចនាសម្ព័ន្ធ ដែលមានទម្រង់និងសណ្ឋានដូចជាដូចគម្រោងផ្លូវពាណិជ្ជកម្មចិន និងដែលអាចអាចមកជំនួសផ្លូវសូត្រចិន “ផ្លូវមួយខ្សែក្រវ៉ាត់មួយ”បាន។ ប៉ុន្តែគម្រោងនេះ មិនមែនជាការប្រកួតប្រជែងជាមួយគម្រោងផ្លូវសូត្ររបស់ក្រុងប៉េកាំងទេ។
ផ្លូវថ្មី ជាជម្រើស មិនមែនជាការប្រកួតប្រជែង
សម្រាប់ប្រមុខដឹកនាំអាមេរិក អូស្ត្រាលី ឥណ្ឌា និងចិន គម្រោងដែលពួកគេកំពុងពិចារណាធ្វើនេះ ជាជម្រើសថ្មីមួយទៀត ក្រៅអំពីផ្លូវសូត្ររបស់ចិនតែប៉ុណ្ណោះ។
អ្នកទទួលខុសត្រូវជាន់ខ្ពស់អាមេរិក ដែលសុំមិនបញ្ចេញឈ្មោះ បានពន្យល់យ៉ាងលម្អិតថា គ្មាននរណាម្នាក់បានចេញស្តី ហាមមិនឱ្យចិនសាងសង់ហេដ្ឋារចនាសម្ព័ន្ធ ផ្លូវពាណិជ្ជកម្មទេ ! តែចិនអាចសង់កំពង់ផែ ដែលពុំសូវធានាបាននូវភាពឋិតឋេរផ្នែកសេដ្ឋកិច្ច ! ដូច្នេះក្រុមប្រទេសទាំងបួនអាចនឹងធ្វើឱ្យសេដ្ឋកិច្ចមានឋិតឋេរបាន តាមរយៈគម្រោងថ្មីនេះ ដោយសាងសង់ បណ្តាញភ្ជាប់ទៅកំពង់ផែជាផ្លូវថ្នល់ ឬផ្លូវដែក។
ចំណែកខាងជប៉ុនវិញ គម្រោងនេះមិនមែនជាមធ្យោបាយប្រកួតប្រជែងជាមួយផ្លូវសូត្ររបស់ចិនទេ ព្រោះគម្រោងផ្លូវនេះ ជាចំណែកមួយយុទ្ធសាស្ត្រ ឥណ្ឌូប៉ាស៊ីហ្វិកសេរី និងបើកចំហ ដែលជប៉ុនកំពុងពិចារណាផ្តល់សន្ទុះ តាមរយៈកម្មវិធីជំនួយអភិវឌ្ឍន៍។ កម្មវិធីនេះមានសង្ខេបបង្ហាញនៅក្នុងសៀវភៅស ២០១៧ ស្តីពីជំនួយអភិវឌ្ឍន៍។
ប៉ុន្តែយុទ្ធសាស្ត្ររបស់ជប៉ុន បានទទួលជំនួយពីអាមេរិក ហើយគំនិតចង់ផ្តល់ជម្រើសថ្មីដល់ពិភពលោក របស់អាមេរិក អូស្ត្រាលី ឥណ្ឌា និងជប៉ុន ត្រូវបានគេមើលឃើញថា ជាចម្លើយតបទៅនឹងមហិច្ឆតា ធំឡើងៗរបស់ចិន។
មហិច្ឆតាដែលបានបង្ហាញកាន់តែច្បាស់ តាំងពីឆ្នាំ២០១៣ ក្នុងការតភ្ជាប់ប្រទេសចំនួនជាង៦០ ពីអាស៊ី ទៅអឺរ៉ុប ដោយកាត់តាមតំបន់ដើមបូព៌ា និងអាហ្វ្រិក ឬហៅថា គម្រោង“ផ្លូវមួយខ្សែក្រវ៉ាត់មួយ »។ មហាគម្រោងសាងសង់ហេដ្ឋារចនាសម្ព័ន្ធ ដែលប្រធានាធិបតីចិនស៊ីជីនពីង បានសម្ពោធជាផ្លូវការនៅឆ្នាំ២០១៧ ជាមួយនឹងទឹកប្រាក់វិនិយោគ ១២៤ពាន់លានដុល្លារ។ ហើយជាងនេះទៅទៀត កាលពីចុងខែមករា ២០១៨ ចិនបានស្នើពង្រីកគម្រោង ផ្លូវមួយខ្សែក្រវ៉ាត់មួយ ទៅដល់តំបន់ប៉ូលខាងជើង អាកទិក ដែលអាចធ្វើចរាចរណ៍តាមផ្លូវទឹកបាន ដោយហេតុតែការឡើងកម្តៅនៃអាកាសធាតុបានធ្វើទឹកកករលាយ។
តាមការពិតទៅនោះ ប្រឈមនឹងមហិច្ឆតាចិន ដែលរីកធំធាត់ជាលំដាប់ សហរដ្ឋអាមេរិក ជប៉ុន ឥណ្ឌា និងអូស្ត្រាលី ចាប់ដៃគ្នា បង្កើតជាក្រុមបួនប្រទេសមានឈ្មោះថា Quad តាំងពីប្រមាណ១០ឆ្នាំមកហើយ ដើម្បីពង្រឹងកិច្ចសហប្រតិបត្តិការ ក្នុងវិស័យសន្តិសុខ និងសហការគ្នា បង្កើតគម្រោងសាងសង់ហេដ្ឋារចនារបស់ខ្លួនដែរ គ្រាន់តែមិនទៅលឿនដូចចិនម្នាក់ឯង។ ប្រទេសទាំងបួន ទើបបានឆ្លៀតជួបពិគ្រោះយោបល់គ្នា លើគម្រោងនេះ កាលពីខែវិច្ឆិកា កន្លងទៅ នៅក្រៅក្របខ័ណ្ឌនៃជំនួបកំពូលអាស៊ាន នៅក្រុងម៉ានីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ