ចិនលែងទទួលស្គាល់លិខិតឆ្លងដែនអង់គ្លេសរបស់ពលរដ្ឋហុងកុង
អាជ្ញាធរចិនបានប្រកាសនៅថ្ងៃសុក្រទី ២៩មករា ២០២១ ថា ចាប់ពីថ្ងៃទី៣១ ខែមករា តទៅ ចិននឹងលែងទទួលស្គាល់លិខិតឆ្លងដែនអង់គ្លេស BNO ឬលិខិតឆ្លងដែនពិសេសដែលអង់គ្លេសផ្តល់ឱ្យពលរដ្ឋរស់នៅក្រៅប្រទេស មានជាអាទិ៍ពលរដ្ឋហុងកុង ទៀតហើយ។ សេចក្តីសម្រេចនេះ ធ្វើឡើងក្រោយពីរដ្ឋាភិបាលអង់គ្លេសបានផ្តល់សិទ្ធិបន្ថែមដល់ពលរដ្ឋហុងកុង ដែលមានកាន់លិខិតឆ្លងដែនBNO។
ចុះផ្សាយនៅថ្ងៃ៖
ស្តាប់ - ០២:២២
“ចាប់ពីថ្ងៃទី ៣១មករា២០២១ទៅ ចិនលែងទទួលស្គាល់ លិខិតឆ្លងដែនអង់គ្លេសBNO សម្រាប់ពលរដ្ឋឯនាយសមុទ្ទ ជាឯកសារធ្វើដំណើរ ឬសម្រាប់បញ្ជាក់អត្តសញ្ញាណ ទៀតហើយ” នេះបើតាមសេចក្តីប្រកាសរបស់អ្នកនាំពាក្យក្រសួងការបទេសចិន Zhao Lijian នៅចំពោះមុខអ្នកសារព័ត៌មាន។
ជាមួយនឹងសេចក្តីសម្រេចនេះ តើពលរដ្ឋហុងកុង ដែលមានកាន់លិខិតឆ្លងដែនអង់គ្លេសឯនាយសមុទ្ទ នឹងត្រូវហាមឃាត់មិនឱ្យចូលជាន់ទឹកដីចិនដីគោកឬ ? គេនៅមិនទាន់ដឹងច្បាស់អំពីផលវិបាកជាក់ស្តែងទេ។ តែអាជ្ញាធរចិន មិនប្រាកដជាដឹងថាតើពលរដ្ឋហុងកុងណាមានកាន់លិខិតឆ្លងអង់គ្លេសឡើយ ព្រោះជាទូទៅ ពលរដ្ឋហុងកុងធ្វើដំណើរទៅចិនដីគោក ច្រើនតែប្រើលិខិតឆ្លងដែនហុងកុង។ លិខិតឆ្លងដែនBNO ត្រូវបានប្រើប្រាស់សម្រាប់តែដើម្បីធ្វើដំណើរទៅអង់គ្លេសប៉ុណ្ណោះ។
យ៉ាងណាក៏ដោយ ក៏ឡុងដ៍ បានបញ្ចេញប្រតិកម្មសោកស្តាយចំពោះសេចក្តីសម្រេចរបស់ប៉េកាំង តែអង់គ្លេសមិនភ្ញាក់ផ្អើលទេ។ បើតាមក្រសួងមហាផ្ទៃអង់គ្លេស មានពលរដ្ឋហុងជាង៣៥ម៉ឺននាក់ មានលិខិតឆ្លងដែនអង់គ្លេសBNO ពោលគឺបានកើនឡើងស្ទើរមួយទ្វេជាពីរ ក្នុងរយៈពេលតែមួយឆ្នាំកន្លះ ចុងក្រោយនេះ។ គិតត្រឹមពីខែកក្កដា ដល់ពាក់កណ្តាលខែមករា២០២១ ពលរដ្ឋហុងកុង៧០០០នាក់ បានមកដល់អង់គ្លេស ដោយប្រើលិខិតឆ្លងដែនអង់គ្លេសឯនាយសមុទ្ទ ដែលជាសំណុំបែបបទពិសេស។ តួលេខនឹងអាចឡើងដល់ ៣២២៤០០នាក់ នៅ៥ឆ្នាំខាងមុខ។ នេះបើតាមក្រសួងមហាផ្ទៃអង់គ្លេសដដែល។
ជាមរតកបន្សល់ទុកតាំងពី ហុងកុងស្ថិតនៅក្រោមក្រោមអាណានិគមអង់គ្លេស ពលរដ្ឋហុងកុង ជាង២លាន៩សែននាក់ កើតមុនឆ្នាំ១៩៩៧ ឆ្នាំដែលហុងកុងបានប្រគល់មកឱ្យចិនវិញ សុទ្ធតែអាចមានលិខិតឆ្លងដែនពិសេសនេះទាំងអស់គ្នា។ កាលពីមុនលិខិតឆ្លងដែនពិសេសនេះ មានតម្លៃត្រឹមឱ្យពលរដ្ឋហុងកុងអាចចេញចូលស្នាក់នៅអង់គ្លេសបាន៦ខែ តែមិនអាចមានសិទ្ធិធ្វើការទេ។ ប៉ុន្តែដើម្បីឆ្លើយតបនឹងការអនុម័តច្បាប់សន្តិសុខហុងកុង ឡុងដ៏បានបន្ថែមសិទ្ធិ ដែលចូលជាធរមានចាប់ពីថ្ងៃអាទិត្យនេះទៅ ដល់ អ្នកកាន់លិខិតឆ្លងដែនBNO អាចចេញចូលទៅធ្វើការនិងស្នាក់នៅលើទឹកអង់គ្លេសរយៈពេល៥ឆ្នាំ មុននឹងអាចសុំសញ្ជាតិអង់គ្លេសបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ