លោកគីមជុងអ៊ុន ប្រៀបធៀបវិបត្តិសេដ្ឋកិច្ចសព្វថ្ងៃទៅនឹងគ្រោះអត់ឃ្លាន នៅទសវត្សរ៍ ទី៩០
មេដឹកនាំកូរ៉េខាងជើង លោកគីម ជុងអ៊ុនបាននិយាយតឿន ជំរុញ ឲ្យបក្សពលករកូរ៉េខាងជើង ខំប្រឹងធ្វើការខ្លាំងជាងមុន និងធ្វើពលិកម្ម សម្រាប់ប្រជាជន។ នៅក្នុងឱកាសថ្លែងបិទសន្និសីទ ដែលរៀបចំឡើងសម្រាប់មន្រ្តីបក្សពលករកូរ៉េខាងជើង កាលពីថ្ងៃព្រហស្បតិ៍ ទី៨មេសា មេដឹកនាំកូរ៉េខាងជើង បានលើកឡើងជាលើកទី១ពីវិបត្តិគ្រោះអត់ឃ្លានកាលពីទសវត្សរ៍ ឆ្នាំ ៩០ ដើម្បី និយាយប្រៀបធៀប ដល់វិបត្តិសេដ្ឋកិច្ចដែល កូរ៉េខាងជើង កំពុងជួបប្រទះសព្វថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:៥៥
នៅក្នុងសន្និសីទ នៅថ្ងៃព្រហស្បតិ៍ មេដឹកនាំកូរ៉េខាងជើង លោកគីម ជុងអ៊ុន បានជំរុញឲ្យអ្នកទទួលខុសត្រូវគ្រប់ជាន់ថ្នាក់របស់ បក្សកុម្មុយនិស្ត សកម្មជាងមុន និង អនុវត្តផែនការសេដ្ឋកិច្ចថ្មី រយៈពេល៥ឆ្នាំ ដែលមហាសន្និបាតរបស់បក្សបានសម្រេច កាលពីខែ មករាដើមឆ្នាំនេះ។
តាមសេចក្តីរាយការណ៍របស់ទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA ថ្លែងទៅកាន់មន្រ្តីគ្រប់ជាន់ថ្នាក់របស់បក្សពលករកូរ៉េខាងជើង រាប់ពាន់នាក់ លោកគីម ជុងអ៊ុនបាននិយាយថា លោកបានសម្រេចចិត្តស្នើសុំឲ្យបក្សពលករកូរ៉េខាងជើង អនុវត្ត “Marché Forcée” ឬដំណើរបង្ខំ ដែលលំបាកជាងមុន ដើម្បីសម្រាលបន្ទុករបស់ប្រជាជន។
“ដំណើរបង្ខំ” ជាពាក្យដែលអ្នកទទួលខុសត្រូវកូរ៉េខាងជើង ធ្លាប់ ប្រើសម្រាប់ប្រមូលផ្តុំ កម្លាំង ប្រជាជនកូរ៉េខាងជើង នៅក្នុងសម័យដែលប្រទេសស្គាល់គ្រោះអត់ឃ្លានខ្លាំង ក្នុងទសវត្សរ៍ ឆ្នាំ ១៩៩០។
នៅថ្ងៃបើកសន្និសីទកាលពីថ្ងៃអង្គារ មេដឹកនាំកូរ៉េខាងជើងបាននិយាយថា ប្រទេសរបស់លោកកំពុងប្រឈមនឹងស្ថានភាពអាក្រក់ ដែលបណ្តាលមកពី កត្តាច្រើនយ៉ាងដូចជា វិបត្តិកូវីដ ១៩ ទណ្ឌកម្មសេដ្ឋកិច្ចដែលដឹកនាំដោយអាមេរិក ហើយនិងគ្រោះមហន្តរាយធម្មជាតិ កាលពីខែ ពាក់កណ្តាលឆ្នាំមុន។ ប៉ុន្តែ នេះជាលើកទី ១ ដែលមេដឹកនាំកូរ៉េខាងជើង និយាយប្រៀបធៀបស្ថានភាពសេដ្ឋកិច្ច របស់កូរ៉េខាងជើងបច្ចុប្បន្ន ទៅនឹង គ្រោះទុរ្ភិក្ស ដែលបានសម្លាប់មនុស្ស ប្រមាណ ៣លាននាក់ នៅកូរ៉េខាងជើង។ គ្រោះទុរ្ភិក្ស ដែលកើតឡើង ដោយសារ ការដួលរលំសហភាពសូវៀត ដែលជាជំហរបង្អែកខ្លាំងរបស់កូរ៉េខាងជើង។
នៅក្នុងមហាសន្និបាតរបស់បក្ស នៅខែមករា មេដឹកនាំកូរ៉េខាងជើង ធ្លាប់បានបញ្ជាឲ្យមន្រ្តីរដ្ឋាភិបាលពង្រឹងសេដ្ឋកិច្ច បង្កើនការផលិតក្នុងស្រុក ដោយកាត់បន្ថយការនាំចូល។ ប៉ុន្តែ តាមអ្នកជំនាញ បញ្ហារបស់កូរ៉េខាងជើង សព្វថ្ងៃគឺជាលទ្ធផលនៃការគ្រប់គ្រងមិនបានល្អ កន្លងមក ការដាក់ខ្លួនឲ្យនៅឯកោរ ហើយនិងទណ្ឌកម្មសេដ្ឋកិច្ចអន្តរជាតិដោយសារកម្មវិធីផលិតអាវុធនុយក្លេអ៊ែរ។
វិបត្តិសេដ្ឋកិច្ចកូរ៉េខាងជើង កាន់តែធ្លាក់ធ្ងន់ធ្ងរ មួយកម្រិតទៀត ដោយសារវិធានការបិទខ្ទប់ព្រំដែនទាំងស្រុង រួមទាំងជាមួយប្រទេសចិន ដើម្បីទប់ស្កាត់ការឆ្លងជំងឺកូវីដ។ ការណ៍នេះធ្វើឲ្យ ការនាំចេញរបស់ចិន ទៅកូរ៉េខាងជើង បានធ្លាក់ថយចុះ៨០%នៅឆ្នាំ ២០២០។ សម្រាប់អ្នកជំនាញ ដោយមើលទៅលើប្រព័ន្ធសុខាភិបាល ខ្សត់ខ្សោយ របស់ខ្លួន កូរ៉េខាងជើង គ្មានជំរើសអ្វីផ្សេង ក្រៅពីបិទព្រំដែន ដើម្បីទប់ស្កាត់ការឆ្លងរាលដាលជំងឺកូវីដក្នុងប្រទេសនោះទេ។
ទោះមេដឹកនាំកូរ៉េខាងជើង បានលើកឡើងពីវិបត្តិសេដ្ឋកិច្ចដ៏ធ្ងន់ធ្ងរ ដូចកាលទសវត្សរ៍ ឆ្នាំ ១៩៩០ ប៉ុន្តែគេមិនបានឃើញសញ្ញាថា កូរ៉េខាងជើងនឹងអាចជួបគ្រោះអត់ឃ្លាននោះទេ។ នៅក្នុងសំបុត្រ ឆ្លងឆ្លើយ រវាង លោកគីមជុងអ៊ុន និងប្រធានាធិបតីចិន កាលពីខែមីនមុន លោកស៊ី ធ្លាប់បានសន្យាថា នឹងធ្វើឲ្យប្រជាជនរបស់ប្រទេសទាំងពីរ មានជីវភាពល្អប្រសើរឡើង។ ប្រទេសចិន ដែលជាសម្ព័ន្ធមិត្តសំខាន់ របស់ព្យុងយ៉ាង នឹងមិនបណ្តោយឲ្យមានរឿងនេះកើតឡើងនោះទេ ព្រោះថា បើកូរ៉េខាងជើង ជួបគ្រោះទុរ្ភិក្ស នោះ ចិននឹងពិបាក គ្រប់គ្រង ទប់ លំហូរចូល ប្រជាជនកូរ៉េខាងជើង ក្នុងទឹកដីរបស់ខ្លួន។
ថ្មីៗនេះ ក្រុមអ្នកជំនាញឯករាជ្យទទួលបន្ទុកតាមដាន ការដាក់ទណ្ឌកម្មរបស់អង្គការសហប្រជាជាតិ បានបង្ហាញថា ក្រុមផ្តល់ជំនួយពិបាកនឹងចូលទៅជួយស្រ្តី និងកុមារ ដែលកំពុងជួបការលំបាក នៅកូរ៉េខាងជើង ដោយសារវិធានការបិទខ្ទប់ប្រទេស។
ប៉ុន្តែ មន្រ្តីទទួលខុសត្រូវរបស់ក្រសួងសុខាភិបាលកូរ៉េខាងជើងម្នាក់ បាននិយាយនៅថ្ងៃអង្គារថា គ្មានកុមារកូរ៉េខាងជើងដែលខ្វះអាហារូបត្ថម្ភនោះទេ និងថា របាយការណ៍របស់អ្នកជំនាញខាងលើ បង្កើតឡើងដើម្បីបំផ្លាញរូបភាពកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ