ក្រុមប្រឹក្សាសិទ្ធិមនុស្សអន្តរជាតិ៖ស្ថានការសិទ្ធិមនុស្សនៅស្រីលង្កាកំពុងធ្លាក់ចុះ
នៅថ្ងៃអង្គារ ទី២៣ មីនា ក្រុមប្រឹក្សាសិទ្ធិអន្តរជាតិបានអនុម័តលើសេចក្តីសម្រេចមួយដោយបានទាញសញ្ញាអាសន្នពីស្ថានភាពសិទ្ធិមនុស្សកំពុងធ្លាក់ចុះនៅក្នុងប្រទេសស្រីលង្កា និងកំណើនគំនាបលើក្រុមជនជាតិភាគតិច។ សេចក្តីសម្រេចដែលជាសំណើរបស់ប្រទេសអង់គ្លេសទទួលបានការគំាំទ្រពីក្រុមប្រទេសអឺរ៉ុប និងសហរដ្ឋអាមេរិក។ នៅក្នុងសេចក្តីសម្រេចដដែល ក្រុមប្រឹក្សាសិទ្ធិមនុស្សបានស្នើឲ្យរដ្ឋាភិបាលក្រុងកូឡុំបូពិនិត្យមើលឡើងវិញលើច្បាប់ប្រឆាំងភេរវកម្មដែលប្រធានាធិបតីស្រីលង្កាលោករ៉ាយ៉ាប៉ាក់សេទើបបានប្រកាសដាក់ឲ្យប្រើប្រាស់កាលពីសប្តាហ៍កន្លងទៅ។ ស្រីលង្កាបានច្រានចោលសេចក្តីសម្រេចនេះដោយចាត់ទុកជាសេចក្តីសម្រេចមិនសមហេតុផល។
ចុះផ្សាយនៅថ្ងៃ៖
ស្តាប់ - ០២:៤៥
នៅក្នុងសេចក្តីសម្រេចដែលបានអនុម័តដោយសំឡេងគាំទ្រចំនួន ២២សំឡេង សំឡេងប្រឆាំងចំនួន ១១សំឡេង និងសំឡេងអនុបវាទចំនួន ១៤សំឡេង ក្រុមប្រឹក្សាសិទ្ធិមនុស្សអន្តរជាតិបានសម្តែងក្តីបារម្ភជាពន់ពេកចំពោះនិន្នាការដែលបានសង្កេតឃើញក្នុងឆ្នាំ ២០២០ កន្លងទៅ។ និន្នាការដែលក្រុមប្រឹក្សាសិទ្ធិមនុស្សអន្តរជាតិចង់និយាយរួមមាន ការបំបាត់ភាពឯករាជ្យនៃប្រព័ន្ធតុលាការ ការបង្កើនគំនាបលើក្រុមមនុស្សដែលស្ថិតក្នុងសហគមន៍តាមូល និងអ៊ីស្លាម និងការបង្រួញលំហលទ្ធិប្រជាធិបតេយ្យ។ នៅក្នុងន័យនេះ ក្រុមប្រឹក្សាសិទ្ធិមនុស្សអន្តរជាតិបានស្នើឲ្យរដ្ឋាភិបាលក្រុងកូឡុំបូលើកកម្ពស់សេរីភាពសាសនា និងសាសនាចម្រុះនៅក្នុងប្រទេសមួយដែលប្រជាជនភាគច្រើនជាអ្នកកាន់សាសនាព្រះពុទ្ធ។
ទន្ទឹមគ្នានេះ ក្រុមប្រឹក្សាសិទ្ធិមនុស្សអន្តរជាតិក៏បានស្នើឲ្យរដ្ឋាភិបាលស្រីលង្កាពិនិត្យមើលឡើងវិញលើច្បាប់ប្រឆាំងភេរវកម្មដែលលោកប្រធានាធិបតីរ៉ាយ៉ាប៉ាក់សេបានប្រកាសដាក់ឲ្យប្រើប្រាស់កាលពីសប្តាហ៍កន្លងទៅ។ គួររម្លឹកថា ច្បាប់ប្រឆាំងភេរវកម្មនោះបានអនុញ្ញាតឲ្យមានការចាប់ខ្លួនអ្នកណាម្នាក់ដែលជាប់សង្ស័យជាអ្នកទទួលខុសត្រូវនៅក្នុងអំពើហិង្សា ជម្លោះអន្តរសាសនា ជម្លោះអន្តរជាតិពិន្ធុ ឬមួយក៏ជម្លោះអន្តរសហគមន៍។ ក្រុមប្រឹក្សាសិទ្ធិមនុស្សអន្តរជាតិបានមើលឃើញថា សហគមន៍សាសនារបស់ជនជាតិភាគតិចទូទៅ ពិសេសសហគមន៍មូស្លីមដែលបានទទួលរងការគាបសង្កត់ និងរើសអើងស្រាប់បានរងគ្រោះកាន់តែខ្លាំងនៅក្នុងសម័យកូវីដ១៩។
នៅក្នុងសេចក្តីសម្រេចដដែល ក្រុមប្រឹក្សាសិទ្ធិមនុស្សអន្តរជាតិបានសម្រេចចិត្តពង្រឹងសមត្ថភាពរបស់ឧត្តមស្នងការដ្ឋានសិទ្ធិមនុស្សក្នុងការប្រមូល ចងក្រង វិភាគ និងរក្សាទុកនូវព័ត៌មាន ភស្តុតាងស្តីពីការរំលោភបំពានសិទ្ធិមនុស្សដែលប្រព្រឹត្តនៅស្រីលង្កា។ គួររម្លឹកថា អស់រយៈពេល ៣៧ឆ្នាំដែលស្រីលង្កាបានហែកហួរដោយសង្រ្គាមស៊ីវិលរវាងរដ្ឋាភិបាល និងចលនាឧទ្ទាមផ្តាច់ទឹកដីតាមូល។ សង្រ្គាមដែលមានមនុស្សស្លាប់ជាង ១០០ ០០០នាក់មួយនេះបានបិទបញ្ចប់ក្នុងខែឧសភា ឆ្នាំ ២០០៩។ តែនៅប៉ុន្មានខែមុនការបិទបញ្ចប់ មានការប្រយុទ្ធគ្នាយ៉ាងបង្ហូរឈាមរវាងភាគីទាំងពីរ ពិសេសការសម្លាប់រង្គាលលើពួកឧទ្ទាមតាមូល និងជនស៊ីវិលតាមូលពីសំណាក់កងទ័ពរដ្ឋាភិបាលកាលណោះ។
នៅក្នុងរឿងរ៉ាវមួយនេះ ឧត្តមស្នងការសិទ្ធិមនុស្សអន្តរជាតិលោកស្រីមីស្ហែល បាស្ហឺឡេបានស្នើជាលើកទី១ នាដំណាច់ខែមករាកន្លងទៅឲ្យមានការស៊ើបអង្កេតពីតុលាការព្រហ្មទណ្ឌអន្តរជាតិ។ សំណើរបស់លោកស្រីបាស្ហឺឡេត្រូវបានធ្វើឡើងនៅក្នុងរបាយការណ៍មួយកម្រាស់ ១៧ទំព័រដែលលោកស្រីបានទាមទារឲ្យមានការដាក់ទណ្ឌកម្មលើក្រុមជនជាប់ចោទក្នុងបទឧក្រិដ្ឋកម្មសង្រ្គាមនៅក្នុងជួរកងទ័ពរដ្ឋាភិបាល និងនៅខាងពួកឧទ្ទាមតាមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ