អង់គ្លេសសំដែងក្តីបារម្ភ នៅក្រោយលោក ជីមី ឡៃត្រូវចោទប្រកាន់ ក្រោមច្បាប់សន្តិសុខជាតិហុងកុង
នៅទីបំផុតទៅ លោកជីមី ឡៃ អ្នកជំនួញ និងជាចាងហ្វាងកាសែតប្រឆាំង ដ៏ធំជាងគេនៅហុងកុង ត្រូវបានប៉ូលិសចោទប្រកាន់ ជាផ្លូវការ នៅថ្ងៃសុក្រម្សិលមិញ ពីបទឃុបឃិតជាមួយបរទេស ដើម្បីបំផ្លាញសន្តិសុខជាតិ។ លោកជីមី ឡៃត្រូវបានប៉ូលិសហុងកុងចាប់ឃុំខ្លួនតាំងពី សប្តាហ៍មុន ក្នុងបទចោទប្រកាន់ក្លែងបន្លំ បំពានកិច្ចសន្យា។ រដ្ឋាភិបាលអង់គ្លេស ដែលធ្លាប់គ្រប់គ្រងហុងកុង រហូតដល់ឆ្នាំ ១៩៩៧ បានសំដែងក្តីបារម្ភនៅក្រោយ ឡោកជីមី ឡៃ ត្រូវចោទប្រកាន់ ក្រោមច្បាប់សន្តិសុខជាតិ ដែលទីក្រុងប៉េកាំង ទើបចាប់អនុវត្ត តាំងពីខែកក្កដាឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:២៥
នៅក្នុងសេចក្តីប្រកាសកាលពីថ្ងៃសុក្រ ប៉ូលិសហុងកុង បានបញ្ជាក់ថា នៅក្រោយ ការស៊ើបអង្កេត ស៊ីជម្រៅ របស់ប៉ូលិស ទទួលបន្ទុកសន្តិសុខជាតិ គេបានសម្រេច ចោទប្រកាន់បុរសម្នាក់ អាយុ ៧៣ឆ្នាំ ពីបទ ឃុបឃិតជាមួយបរទេស ឬជាមួយ កម្លាំងពីខាងក្រៅ ដើម្បី គំរាមកំហែងសន្តិសុខជាតិ។
បុរសអាយុ៧៣ឆ្នាំ ដែលប៉ូលិសសំដៅ នោះ គឺលោកជីមី ឡៃ អ្នកជំនួញ និងជាចាងហ្វាងកាសែត Apple Daily ដែលជាកាសែតរិះគន់ យ៉ាងចេញមុខ អាជ្ញាធរប៉េកាំង។ លោកជីមី ឡៃ ត្រូវបានប៉ូលិសហុងកុង ចាប់ឃុំ តាំងពីថ្ងៃទី៣ធ្នូ ក្នុងបទចោទប្រកាន់មួយរួចហើយ គឺ ក្លែងបន្លំ ប្រើប្រាស់អគារកាសែត ខុសពីការកំណត់ក្នុងកិច្ចសន្យា។
លោកជីមី ឡៃជាឥស្សរជនហុងកុង ម្នាក់ទៀត ដែលត្រូវរងការចោទប្រកាន់ ក្រោមច្បាប់ សន្តិសុខជាតិហុងកុង ដែលទីក្រុងប៉េកាំងបានបង្កើតឡើង ជាពិសេសសម្រាប់បង្រ្កាប ចលនាបាតុកម្មនៅទីក្រុងហុងកុង។ នៅមុន លោកជីមី ឡៃ សកម្មជនដើម្បីប្រជាធិបតេយ្យហុងកុង បីរូប គឺលោក Joshua Wong Agnes Chow និងIvan Lam ត្រូវបានតុលាការផ្តន្ទាទោស ឲ្យជាប់ពន្ធនាគារពី ៧ ទៅ ១៣ខែកន្លះ ពីបទរៀបចំបាតុកម្មខុសច្បាប់ នៅមុខប៉ុស្តប៉ូលិសហុងកុង កាលពីខែ មិថុនាឆ្នាំមុន។
នៅ ថ្ងៃសុក្រ រដ្ឋាភិបាលអង់គ្លេស តាមរយៈ អ្នកនាំពាក្យ របស់លោកនាយករដ្ឋមន្រ្តី បូរីស ចនសុន បានទាញសញ្ញាអាសន្ន នៅក្រោយ ប៉ូលិសហុងកុង ចោទប្រកាន់ លោកជីមី ឡៃ។ សម្រាប់អ្នកនាំពាក្យរបស់នាយករដ្ឋមន្រ្តី អង់គ្លេស អង់គ្លេស មានការបារម្ភដ៏ជ្រាលជ្រៅ ដែលឃើញ អាជ្ញាធរហុងកុង ប្រើនីតិវិធីតុលាការប្រឆាំង សកម្មជនប្រជាធិបតេយ្យ ដូចជាលោក ជីមី ឡៃ។ ដោយរងបទចោទប្រកាន់ ក្រោមច្បាប់សន្តិសុខជាតិហុងកុង លោកជីមី ឡៃនឹងអាចប្រឈមនឹងការជាប់ទោស ក្នុងពន្ធនាគារអស់មួយជីវិត។
លោកជីមី ឡៃ មានកាន់លិខិតឆ្លងដែនអង់គ្លេស ដែលលោកធ្លាប់បានទទួល តាំងពីមុនហុងកុង ត្រូវអង់គ្លេសផ្ទេរទៅឲ្យប្រទេសចិនកាន់កាប់ វិញ នៅឆ្នាំ ១៩៩៧។ ប៉ុន្តែ ក្រសួងការបរទេសអង់គ្លេសបានបញ្ជាក់ថា កុងស៊ុលអង់គ្លេសនៅ ទីក្រុងហុងកុង មិនអាចផ្តល់ជំនួយផ្នែកច្បាប់ សម្រាប់លោកជីមី ឡៃ បានឡើយ ដោយសារ ចិនមិនទទួលស្គាល់ ការមានសញ្ជាតិពីរ។ យ៉ាងណាក៏ដោយ អ្នកនាំពាក្យរបស់នាយករដ្ឋមន្រ្តីអង់គ្លេសបានអះអាងថា រដ្ឋាភិបាលអង់គ្លេស នឹងលើកបញ្ហានេះ ទៅជជែកជាមួយអាជ្ញាធរហុងកុង ហើយនិងព្យាយាមបញ្ចុះបញ្ចូល មន្រ្តីជាន់ខ្ពស់ហុងកុង ឲ្យឈប់យាយី បិទសំឡេងរបស់ក្រុមប្រជាធិបតេយ្យហុងកុងតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ