បទឈប់បាញ់ចប់ភ្លាម កងទ័ពអាហ្វហ្កានីស្ថាន និងតាលីបង់ចាប់ប្រយុទ្ធគ្នាវិញភ្លាម
គោរពពេលវេលាបានយ៉ាងទៀងទាត់។ គ្រាន់តែ បទឈប់បាញ់ ចប់នៅត្រឹមយប់ថ្ងៃសៅរ៍ ក្រុមតាលីបង់ និងកងទ័ពរដ្ឋាភិបាលអាហ្វហ្កានីស្ថាន បានចាប់ប្រយុទ្ធគ្នា ឡើងវិញ នៅព្រឹកថ្ងៃអាទិត្យនេះ។ នៅអាហ្វហ្កានីស្ថាន នៅក្នុង អំឡុងបទឈប់បាញ់ រយៈពេលបីថ្ងៃ ដែលបង្កើតជាពិសេស សម្រាប់ពិធីបុណ្យតមអាហាររបស់អ្នកកាន់សាសនាអ៊ីស្លាម គេឃើញកើតមានភេរវកម្មបំផ្ទុះគ្រាប់បែក កាលពីថ្ងៃ សុក្រ ដែលបានសម្លាប់អ៊ីស្លាមសាសនិក ១២នាក់។ នៅថ្ងៃសៅរ៍ ម្សិលមិញ ក្រុមជីហាតរដ្ឋអ៊ីស្លាម បានចេញមុខ ប្រកាសទទួលស្គាល់ថា ជាស្នាដៃ របស់ក្រុមខ្លួន។
ចុះផ្សាយនៅថ្ងៃ៖
ស្តាប់ - ០២:៣៥
ប្រជាជនអាហ្វហ្កានីស្ថាន ត្រូវប្រឈមនឹងវិនាសកម្ម ភេរវកម្ម សម្លាប់បង្ហូរឈាម សឹងរាល់ថ្ងៃ។ ថ្វីត្បិតថា ភាគីជម្លោះ ទាំងពីរ គឺ រដ្ឋាភិបាលអាហ្វហ្កានីស្ថាន និងក្រុមឧទ្ទាមតាលីបង់ ប្រកាស បទឈប់បាញ់ រយៈពេល ៣ថ្ងៃ សម្រាប់ បិទបញ្ចប់ពិធីបុណ្យតមអាហារ របស់អ្នកកាន់សាសនាអ៊ីស្លាម ប៉ុន្តែ ភេរវកម្មសម្លាប់មនុស្សនៅតែបន្តកើតមាន។
នៅថ្ងៃសៅរ៍ ម្សិលមិញ ក្រុមជីហាតរដ្ឋអ៊ីស្លាម ដែលធ្លាប់សកម្ម និងគ្រប់គ្រងទឹកដីមួយផ្នែកធំរបស់ស៊ីរី និងអ៊ីរ៉ាក់កន្លងមក បានចេញមុខ អះអាងថា ក្រុមខ្លួន ជាអ្នកបំផ្ទុះ គ្រាប់បែកក្នុងវិហារអ៊ីស្លាម នៅជាយក្រុងកាប៊ូល កាលពីថ្ងៃសុក្រ ដោយបានសម្លាប់មនុស្ស ១២នាក់។
ផ្ទុយពីក្រុមជីហាតរដ្ឋអ៊ីស្លាម ក្រុមតាលីបង់ និងកងទ័ពរដ្ឋាភិបាលអាហ្វហ្កានីស្ថាន បានគោរពខ្ជាប់ខ្ជួន បទឈប់បាញ់ រយៈពេល៣ថ្ងៃ ដែលភាគីបានប្រកាសកាលពីថ្ងៃចន្ទ និងដែលត្រូវបញ្ចប់នៅយប់ថ្ងៃ សៅរ៍ម្សិលមិញ។ ប៉ុន្តែ នៅព្រឹកថ្ងៃអាទិត្យ ពោលគឺនៅតែប៉ុន្មានម៉ោង ក្រោយ បទឈប់បាញ់ ចប់ អស់សុពលភាព ភាគីទាំងពីរ ក៏ចាប់កាន់អាវុធ ប្រយុទ្ធគ្នាឡើងវិញ។
តាមអ្នកនាំពាក្យរបស់កងទ័ពអាហ្វហ្កានីស្ថាន ការប្រយុទ្ធ បាញ់បោះដាក់គ្នា បានចាប់ផ្តើមឡើង នៅព្រឹកថ្ងៃអាទិត្យ ទី ១៦ ឧសភា នៅភាគខាងត្បូង អាហ្វហ្កានីស្ថាន។ ប្រធានក្រុមប្រឹក្សាខេត្ត Helmand បាននិយាយថា ពួកតាលីបង់ បានចាប់វាយប្រហារ ទីតាំងត្រួតពិនិត្យ ជាច្រើន នៅជុំវិញ ខេត្តរបស់លោក។ អ្នកនាំពាក្យរបស់តាលីបង់ វិញ បានរុញច្រានចោលការចោទប្រកាន់ ដោយថា កងទ័ពរដ្ឋាភិបាលជាអ្នកចាប់ផ្តើមមុន ដូច្នេះ មិនត្រូវទម្លាក់កំហុសមកលើក្រុមតាលីបង់នោះទេ។
នៅក្នុងអំឡុងបទឈប់បាញ់ រយៈពេល ៣ថ្ងៃ អ្នកតំណាងរបស់ក្រុមតាលីបង់ និងរដ្ឋាភិបាល អាហ្វហ្កានីស្ថាន បានធ្វើដំណើរទៅប្រទេសកាតា និងបាននិយាយចុះសម្រុងគ្នាថា នឹងបន្ត ការចរចាស្វែងរកសន្តិភាព ដែលបានជាប់គាំង អស់រាប់ខែមកហើយនោះ។
នៅមុន ក្រុមតាលីបង់ និងរដ្ឋាភិបាលអាហ្វហ្កានីស្ថាន ប្រកាសបទឈប់បាញ់ សម្រាប់បុណ្យតមអាហាររបស់អ្នកកាន់សាសនាអ៊ីស្លាម លើកនេះ អំពើហិង្សា ការវាយប្រហារភេរវកម្ម កើតមានកាន់តែច្រើន និង សឹងតែរាល់ថ្ងៃ ក្នុងទឹកដីអាហ្វហ្កានីស្ថាន ពោល គឺចាប់តាំងពីថ្ងៃ ទី ១ឧសភា ថ្ងៃដែលអាមេរិករបស់លោកដូណាល់ ត្រាំ សន្យាដកទ័ពទាំងអស់ចេញពីអាហ្វហ្កានីស្ថាន។
អាមេរិក ក្រោមអាណត្តិដឹកនាំរបស់លោកចូ បៃដិន ហើយនិងប្រទេសផ្សេងទៀត របស់អង្គការអូតង់ បានសន្យាដកទ័ពរបស់ខ្លួន បន្តិចម្តងៗ និង ឲ្យអស់ទាំងស្រុង នៅថ្ងៃទី ១១កញ្ញា ចំខួប ២០ឆ្នាំ នៃភេរវកម្មវាយប្រហារក្រុងញូវយ៉កឆ្នាំ ២០០១។ ប៉ុន្តែ នៅប៉ុន្មានខែចុងក្រោយនេះ ក្រុមឧទ្ទាមតាលីបង់ សម្រុកខិតចូល និងឡោមព័ទ្ធទីក្រុងជាច្រើនរបស់អាហ្វហ្កានីស្ថាន ដែលធ្វើឲ្យគេជឿថា ក្រុមតាលីបង់ ដែលអូតង់ បានអន្តរាគម បណ្តេញចេញពីអំណាច នៅឆ្នាំ ២០០១ កំពុងរង់ចាំឱកាស ឲ្យតែ អូតង់ និងអាមេរិកដកទ័ពទាំងស្រុង ចេញពីអាហ្វហ្កានីស្ថាន ដើម្បី វាយសង្រ្គប់ ដណ្តើមគ្រប់គ្រង ទីក្រុង ប្រទេសអាហ្វហ្កានីស្ថានឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ