ប៉េកាំង បិទការផ្សាយរបស់ទូរទស្សន៍អង់គ្លេសBBC នៅប្រទេសចិន
អាជ្ញាធរចិនបានសម្រេចបិទការផ្សាយរបស់ទូរទស្សន៍អង់គ្លេស BBC នៅថ្ងៃព្រហស្បតិ៍ ម្សិលមិញ នៅក្នុងហេតុផលថា ខ្លឹមសារផ្សាយរបស់ទូរទស្សន៍ព័ត៌មានអន្តរជាតិមួយនេះ រំលោភធ្ងន់ធ្ងរ សេចក្តីណែនាំដែលកំពុងចូលជាធរមាននៅប្រទេសចិន។ សេចក្តីសម្រេចរបស់អាជ្ញាធរគ្រប់គ្រងប្រព័ន្ធផ្សព្វផ្សាយចិន ធ្វើឡើងនៅមួយសប្តាហ៍ក្រោយ អាជ្ញាធរអង់គ្លេស ដកអាជ្ញាបណ្ណ ពីទូរទស្សន៍ជាតិចិន China Global Television Network ក្នុងបទចោទប្រកាន់ថា ជាឧបករណ៍ឃោសនារបស់បក្សកុម្មុយនិស្តចិន។
ចុះផ្សាយនៅថ្ងៃ៖
ស្តាប់ - ០២:៣៣
ភាពតានតឹងចិន អង់គ្លេស បានកើនឡើងមួយកម្រិតទៀត បន្ទាប់ពី អាជ្ញាធរគ្រប់គ្រងប្រព័ន្ធផ្សព្វផ្សាយចិន បានសម្រេចបិទការផ្សាយរបស់ទូរទស្សន៍អង់គ្លេស BBC នៅប្រទេសចិន។ នៅក្នុងសេចក្តីប្រកាសព័ត៌មានកាលពី ថ្ងៃព្រហស្បតិ៍ អាជ្ញាធរគ្រប់គ្រងសោតទស្សន៍ចិន បានវាយតម្លៃថា ទូរទស្សន៍អង់គ្លេសបានរំលោភគោលការណ៍ របស់ចិន ដែលនៅក្នុងនោះ ព័ត៌មានត្រូវតែពិត ត្រឹមត្រូវ និងមិនត្រូវប៉ះពាល់ ធ្វើឲ្យខូចប្រយោជន៍របស់ចិន។
រដ្ឋមន្រ្តីការបរទេសអង់គ្លេសលោកDominic Raab បានបរិហារិះគន់ ការសម្រេចចិត្តរបស់ចិនដែលប៉ះពាល់ខ្លាំងដល់សិទ្ធិសេរីភាពសារព័ត៌មាន។ ចំណែកអ្នកនាំពាក្យរបស់ទូរទស្សន៍BBC បានសំដែងការខកចិត្ត ព្រោះថា BBC ជាទូរទស្សន៍ផ្សព្វផ្សាយព័ត៌មានអន្តរជាតិ ដែល គួរឲ្យជឿទុកចិត្តជាងគេនៅក្នុងពិភពលោក។ ទូរទស្សន៍ BBCផ្សព្វផ្សាយគ្រប់ព័ត៌មានដែលកើតមាននៅក្នុងពិភពលោក ដោយប្រកាន់ខ្ជាប់ ស្មារតីស្មោះត្រង់ មិនលំអៀង គ្មានខ្លាចរអា ខ្លបខ្លាច ឬផ្តល់ប្រយោជន៍ដល់ភាគីណាមួយនោះទេ។
ការសម្រេចបិទការផ្សាយរបស់ទូរទស្សន៍ BBCកើតឡើងនៅមួយសប្តាហ៍ក្រោយអាជ្ញាធរអង់គ្លេស សម្រេចដកអាជ្ញាប័ណ្ណពីទូរទស្សន៍ចិន ដែលផ្សាយនៅទឹកដីអង់គ្លេស ដែលរដ្ឋាភិបាលអង់គ្លេស ចោទប្រកាន់ថា ជាប្រព័ន្ធឃោសនារបស់បក្សកុម្មុយនិស្តចិន។ មួយវិញទៀត វាកើតឡើង នៅក្រោយ ទូរទស្សន៍អង់គ្លេស ចុះផ្សាយ បទយកការណ៍ស៊ើបអង្កេត ដ៏គួរឲ្យរំខានមួយ សម្រាប់ទីក្រុងប៉េកាំង ដែលនៅក្នុងនោះ សាក្សីបាននិយាយពីការធ្វើទារុណកម្ម ការរំលោភជាប្រព័ន្ធ របស់ប៉ូលិស អ្នកយាមចិន ទៅលើស្រ្តី អ៊ុយហ្គួរ នៅក្នុងមណ្ឌលឃុំឃាំងនៅខេត្តស៊ីនជាំង។
ទូរទស្សន៍ BBC ឧស្សាហ៍ចុះផ្សាយសាក្ខីកម្មជាច្រើនរបស់ជនជាតិអ៊ុយហ្គួរ ដែលនិយាយពីការធ្វើទុក្ខបុកម្នេញ នយោបាយលុបបំបាត់ សាសនា និងវប្បធម៌របស់ជនជាតិអ៊ុយហ្គួរ នៅ ស៊ីនជាំង។ ការផ្តោតផ្សាយច្រើនរបស់ទូរទស្សន៍អង់គ្លេស ទៅលើសំណុំរឿងអ៊ុយហ្គួរ នៅស៊ីនជាំងមិនបានធ្វើឲ្យចិនសប្បាយចិត្តនោះទេ។
នៅថ្ងៃ ទី៤កុម្ភៈកន្លងទៅ អាជ្ញាធរចិនបានដំឡើងសំឡេងដាក់ទូរទស្សន៍ BBC នៅក្រោយ មានសេចក្តីរាយការណ៍ព័ត៌មានដែលថា អាជ្ញាធរចិនព្យាយាមលាក់បាំង មិនចង់ឲ្យគេដឹងពីប្រភពកើតមានជំងឺកូវីដ នៅប្រទេសចិន។
គេមិននៅមិនទាន់ដឹងថា តើការហាមប្រាមរបស់អាជ្ញាធរសោតទស្សន៍ចិន នឹងប៉ះពាល់ប៉ុណ្ណា ដល់ការផ្សាយរបស់ទូរទស្សន៍ BBCនៅប្រទេសចិននោះទេ។ នៅមុនការបិទការផ្សាយរបស់អាជ្ញាធរចិន ទូរទស្សន៍ BBCគ្មានមុខក្នុងបណ្តាញផ្សព្វផ្សាយនៅប្រទេសចិនពោល គឺគេអាចមើលប៉ុស្ត BBCបានតែនៅតាមសណ្ឋាគារអន្តរជាតិតែប៉ុណ្ណោះ។ ផលវិបាកនឹងមានធំ នៅទីក្រុងហុងកុង ដែលធ្លាប់ជាដែនដីអាណានិគមរបស់អង់គ្លេស។ នៅថ្ងៃសុក្រទី ១២ កុម្ភៈ ក្រុមហ៊ុនទូរទស្សន៍ វិទ្យុRTHK ដែលជាក្រុមហ៊ុនឯករាជ្យនៅ ហុងកុង ប៉ុន្តែ ដែលបានថវិកាពី រដ្ឋបាលក្រុងហុងកុងបានសម្រេចផ្អាកការផ្សាយរបស់វិទ្យុ BBC នៅទីក្រុងហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ