Amnesty International៖ទង្វើរបស់ចិនលើជនជាតិភាគតិចអ៊ុយហ្គួរជាឧក្រិដ្ឋកម្មប្រឆាំងមនុស្សជាតិ
នៅថ្ងៃព្រហស្បតិ៍ ទី១០ មិថុនា អង្គការសិទ្ធិមនុស្សអន្តរជាតិ Amnesty International បានចេញផ្សាយរបាយការណ៍មួយស្តីពីស្ថានភាពរបស់ជនជាតិភាគតិចអ៊ុយហ្គួរនៅក្នុងខេត្តស៊ីនជាំង ប្រទេសចិន។ របាយការណ៍ដែលមានកម្រាស់ ១៦០ទំព័របានលើកឡើងពីទង្វើរបស់ចិនលើពួកអ៊ុយហ្គួរ និងក្រុមជនជាតិភាគតិចផ្សេងទៀត ដូចជាការចាប់ឃុំ ការធ្វើទារុណកម្ម និងការធ្វើទុក្ខបុកម្នេញតាមរូបភាពច្រើនទៀត។ Amnesty International បានចាត់ទុកទង្វើរបស់ចិនលើជនជាតិអ៊ុយហ្គួរជាឧក្រិដ្ឋកម្មប្រឆាំងមនុស្សជាតិ។
ចុះផ្សាយនៅថ្ងៃ៖
ស្តាប់ - ០១:៤៦
នៅក្នុងរបាយការណ៍កម្រាស់ ១៦០ទំព័រ Amnesty International បានស្រង់សម្តីសាក្សីថ្មីៗប្រមាណជាង ១០នាក់ដែលសុទ្ធសឹងជាអតីតអ្នកទោសអ៊ុយហ្គួរនៅជំរំឃុំឃាំងស្ថិតក្នុងតំបន់ស្វយ័តស៊ីនជាំង។ អតីតអ្នកទោសអ៊ុយហ្គួរទាំងនោះបានរៀបរាប់ពីវិធានការជ្រុលនិយមរបស់រដ្ឋអំណាចចិនទៅលើជនជាតិភាគតិចអ៊ុយហ្គួរតាំងពីឆ្នាំ ២០១៧ ក្នុងគោលដៅគាស់ទាំងឫសនូវទំនៀមទម្លាប់ប្រពៃណីសាសនា ការប្រតិបត្តិវប្បធម៌ និងភាសា។ សាក្សីជាអតីតអ្នកទោសអ៊ុយហ្គួរដដែលក៏បានលើកឡើងពីការអប់រំដោយបង្ខំនៅក្នុងជំរំដើម្បីឲ្យពួកអ៊ុយហ្គួរបោះបង់ចោលជំនឿសាសនាអ៊ីស្លាម បោះបង់ចោលភាសាដើមដោយងាកទៅរៀនភាសាចិនដូចពលរដ្ឋចិនទូទៅ និងរៀនទ្រឹស្តីឃោសនារបស់គណបក្សកុម្មុយនិស្ត។
Amnesty International បានបញ្ជាក់ថា អតីតអ្នកទោសអ៊ុយហ្គួរទាំងអស់បានលើកឡើងដូចគ្នាពីការធ្វើទារុណកម្ម ការវាយដំ ទាត់ធាក់ រួមទាំងការមានដំណេក និងអាហារមិនគ្រប់គ្រាន់។ តាម Amnesty International មានអ្នកទោសម្នាក់បានស្លាប់ដោយចងជាប់នឹងកៅអីរយៈពេល ៧២ម៉ោងនៅពីមុខអ្នកទោសផ្សេងទៀត។ លោកស្រី Agnès Callamard អគ្គនាយក Amnesty International បានបញ្ជាក់ដោយមិនលាក់លៀមថា ជនជាតិភាគតិចអ៊ុយហ្គួរ កាហ្សា និងជនជាតិភាគតិចផ្សេងទៀតអ្នកកាន់សាសនាអ៊ីស្លាមកំពុងប្រឈមនឹងឧក្រិដ្ឋកម្មប្រឆាំងមនុស្សជាតិ និងទង្វើរំលោភសិទ្ធិមនុស្សធ្ងន់ធ្ងរផ្សេងទៀត។
លោកស្រី Agnès Callamard បានអំពាវនាវឲ្យបិទជំរំនៅខេត្តស៊ីនជាំង និងស្នើឲ្យអង្គការសហប្រជាជាតិបើកការស៊ើបអង្កេតមួយ។ គួររម្លឹកថា យោងតាមក្រុមអ្នកជំនាញអន្តរជាតិ មានជនជាតិភាគតិចអ៊ុយហ្គួជាង ១លាននាក់ត្រូវបានរដ្ឋអំណាចចិនឃុំនៅក្នុងជំរំលត់ដំមួយដ៏ធំស្ថិតក្នុងតំបន់ស្វយ័តស៊ីនជាំង។ តែចិនតែងចេញមុខបដិសេធ និងបញ្ជាក់ច្រើនដងថា ជំរំនោះមិនមែនជាជំរំលត់ដំស្អីទេ តែជាមជ្ឈមណ្ឌលអប់រំវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ