សារព័ត៌មានស្រីលង្ការិះគន់ប្រធានអង្គការសិទ្ធិមនុស្សរបស់ អ.ស.ប
ប្រធានអង្គការការពារសិទ្ធិមនុស្សបានបិទបញ្ចប់ដំណើរទស្សនកិច្ចរបស់ខ្លួន នៅទីក្រុងកូឡុំបូ កាលពីថ្ងៃសៅរ៍ទី ៣១ សីហា។ ដំណើរទស្សនកិច្ចរបស់លោកស្រី ណាវី ភីឡៃមិនត្រូវបានទទួលស្វាគមដោយកាសែតក្នុងស្រុកស្រីលង្កាប៉ុន្មានទេ។ នៅថ្ងៃអាទិត្យទី ១ កញ្ញា កាសែតរដ្ឋាភិបាល ស្រីលង្កាបានរិះគន់ ប្រធានអង្គការការពារសិទ្ធិមនុស្សថា មានភាពលំអៀង និងអត្តនោម័ត បន្ទាប់ពីលោកស្រីបានព្រមានថា នៅកោះ ស្រីលង្កា អំណាចផ្តាច់ការត្រូវគេមើលឃើញកាន់តែច្រើនឡើងៗ។
ចុះផ្សាយនៅថ្ងៃ៖
ស្តាប់ - ០២:០៦
កាសែតSunday Observer ដែលជាកាសែតមាននិន្នាការគាំទ្ររដ្ឋាភិបាលបានដាក់ចំណងជើង នៅលើទំព័រមុខរបស់ខ្លួនថា លោកស្រីគ្មានបានផ្លាស់ប្តូរអ្វីបន្តិចទេ។ ត្រង់ចំណុចនេះ កាសែតចង់បញ្ជាក់ថា “លោកស្រីណាវី ភីឡៃមានគំនិតរបស់ខ្លួនរួចហើយ មុនពេលមកដល់ស្រីលង្កា ហើយនៅពេលដែលគាត់ចាកចេញទៅវិញ គាត់នៅតែរក្សាគំនិតនោះរបស់គាត់ដដែល”។
កាសែតរដ្ឋស្រីលង្ការិះគន់ជំហររបស់លោកស្រីណាវី ភីឡៃ បន្ទាប់ពីប្រធានអង្គការសិទ្ធិមនុស្សរូបនេះ សំដែងក្តីព្រួយបារម្ភដែលឃើញប្រទេសស្រីលង្កាមានសញ្ញាដើរទៅរកការដឹកនាំផ្តាច់ការ។
កាលពីថ្ងៃសៅរ៍ ម្សិលមិញ បន្ទាប់ពីបញ្ចប់ការស៊ើបអង្កេតទៅលើការចោទប្រកាន់ស្តីពីបទឧក្រិដ្ឋសង្រ្គាមនៅកោះស្រីលង្កា ប្រធានឧត្តមស្នងការសិទ្ធិមនុស្សរបស់អង្គការសហប្រជាជាតិបានថ្លែងរិះគន់ខ្លាំងនៅក្នុងសន្និសីទកាសែតមួយថា ពួកទាហាន បានប្រើអំណាចរំលោភបំពាន ធ្វើបាប និងគំរាមបំបាត់សំឡេងរបស់អ្នកបង្រៀនគ្រឹស្តសាសនា និងអ្នកកាសែត។
ទស្សនកិច្ចរបស់លោកស្រីណាវី ភីឡៃបានជំរុញឲ្យមានការខឹងសម្បារ និងចលនាប្រឆាំងរបស់ក្រុមប្រជាជន ដែលគាំទ្ររដ្ឋាភិបាល ដែលក្នុងនោះ មានរដ្ឋមន្រ្តីរដ្ឋាភិបាលបីនាក់ផង ដែលបានរិះគន់ តិដៀលរូបសម្បត្តិផ្ទាល់ខ្លួនរបស់ប្រធានអង្គការការពារសិទ្ធិមនុស្ស។ តាមលោកស្រី ភីឡៃ ប្រធានាធិបតីស្រីលង្កាបានចេញមុខសុំទោសរួចហើយ ក្រោយឧប្បត្តិកហេតុលើកនេះ។
នៅក្នុងប្រទេសស្រីលង្កា លោកស្រីប្រធានឧត្តមស្នងការសិទ្ធិមនុស្សរបស់អង្គការសហប្រជាជាតិមានបេសកកម្មស៊ើបអង្កេតអន្តរជាតិលើបទចោទប្រកាន់ ឧក្រិដ្ឋកម្មសង្រ្គាម។ នៅក្រោយសង្រ្គាមស៊ីវិល ដែលមានរយៈពេល៣៧ឆ្នាំ ត្រូវបានបញ្ចប់ កាលពីឆ្នាំ ២០០៩ ដែលក្រុមឧទ្ទាមតាមូល ជាអ្នកចាញ់ ទាហានរដ្ឋាភិបាលត្រូវបានអង្គការសិទ្ធិមនុស្សចោទប្រកាន់ថា ជាអ្នកទទួលខុសត្រូវលើការសម្លាប់ជនស៊ីវិលជាង៤ម៉ឺននាក់។ ចំណែកពួកឧទ្ទាមត្រូវគេចោទប្រកាន់ថា បានយកជនស៊ីវិលធ្វើជាខែល សម្រាប់ទប់ទល់ការវាយប្រហារពីខាងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ