អង់គ្លេសចាត់វិធានការប្រឆាំងចិនដើម្បីបុព្វហេតុជនជាតិភាគតិចអ៊ុយហ្គួនៅខេត្តស៊ីនជាំង
នៅថ្ងៃអង្គារ ទី១២ មករា ប្រមុខការទូតអង់គ្លេសលោកដូមីនិច រ៉ាបបានបង្ហាញចេញនូវវិធានការមួយចំនួនប្រឆាំងចិនដែលបានប្រើកម្លាំងពលកម្មដោយបង្ខំរបស់ជនជាតិភាគតិចអ៊ុយហ្គួ។ កម្មវត្ថុរបស់លោករ៉ាប គឺទប់ស្កាត់កុំឲ្យទំនិញចិនដែលប្រើកម្លាំងពលកម្មរបស់ពួកអ៊ុយហ្គួធ្លាក់ក្នុងដៃអ្នកប្រើប្រាស់អង់គ្លេស។ ទន្ទឹមគ្នានេះ វិធានការរបស់ប្រមុខការទូតអង់គ្លេសក៏គ្រោងនឹងដាក់ទណ្ឌកម្មចាស់ដៃលើរោងចក្រ សហគ្រាសអង់គ្លេសណាដែលមានជាប់ពាក់ព័ន្ធដោយផ្ទាល់ ឬដោយប្រយោលនឹងកម្លាំងពលកម្មដោយបង្ខំរបស់ជនជាតិភាគតិចចិនអ្នកកាន់សាសនាអ៊ីស្លាមក្នុងខេត្តស៊ីនជាំងមួយនេះ។
ចុះផ្សាយនៅថ្ងៃ៖
ស្តាប់ - ០២:៣៩
គឺនៅចំពោះមុខក្រុមសមាជិកសភាដែលប្រមុខការទូតអង់គ្លេសលោកដូមីនិច រ៉ាបបានចាត់ទុកទង្វើមួយចំនួនរបស់រដ្ឋាភិបាលចិនទៅលើពួកអ៊ុយហ្គួជាអំពើឃោរឃៅព្រៃផ្សៃ និងអមនុស្សធម៌។ ទង្វើទាំងនោះរួមមាន ការឃុំឃាំងក្រៅប្រព័ន្ធតុលាការ ការអប់រំនយោបាយ ការចាប់បង្ខំឲ្យធ្វើការងារ ការធ្វើទារុណកម្ម និងការចាប់ក្រៀវដោយបង្ខំជាលក្ខណៈឧស្សាហកម្ម។ តាមលោកដូមីនិច រ៉ាប ប្រឈមនឹងការរំលោភសិទ្ធិមនុស្សដោយកម្រោល និងមិនអាចទទួលយកបាននេះ អង់គ្លេសមានកាតព្វកិច្ចសីលធម៌ដើម្បីចាត់វិធានការប្រឆាំង។ នៅក្នុងវិធានការ លោករ៉ាបបានហាមរោងចក្រ សហគ្រាសអង់គ្លេសមិនឲ្យចូលរួមនៅក្នុងសង្វាក់ផ្គត់ផ្គង់ដែលនាំដល់ការប្រើកម្លាំងពលកម្មដោយបង្ខំរបស់ពួកអ៊ុយហ្គួ។
លោករ៉ាបចង់ធានាថា ផលិតផលដែលបានមកពីការប្រើកម្លាំងពលកម្មដោយបង្ខំរបស់ពួកអ៊ុយហ្គួនឹងមិនធា្លក់ចូលទីផ្សារ និងធ្លាក់ក្នុងដៃអតិថិជនអង់គ្លេសទេ។ វិស័យនាំចូល និងវិស័យនាំចេញណាដែលមានជាប់ពាក់ព័ន្ធនឹងកម្លាំងពលកម្មដោយបង្ខំរបស់ពួកអ៊ុយហ្គួនឹងត្រូវហាមឃាត់។ តាមប្រមុខការទូតអង់គ្លេសរូបនេះដដែល វិធានការមួយនេះក៏នឹងអនុវត្តទៅលើវិស័យសាធារណៈដែរ ហើយរោងចក្រ សហគ្រាសណាដែលទទួលបានផលពីកម្លាំងពលកម្មដោយបង្ខំនឹងត្រូវដកចេញពីទីផ្សារសាធារណៈ។ តាមលោករ៉ាប រោងចក្រ សហគ្រាសណាដែលបំពានលើគោលការណ៍នេះនឹងត្រូវផាកពិន័យជាប្រាក់។
តែក្រុមអ្នកតំណាងរាស្រ្តអង់គ្លេសខ្លះមកពីគណបក្សប្រឆាំង និងគណបក្សកាន់អំណាចយល់ឃើញថា វិធានការរបស់រដ្ឋាភិបាលពេលនេះនៅមិនទាន់គ្រប់គ្រាន់ទេ។ អ្វីដែលពួកគេចង់បានបន្ថែម គឺចង់ឲ្យរដ្ឋាភិបាលអង់គ្លេសដាក់ទណ្ឌកម្មប្រឆាំងនឹងថ្នាក់ដឹកនាំចិនក្នុងខេត្តស៊ីនជាំង។ យ៉ាងណាក៏ដោយ វិធានការប្រឆាំងចិនរបស់អង់គ្លេសពេលនេះនឹងធ្វើឲ្យទំនាក់ទំនងរវាងក្រុងឡុងដ៏ និងក្រុងប៉េកាំងដែលកំពុងតានតឹងស្រាប់រឹតតែឡើងតានតឹងមួយកម្រិតទៀត។ នៅមានសំណុំរឿងពីរទៀតដែលចិនកំពុងក្តៅក្រហាយនឹងអង់គ្លេស ទី១ គឺការដែលអង់គ្លេសបានប្រឆាំងចិនពាក់ព័ន្ធនឹងច្បាប់សន្តិសុខជាតិដែលចិនដាក់លើហុងកុង និងទី២ គឺការដែលអង់គ្លេសបានសម្រេចមិនបំពាក់ប្រព័ន្ធទូរស័ព្ទ ៥G របស់ក្រុមហ៊ុនចិន Huawei។
គួររម្លឹកថា ចិនបានជាប់ចោទពីបទឃុំឃាំងជនជាតិភាគតិចអ៊ុយហ្គួជាង ១លាននាក់នៅក្នុងជំរំលត់ដំមួយដ៏ធំ។ តែចិនតែងចេញមុខបដិសេធ និងបញ្ជាក់ច្រើនដងថា ជំរំនោះមិនមែនជាជំរំលត់ដំស្អីទេ តែជាមជ្ឈមណ្ឌលអប់រំវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ