កម្ពុជាផ្អាកជើងហោះហើរពីម៉ាឡេស៊ី និងឥណ្ឌូនេស៊ី ក្រោយករណីកូវីដ១៩ក្នុងប្រទេសកើនឡើង
កម្ពុជាផ្អាកជាបណ្តោះអាសន្ននូវជើងហោះហើរពីប្រទេសម៉ាឡេស៊ី និងឥណ្ឌូនេស៊ី មួយរយៈ ចាប់ពីថ្ងៃទី០១ ខែសីហា ឆ្នាំ២០២០ តទៅ។ នេះបើតាមការសម្រេចរបស់គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ ដោយមានការយល់ព្រមពីលោកនាយករដ្ឋមន្ត្រីហ៊ុន សែន កាលពីថ្ងៃទី២៥ ខែកក្កដា។ ការផ្អាកនូវជើងហោះហើរនេះ កើតឡើងក្រោយពីករណីកូវីដ១៩ កើនឡើងគួរឲ្យកត់សម្គាល់នារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:០០
យោងតាមលិខិតរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃទី២៥ ខែកក្កដា បានបញ្ជាក់យ៉ាងដូច្នេះថា ក្នុងរយៈពេលចុងក្រោយចាប់ពីថ្ងៃទី២០ ខែមិថុនា ឆ្នាំ២០២០ ដល់ថ្ងៃទី២៥ ខែកក្កដា ឆ្នាំ២០២០នេះ ក្រសួងសុខាភិបាល សង្កេតឃើញថា មានអ្នកដំណើរតាមជើងហោះហើរមកពីប្រទេសម៉ាឡេស៊ី និងឥណ្ឌូនេស៊ី បានរកឃើញករណីឆ្លងកូវីដ១៩ មានការកើនឡើងគួរឲ្យកត់សម្គាល់។ លិខិតដដែលនេះបញ្ជាក់ថា ចំនួនអ្នកវិជ្ជមាននៃកូវីដ១៩ មាន១០៨នាក់ ក្នុងនោះភាគច្រើនតាមជើងហោះហើរពីប្រទេសម៉ាឡេស៊ី និងឥណ្ឌូនេស៊ី លើអ្នកដំណើរសរុបចំនួន២៣ ៥៦៧នាក់។
លោករដ្ឋមន្ត្រីក្រសួងសុខាភិបាលរូបនេះ បន្តថា ចាប់ពីខែសីហា និងខែកញ្ញា តទៅ ប្រទេសកម្ពុជានឹងមានការឈប់សម្រាកក្នុងពិធីបុណ្យជាតិច្រើនថ្ងៃ ដែលតម្រូវឲ្យយើងបង្កើនការប្រុងប្រយ័ត្នខ្ពស់ក្នុងកិច្ចការការពារការចម្លងកូវីដ១៩។
លោកនាយករដ្ឋមន្ត្រីហ៊ុន សែន នាថ្ងៃអង្គារ ទី២១ ខែកក្កដា ពីខេត្តតាកែវ បានចោទជាសំណួរថា បើរដ្ឋាភិបាលមិនទទួលពលរដ្ឋខ្មែរធ្វើដំណើរពីក្រៅប្រទេសចូលមកកម្ពុជាទេ តើឲ្យពួកគេទៅរស់នៅឯណា? ម្យ៉ាងទៀតការទទួលយកពលរដ្ឋឬនិស្សិតខ្មែរចូលប្រទេសវិញនាកាលៈទេសៈកូវីដ១៩នេះ ដោយសារ កម្ពុជាមានការរៀបចំនៅក្នុងស្រុករួចរាល់។ នេះបើតាមលោកនាយករដ្ឋមន្ត្រី ហ៊ុន សែន។
គណៈកម្មការប្រយុទ្ធនឹងជំងឹកូវីដ១៩ នៅថ្ងៃទី២៥ ខែកក្កដា ក៏បានអំពាវនាវឲ្យប្រជាពលរដ្ឋ ត្រូវបន្តអនុវត្តវិធានការការពារខ្លួនជាចាំបាច់ ដើម្បីការពារការចម្លងជំងឺកូវីដ១៩ ពីបុគ្គលម្នាក់ទៅបុគ្គលម្នាក់ និងកុំឲ្យមានរលកទីពីរនៃការចម្លងកូវីដ១៩។
គិតត្រឹមថ្ងៃទី២៦ ខែកក្កដា ២០២០នេះ កម្ពុជាមានករណីកូវីដ១៩សរុបចំនួន២២៥នាក់ និងអ្នកដែលជាសះស្បើយសរុបចំនួន១៤៣នាក់ ហើយមានអ្នកដែលសម្រាកនៅពេទ្យមានចំនួន៨២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ