អូស្ត្រាលី ទាមទារឲ្យចិនស្រាយបំភ្លឺរឿងហាមឃាត់ការនាំចូលធ្យូងថ្មពីអូស្ត្រាលី
ប្រទេសអូស្រ្តាលី នៅថ្ងៃអង្គារ ១៣ តុលានេះ បានទាមទារឲ្យចិនបញ្ជាក់បំភ្លឺថាតើពិតជាបានចេញវិធានការរឹតបន្តឹងលើការនាំចូលធ្យូងថ្មពីអូស្ត្រាលីមែនឬយ៉ាងណា? ប្រសិនណាបើរដ្ឋាភិបាលក្រុងប៉េងកាំងដាក់ចេញវិធានការនេះមែននោះ វាបង្កជាផលប៉ះពាល់ធ្ងន់ធ្ងរដល់សេដ្ឋកិច្ចរបស់អូស្ត្រាលី ដែលកំពុងរងគ្រោះមួយផ្នែករួចទៅហើយដោយសារជម្លោះរវាងប្រទេសទាំងពីរនៅប៉ុន្មានខែថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:០២
រដ្ឋមន្រ្តីពាណិជ្ជកម្មអូស្ត្រាលីលោក Simon Birmingham បាននិយាយថាអូស្ត្រាលីបានស្នើសុំតាមរយៈបណ្តាញការទូតទៅចិន ឲ្យបកស្រាយបំភ្លឺរឿងណែនាំឲ្យក្រុមហ៊ុនចិនឈប់ទិញធ្យូងថ្មពីអូស្ត្រាលី។ ធ្យូងថ្ម ដែលមានតម្លៃប្រមាណ ១០ ពាន់លានដុល្លារក្នុងមួយឆ្នាំ និងទំនងជាត្រូវបានរដ្ឋាភិបាលក្រុងប៉េកាំងដាក់ចេញដើម្បីជាទណ្ឌកម្មនយោបាយលើក្រុងកង់បេរ៉ា។
ការទាមទារសុំការស្រាយបំភ្លឺខាងលើនេះ ធ្វើឡើងដើម្បីឲ្យដឹងច្បាស់ថារដ្ឋាភិបាលចិនពិតជាបានដាក់ចេញនូវវិធានការហាមឃាត់លើការនាំចូលធ្យូងថ្មពីអូស្ត្រាលីដូចពាក្យចចាមអារ៉ាមដែលបាននឹងកំពុងល្បីលេចឮរយៈពេលជាច្រើនសប្តាហ៍មកហើយ។
នៅមួយរយៈពេលចុងក្រោយនេះ មានការចុះផ្សាយព័ត៌មានជាច្រើនក្នុងនោះក៏មានដែរក្រុមហ៊ុនថាមពល S&P Global Platts ដែលរាយការណ៍ថាក្រុមហ៊ុនផ្គត់ផ្គង់ថាមពលនិងរោងម៉ាស៊ីនដែកដែលគ្រប់គ្រងដោយរដ្ឋចិនបានទទួលសេចក្តីជូនដំណឹងដោយផ្ទាល់ពីរដ្ឋាភិបាលក្នុងការបញ្ឈប់ការទិញធ្យូងថ្មអូស្ត្រាលី។
គួរជ្រាបថា រឿងពាក់ព័ន្ធអាជីវកម្មធ្យូងថ្មនេះគឺជាបញ្ហាផ្ទុះឡើងចុងក្រោយបំផុតនៅក្នុងទំនាក់ទំនងរវាងប្រទេសអូស្ត្រាលី និងចិនដែលនៅប៉ុន្មានខែថ្មីៗនេះកំពុងមានភាពតានតឹងនឹងគ្នា ដោយសារតែរឿងដោះដូរពាណិជ្ជកម្ម វិបត្តិកូវីដ និងរឿងអាស្រូវចារកម្ម។
ការហាមឃាត់ធ្យូងថ្មពីសំណាក់ភាគីចិន អាចបង្កជាផលប៉ះពាល់ធ្ងន់ធ្ងរដល់សេដ្ឋកិច្ចអូស្ត្រាលីដែលកំពុងជួបវិបត្តិសេដ្ឋកិច្ចលើកដំបូងក្នុងរយៈពេលជិត៣០ ឆ្នាំមកនេះ ដោយសារជម្លោះពាណិជ្ជកម្ម និងវិបត្តិកូវីដ។
យ៉ាងណាក៏ដោយ រហូតមកទល់នឹងពេលនេះ គេនៅមិនទាន់ឃើញប្រទេសចិនចេញមុខស្រាយបំភ្លឺ តបទៅតាមការទាមទាររបស់អូស្ត្រាលីនៅឡើយទេ។ រដ្ឋមន្រ្តីអូស្រ្តាលីជាច្រើនរូបបានឲ្យដឹងថា ពួកគេបានព្យាយាមទាក់ទងទៅសមភាគីចិន ពីព្រោះថារដ្ឋាភិបាលចិនបានរក្សាភាពស្ងៀមស្ងាត់ និងបានធ្វើទំនាក់ទំនងរវាងប្រទេសទាំងពីរនៅគាំងទ្រឹង រកភាពល្អប្រសើរនឹងគ្នាមិនទាន់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ