ម៉ាឡេស៊ីប្រកាសបិទខ្ទប់ប្រទេស២សប្តាហ៍ ដើម្បីទប់ស្កាត់ការឆ្លងរាលដាលកូវីដ
ធ្លាប់ជាតំបន់ដែលជៀសរួចផុតពីរលកទី១នៃជំងឺឆ្លងរាតត្បាតកូវីដ នៅឆ្នាំមុន បណ្តាប្រទេសសមាជិកអាស៊ាន កំពុងប្រឈមនឹងការកើនឡើងនៃករណីឆ្លងកូវីដ។ ដើម្បី ទប់ស្កាត់ ការឆ្លងរាលដាល រដ្ឋាភិបាលម៉ាឡេស៊ី បានប្រកាសនៅថ្ងៃអង្គារ បិទខ្ទប់ប្រទេស រយៈពេល២សប្តាហ៍ ចំណែក វៀតណាមឯណោះវិញទើបបានសម្រេចផ្អាក ជើងហោះហើរ អន្តរជាតិ មិនឲ្យចុះចតនៅព្រលានយន្តហោះមួយចំនួនរបស់ខ្លួន ក្នុងរយៈពេល ១សប្តាហ៍។
ចុះផ្សាយនៅថ្ងៃ៖
ស្តាប់ - ០២:៤៨
ដូចប្រទេសសមាជិកអាស៊ានមួយចំនួន ដែលកំពុងរងគ្រោះ ដោយសាររលកឆ្លងថ្មី នៃជំងឺកូវីដ ម៉ាឡេស៊ី កំពុងប្រឈមនឹងការកើនឡើងខ្លាំងនៃចំនួនអ្នកឆ្លងកូវីដ នៅប៉ុន្មានថ្ងៃចុងក្រោយនេះ។ នៅថ្ងៃអង្គារ ចំនួនអ្នកឆ្លងកូវីដថ្មី នៅម៉ាឡេស៊ី មានប្រមាណ ៦ពាន់នាក់ ក្នុងរយៈពេលតែ១ថ្ងៃ ដែលជាហេតុធ្វើឲ្យម៉ាឡេស៊ី ដែលមានប្រជាជនសរុបតែ ៣២លាននាក់ មានអ្នកឆ្លងជំងឺកូវីដ សរុប ជាង ៥សែន ៧ម៉ឺននាក់។
នៅម៉ាឡេស៊ី ករណីឆ្លងកូវីដកើនឡើងលឿន ដោយសារ កត្តាសំខាន់ពីរ គឺ វត្តមាននៃមេរោគបំប្លែងខ្លួនថ្មី ដែលឆ្លងលឿន ហើយនិង ការជួបជុំគ្នា ដោយគ្មានរក្សាគម្លាត អនាម័យ នៅថ្ងៃបិទបញ្ចប់បុណ្យតមអាហារ របស់អ្នកកាន់សាសនាអ៊ីស្លាម កាលពីឧសភាកន្លងទៅ។
ប្រឈមនឹងការកើនឡើងខ្លាំង នៃករណីឆ្លងកូវីដ រដ្ឋាភិបាលម៉ាឡេស៊ី បានសម្រច កាលពីថ្ងៃអង្គារ បិទខ្ទប់ប្រទេសរយៈពេល ២សប្តាហ៍។ សាលារៀន ភោជនីយដ្ឋាន ត្រូវបិទទ្វារ លើកលែងតែ អាជីវកម្មលក់ទំនិញ ចាំបាច់ ដូចជាចំណីអាហារតែប៉ុណ្ណោះ ដែលត្រូវអនុញ្ញាតឲ្យបើកទ្វារ។ ចំណែក ការដើរចេញក្រៅ ត្រូវរឹតបន្តឹង ជាងមុន បូកផ្សំ នឹងការហាមធ្វើដំណើរ ឆ្លងប្រទេស ដែលរដ្ឋាភិបាលបានសម្រេច ជាច្រើនខែមកហើយ។
វិធានការបិទខ្ទប់ប្រទេសលើកនេះ នឹងប៉ះពាល់សាជាថ្មី អ្នកធ្វើអាជីវកម្មតូចតាច ដែលទាមទារឲ្យរដ្ឋាភិបាលពន្លឿនយុទ្ធនាការចាក់វ៉ាក់សាំង ជាជាង អនុវត្តវិធានការបិទខ្ទប់ប្រទេសតែមួយមុខ។ នៅម៉ាឡេស៊ី ប្រជាជន តិចជាង ៦%បានទទួលវ៉ាក់សាំងបង្ការកូវីដ យ៉ាងហោច ១ដូស។
ប្រឈមនឹងការឆ្លងរាតត្បាតនៃមេរោគកូវីដបំប្លែងខ្លួនថ្មី ម៉ាឡេស៊ី ក៏ដូចប្រទេសអាស៊ានមួយចំនួន ត្រូវគេសង្កេតឃើញថា យឺតយ៉ាវក្នុងយុទ្ធនាការចាក់វ៉ាក់សាំង។ ថៃ ដែលមានប្រជាជនជាង ៦០លាននាក់ មានអ្នកបានទទួលចាក់វ៉ាក់សាំង តែជាង ១លាន ៥សែននាក់។ ដោយសារករណីផ្ទុះឆ្លងរាលដាល នៅក្នុងពន្ធនាគារ ថៃបានរាប់ឃើញមានអ្នកឆ្លងថ្មី ប្រមាណ ៤ពាន់នាក់ ក្នុងមួយថ្ងៃៗ។ វៀតណាមឯណោះវិញ ដែលធ្លាប់ដើរតួជាប្រទេសគំរូ មានអ្នកឆ្លងតិចតួចបំផុត នៅឆ្នាំមុន ដោយមកពីឆាប់បិទព្រំដែន និងតាមដាន អ្នកផ្ទុកមេរោគកូវីដ ក៏ជៀសមិនផុតពីរលកឆ្លងថ្មីនៃជំងឺកូវីដ ដែលមួយភាគធំ គឺបណ្តាលមកមេរោគកូវីដ បំប្លែងខ្លួនថ្មី។ ដើម្បីទប់ស្កាត់ ការឆ្លងរាលដាលជំងឺកូវីដ រដ្ឋាភិបាលវៀតណាម បានសម្រេច នៅដើមសប្តាហ៍នេះ បិទដែនអាកាស មិនឲ្យជើងហោះអន្តរជាតិ ចុះចត នៅព្រលានយន្តហោះ ទីក្រុងធំៗដូចជា ទីក្រុងហូជីមិញជាដើម។
ហ្វីលីពីនដែលរងគ្រោះដោយសារវិបត្តិកូវីដ ខ្លាំងជាងគេក្នុងចំណោមប្រទេសអាស៊ាន បានប្រកាសរឹតបន្តឹង នៅទីក្រុងម៉ានីល តាំងពីខែ មីនា ពោលគឺនៅពេលមន្ទីរពេទ្យហ្វីលីពីន ចាប់ផ្តើមចាល់ ជិតអស់សមត្ថភាព ទទួលយកអ្នកជំងឺកូវីដតទៅទៀត។
ឥណ្ឌូណេស៊ី ដែលរងគ្រោះដោយសារកូវីដខ្លាំងជាងគេនៅឆ្នាំមុន ក៏កំពុងប៉ះពាល់ដោយសាររលកថ្មីនៃជំងឺកូវីដ ដែរ ជាមួយអ្នកឆ្លង ប្រមាណ ៦ពាន់នាក់ ក្នុងមួយថ្ងៃៗ។ អ្វីដែលរដ្ឋាភិបាលឥណ្ឌូណេស៊ី ព្រួយបារម្ភជាងគេ គឺ ខ្លាច ជួបស្ថានភាពដូចម៉ាឡេស៊ី ដោយសារតែការធ្វើដំណើរផ្លាស់ទី និងការជួបជុំ ធ្វើបុណ្យតមអាហាររបស់អ្នកកាន់សាសនាអ៊ីស្លាម កាលពីខែឧសភាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ