ស្រ្តីថៃម្នាក់ត្រូវតុលាការផ្តន្ទាទោសដាក់ពន្ធនាគារ ៤៣ឆ្នាំ ពីបទជេរប្រមាថព្រះមហាក្សត្រ
តុលាការថៃ កាលពីថ្ងៃអង្គារម្សិលមិញ បានសម្រេចផ្តន្ទាទោសស្រ្តីថៃម្នាក់ ឲ្យជាប់ពន្ធនាគារ ៤៣ឆ្នាំ ក្នុងបទចោទប្រកាន់ជេរប្រមាថរាជវង្សថៃ។ វាជាទោសទណ្ឌដ៏ធ្ងន់ធ្ងរបំផុត មិនធ្លាប់មាន ចាប់តាំងពី ប្រទេសថៃ ចាប់អនុវត្តច្បាប់ ជេរប្រមាថព្រះមហាក្សត្រ។ សម្រាប់អ្នកជំនាញ ការសម្រេចផ្តន្ទាទោសទៅលើស្រ្តីថៃ កាលពីថ្ងៃអង្គារអាចជាសារព្រមាន មួយរបស់អាជ្ញាធរថៃ សម្រាប់ សកម្មជនដើម្បី ប្រជាធិបតេយ្យ ដែលបានធ្វើបាតុកម្ម ចាប់តាំងពីឆ្នាំ ២០១៩ ដើម្បី ទាមទារ ឲ្យនាយករដ្ឋមន្រ្តីចុះចេញពីមុខតំណែង ហើយនិងការធ្វើកំណែទម្រង់ស្ថាប័នព្រះមហាក្សត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
បន្ទាប់ពីស្ងាត់ ជិត ២ឆ្នាំ ច្បាប់ជេរប្រមាថព្រះមហាក្សត្រ ថៃ ត្រូវបានតុលាការថៃ យកមកប្រើឡើងវិញ នៅថ្ងៃអង្គារម្សិលមិញ ដើម្បីដាក់ទោស ដ៏សែនធ្ងន់ទៅលើស្រ្តីថៃម្នាក់។ តាមអង្គការមេធាវីដើម្បីសិទ្ធមនុស្ស លោកស្រី Anchan អតីតមន្រ្តីរាជការថៃ ត្រូវបានតុលាការថៃ កាត់ទោសឲ្យជាប់ពន្ធនាគារ ៤៣ឆ្នាំ និង១០០ថ្ងៃ ក្នុងបទចោទប្រកាន់ ជេរប្រមាថរាជវង្សថៃ។
ទៅតាម មាត្រាទី ១១២នៃច្បាប់ ការជេរប្រមាថព្រះមហាក្សត្រត្រូវប្រឈមទោសជាប់ពន្ធនាគារ ពី ៣ទៅ ១៥ឆ្នាំ ក្នុងមួយបទល្មើស។ នៅថ្ងៃអង្គារ លោកស្រី Anchan ត្រូវបានតុលាការចោទប្រកាន់ សម្រាប់បទល្មើស ចំនួន ២៩ ដែលជាហេតុធ្វើឲ្យទោសជាប់ពន្ធនាគារ របស់លោកស្រី ឡើងសរុបដល់ទៅ ៨៧ឆ្នាំ។ ពោលជាទោសដ៏ធ្ងន់ធ្ងរ មិនធ្លាប់មាន គឺធ្ងន់ជាង កាលឆ្នាំ ២០១៧ នៅពេលអាជីវករជាតិថៃម្នាក់ត្រូវតុលាការកាត់ទោសឲ្យជាប់ពន្ធនាគារ ៧០ឆ្នាំ ក្នុងបទជេរប្រមាថព្រះមហាក្សត្រថៃ។
តាមអង្គការមេធាវីដើម្បីសិទ្ធិមនុស្ស ចម្លើយសារភាពកំហុស របស់លោកស្រី Anchan បានធ្វើឲ្យតុលាការសម្រាលទោសអស់ ពាក់កណ្តាល ឲ្យមកនៅ ត្រឹម ៤៣ឆ្នាំ។ ក្នុងវ័យ ជាង៦០ឆ្នាំ លោកស្រី Anchan ត្រូវបានអាជ្ញាធរថៃចោទប្រកាន់ថា បានចែកចាយ ខ្សែអាត់សំឡេង ដែលជេរ រិះគន់ រាជវង្សថៃ នៅលើបណ្តាញYoutube និងហ្វេសប៊ុក ចំនួន ២៩ដង នៅក្នុងចន្លោះឆ្នាំ ២០១៤ និងឆ្នាំ ២០១៥ ក្រោយរដ្ឋប្រហារយោធា។ នៅក្នុងសវនាការកាលពីថ្ងៃអង្គារលោកស្រី Anchan ដែលធ្លាប់ បដិសេធការចោទប្រកាន់ នៅ តុលាការយោធា បាននិយាយការពារខ្លួនថា លោកស្រី បានត្រឹមតែចែកចាយ ដោយគ្មានធ្វើអត្ថាធិប្បាយ អ្វីទាំងអស់។ ចំណែកអ្នកដែលជាម្ចាស់សំឡេង រិះគន់ គ្មានជាប់ទោសដូចលោកស្រី នោះទេ។ តាមកាសែតបាងកកបុស្តិ៍ បុរសម្ចាស់សំឡេងរិះគន់ ត្រូវបានតុលាការយោធាថៃ កាត់ទោស នៅ ឆ្នាំ ២០១៥។ បន្ទាប់ពីសារភាពកំហុស ទោសជាប់ពន្ធនាគារ១០របស់បុរសម្នាក់នោះត្រូវបានផ្អាកទៅវិញ។
ប៉ុន្តែ សម្រាប់ចៅក្រម ថៃ ការចែកចាយរបស់លោកស្រីAnchan ធ្វើឲ្យមនុស្សផ្សេងទៀតបានស្តាប់លឺការជេរប្រមាថរាជវង្សថៃ។
នៅ ឆ្នាំ២០១៥ អាជ្ញាធរថៃបានឃុំខ្លួនលោកស្រី ជិត៤ឆ្នាំ ដើម្បីធ្វើការស៊ើបអង្កេត មុន នឹងដោះលែង ឲ្យនៅក្រៅឃុំបណ្តោះអាសន្ន នៅ ឆ្នាំ ២០១៨។
សម្រាប់អ្នកវិភាគនយោបាយ របស់សកលវិទ្យាល័យ អុប៊ុន រដ្ឋចាថានី Titipol Phakdeewanich ការសម្រេចទោស ដ៏ធ្ងន់ កាលពីថ្ងៃអង្គារ ដែល មិនធ្លាប់មាន ក្នុងប្រវត្តិអនុវត្តច្បាប់ជេរប្រមាថ ព្រះមហាក្សត្រ មានលក្ខណៈនយោបាយ ដើម្បី បំភិតបំភ័យ និស្សិត យុវជនដូចដែលគេធ្លាប់អនុវត្ត ក្នុងអតីតកាល។ ប៉ុន្តែ នៅពេលគេមើលទៅលើទំហំ នៃចលនាយុវជន ដើម្បី ប្រជាធិបតេយ្យ ដែលធ្វើបាតុកម្ម តាំងពីពាក់កណ្តាលឆ្នាំ ២០២០ ដើម្បី ទាមទារឲ្យធ្វើកំណែទម្រង់ ស្ថាប័នព្រះមហាក្សត្រ គេឃើញថា នយោបាយរបស់រដ្ឋាភិបាល ដោយសំអាងប្រើច្បាប់ជេរប្រមាថព្រះមហាក្សត្រ លែងមានប្រសិទ្ធិភាពទៀតហើយ។ ផ្ទុយទៅវិញ ការប្រើច្បាប់ជេរប្រមាថព្រះមហាក្សត្រ នឹងទៅបំផ្លាញ មុខមាត់របស់ស្ថាប័នព្រះមហាក្សត្រមិនថា ក្នុងស្រុក ឬនៅបរទេស។
ច្បាប់ជេរប្រមាថព្រះមហាក្សត្រ បានស្ងាត់ បាត់មុខ ចាប់តាំងពី ឆ្នាំ ២០១៨ មុននឹងកំរើកលេចមុខមកវិញ នៅ ខែវិច្ឆិកា ឆ្នាំ២០២០។ ចាប់តាំងកកើតមានចលនាធ្វើបាតុកម្មរបស់ក្រុមដើម្បី ប្រជាធិបតេយ្យ នៅពាក់កណ្តាលឆ្នាំ ២០២០ នៅ ប្រទេសថៃ អាជ្ញាធរដែលដំបូងឡើយ ធូររលុង បណ្តោយឲ្យមានការនិយាយរិះគន់រាជវង្សថៃ បានចាប់រឹតបន្តឹង មកវិញ នៅ ប៉ុន្មានខែចុងក្រោយនេះ។ សកម្មជនប្រមាណ ៥០នាក់ ដែលត្រូវប៉ូលិស ចាប់ឃុំខ្លួន ដោយសារបានចូលរួម ធ្វើបាតុកម្ម ទាមទារឲ្យសរសេររដ្ឋធម្មនុញ្ញសាជាថ្មី និងកំណែទម្រង់ស្ថាប័នព្រះមហាក្សត្រ សុទ្ធតែត្រូវ ចោទប្រកាន់ ក្រោមច្បាប់ជេរប្រមាថព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ