តុលាការចិនកាត់ទោសសកម្មជនដែលលួចរត់តាមទូកទៅកោះតៃវ៉ាន់ ឲ្យជាប់ពន្ធនាគារ ពី ៧ខែ ទៅ៣ឆ្នាំ
តុលាការចិន នៅទីក្រុងសិនចិន បានសម្រេច នៅថ្ងៃ ពុធនេះ កាត់ទោស សកម្មជនដើម្បីប្រជាធិបតេយ្យហុងកុង ១០រូប ឲ្យជាប់ពន្ធនាគារពី ៧ខែ រហូតដល់៣ឆ្នាំ ពីបទលួចឆ្លងដែនខុសច្បាប់ ចេញពីទឹកដី ហុងកុង។ តាំងពី ថ្ងៃចន្ទ ដែលជាថ្ងៃបើកសវនាការ បិទទ្វារ នៅ ទីក្រុងសិនចិន សហរដ្ឋអាមេរិក សហភាព អឺរ៉ុប ហើយនិងអង្គការការពារសិទ្ធិមនុស្ស បានទាមទារឲ្យអាជ្ញាធរចិនដោះលែង សកម្មជន ដែលពួកគេបានចាត់ទុកថា ជាជនរងគ្រោះ ដែលព្យាយាមរត់ចេញពីរបបឃោឃៅ នៅ ហុងកុង។
ចុះផ្សាយនៅថ្ងៃ៖
៤ខែក្រោយ ត្រូវឆ្មាំសមុទ្រចិនចាប់ខ្លួន នៅក្នុងពេលធ្វើដំណើរតាមទូក សំដៅកោះតៃវ៉ាន់ សកម្មជនដើម្បី ប្រជាធិបតេយ្យហុងកុង ១០រូប ត្រូវបានតុលាការចិន នៅទីក្រុងស៊ិនចិន ជាប់ទីក្រុងហុងកុង សម្រេច កាត់ទោស ឲ្យជាប់ពន្ធនាគារ ពីបទលួចឆ្លងដែនខុសច្បាប់។ ២នាក់ត្រូវកាត់ទោសឲ្យជាប់ពន្ធនាគារ ពីរ ២ ទៅ ៣ឆ្នាំ ក្នុងបទចោទប្រកាន់ ជាមេគំនិត រៀបចំផែនការ លួចរត់ចេញពីទីក្រុងហុងកុង។ ចំណែក សកម្មជន ៨នាក់ផ្សេងទៀត ដែលជាអ្នកធ្វើដំណើរធម្មតា ត្រូវទទួលទោស ជាប់ពន្ធនាគារ ៧ខែ។ វាជាទោសស្រាល បើប្រៀបធៀបនឹងទោសទណ្ឌដែលមានចែងក្នុងច្បាប់ដែលមាន ពី ជាង ១ឆ្នាំ រហូតដល់៧ឆ្នាំ សម្រាប់អ្នកដែលលួចឆ្លងដែនខុសច្បាប់។ ក្រៅពីទោសជាប់ពន្ធនាគារ សកម្មជនដើម្បី ប្រជាធិបតេយ្យហុងកុង ត្រូវបង់ប្រាក់ពិន័យពី ១២៥០ទៅ ២៥០០អឺរ៉ូ។
សកម្មជនហុងកុង ២រូប ដែលជាអនិតិជន អាយុ ពី ១៦ និង១៧ឆ្នាំ នៅពេលចាប់ខ្លួន ត្រូវបានតុលាការចិនសម្រេចដោះលែង និងត្រូវបានចាប់បញ្ជូនទៅឲ្យអាជ្ញាធរហុងកុង នៅថ្ងៃពុធនេះ ចំណែក សកម្មជន១០រូបផ្សេងទៀត ត្រូវបញ្ជូនទៅជាប់ពន្ធនាគារនៅចិនដីគោក។
តាមសេចក្តីថ្លែងការណ៍របស់អាយ្យការស្រុក យ៉ានធានរបស់ក្រុងស៊ិនចិន រាល់ឧក្រិដ្ឋជនបានទទួលស្គាល់កំហុសរបស់ខ្លួន ដែលអាចធ្វើឲ្យមានការបន្ធូរបន្ថយទោសលើកនេះ។ ជាក់ស្តែង អាជ្ញាធរចិន បានស្តីបន្ទោសសកម្មជនដើម្បី ប្រជាធិបតេយ្យហុងកុង ពីបទធ្វើដំណើរចាកចេញពីហុងកុង ដោយគ្មានការសុំអនុញ្ញាតិពីអាជ្ញាធរ។ តាមច្បាប់ អ្នកដែល ចង់ចាកចេញពីហុងកុង ត្រូវមានលិខិតពិសេស ហើយត្រូវធ្វើដំណើរតាមច្រកចូលស្របច្បាប់។
ប៉ុន្តែ នៅ ថ្ងៃទី ២៣សីហា សកម្មជនហុងកុង ១២រូប ដែលខ្លាចប្រឈមនឹងការចាប់ខ្លួន ដោយសារការអនុវត្តច្បាប់ ការពារសន្តិសុខជាតិហុងកុង បានលួចធ្វើដំណើរតាមទូក សំដៅ កោះតៃវ៉ាន់។ កោះតៃវ៉ាន់ ដែល បានបើកដៃ ទទួលសកម្មជនហុងកុង ដែលចង់រត់គេចចេញពី ហុងកុង នៅក្រោយទីក្រុងប៉េកាំង ចាប់អនុវត្តច្បាប់ ការពារសន្តិសុខជាតិ។
ក្នុងចំណោមសកម្មជនហុងកុងដែលត្រូវតុលាការកាត់ទោស ឲ្យជាប់ពន្ធនាគារ នៅថ្ងៃពុធ មានមួយចំនួន នឹងត្រូវប្រឈមនឹងបទចោទប្រកាន់ ចូលរួមក្នុងបាតុកម្មនៅទីក្រុងហុងកុង កាលពី ឆ្នាំ ២០១៩។ អាចនិយាយបានថា នៅក្រោយ អនុវត្តទោស ជាប់ពន្ធនាគារនៅ ចិនដីគោក ពួកគេនឹងត្រូវប្រឈមនឹងការកាត់ទោស ទៅតាមច្បាប់សន្តិសុខជាតិហុងកុង មួយជាន់ទៀត។ ជាក់ស្តែង អនិតិជន ២រូបដែលត្រូវតុលាការចិនដោះលែង នៅថ្ងៃនេះ នឹងត្រូវបញ្ជូនទៅឲ្យប៉ូលិសហុងកុង ដែលបានចោទប្រកាន់ពួកគេរួចហើយ ពីបទ ឃុបឃិត ប្រព្រឹត្តអំពើហិង្សា ដុត បំផ្លាញ និងមានអាវុធគ្រឿងផ្ទុះ នៅក្នុងពេលបាតុកម្ម កាលពីឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ