ការប៉ះទង្គិចគ្នារវាងកងទ័ពនិងកងកម្លាំងការពារប្រជាជនភូមា សម្លាប់មនុស្ស៦នាក់
ការប៉ះទង្គិចដោយអាវុធ រវាងកងទ័ពភូមា និងកងកម្លាំងការពារប្រជាជន បានរាលដាលចូលដល់ទីក្រុង ធំទី២របស់ភូមា។ នៅថ្ងៃអង្គារ ទី២២មិថុនា កងទ័ពភូមាបានបើកការវាយប្រហារទៅលើទីតាំង មួយកន្លែងរបស់កងកម្លាំងការពារប្រជាជន ក្នុងទីក្រុងMandalay ដែលជាទីក្រុងធំទី២ របស់ភូមា ដោយបានសម្លាប់ក្រុមប្រឆាំង ៤នាក់ និងចាប់ខ្លួន ៨នាក់។ តាមប្រភពស្និទ្ធនឹងកងទ័ពភូមា ដែលដកស្រង់ដោយទីភ្នាក់ងារព័ត៌មានបារាំង AFP ទាហានភូមា ២នាក់បានស្លាប់ និងមានរបួសជាច្រើននាក់ផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៣៥
នេះជាលើកទី១ ដែលកងទ័ពភូមា បានផ្ទុះអាវុធ ជាមួយ កងកម្លាំងការពារប្រជាជន នៅក្នុងទីក្រុងMandalay ទីក្រុងធំទី២របស់ភូមា។ កងកម្លាំងការពារប្រជាជន ជាក្រុមប្រឆាំង នឹងរដ្ឋប្រហារយោធាភូមា ដែលបានងើបតស៊ូ កាន់អាវុធ ប្រឆាំងកងទ័ពភូមា នៅក្រោយ ការបង្រ្កាបបង្ហូរឈាម របស់កងទ័ពដែលបានសម្លាប់មនុស្ស ជាង ៨៧០នាក់ គិតចាប់តាំងពីខែកុម្ភៈ ដើមឆ្នាំ២០២១។
កន្លងមក កងកម្លាំងការពារប្រជាជន ដែលភាគច្រើនសំបូរដោយក្រុមយុវជន តែងលួចវាយឆ្មក់ទៅលើកងទ័ពភូមា នៅតាម ភូមិដាច់ស្រយាល ប៉ុន្តែ មិនដែលជួបប្រយុទ្ធ ជាមួយកងទ័ពភូមា នៅតាមទីក្រុងនោះទេ។ នៅថ្ងៃ អង្គារ ក្រុមដែលអះអាងខ្លួនជាកងកម្លាំងការពារប្រជាជន People Defence Force (PDF) ប្រចាំទីក្រុងMandalay បានសរសេរនៅលើទំព័រហ្វេសប៊ុករបស់ក្រុមខ្លួនថា សមាជិករបស់ខ្លួនបានបាញ់តដៃវិញ នៅពេលកងទ័ពភូមា ចូលឈ្លានពានទីតាំងមួយកន្លែងរបស់ក្រុមខ្លួន នៅMandalay។
ការប្រយុទ្ធគ្នាមួយប្រាវ រវាង កងកម្លាំងការពារប្រជាជន និងកងទ័ពភូមា ដែលមានជំនួយពី រថក្រោះជាច្រើនគ្រឿង បានកើតឡើងនៅអន្តេវាសិកដ្ឋានមួយកន្លែង ដែល កងទ័ពភូមាអះអាងថា ជាទីតាំងលាក់ខ្លួន របស់ក្រុមប្រដាប់អាវុធខុសច្បាប់។
តាមអ្នកនាំពាក្យរបស់កងទ័ពភូមា ដែលដកស្រង់សំដីដោយទីភ្នាក់ងារព័ត៌មានបារាំង AFP គេបានសម្លាប់ជនប្រឆាំង ៤នាក់ ចាប់ខ្លួន មនុស្ស៨នាក់ និងរឹបអូសបានអាវុធ និងគ្រាប់បែកច្នៃ ជាច្រើនគ្រាប់។ កងទ័ពបានពន្លយឲ្យដឹងថា មានទាហានភូមា មួយចំនួន បានរងរបួស នៅក្នុងការប្រយុទ្ធគ្នា កាលពីថ្ងៃអង្គារ ប៉ុន្តែ កងកម្លាំងការពារប្រជាជនវិញ អះអាងថា មានទាហានភូមា ២នាក់ ស្លាប់ ដោយសារស្នាដៃរបស់ក្រុមប្រឆាំង។
ថ្វីត្បិតថា កងកម្លាំងការពារប្រជាជន ដែលកើតចេញមកពីចលនាប្រឆាំងរដ្ឋប្រហារយោធាភូមា មានសមត្ថភាពស្តួចស្តើង និងអាវុធតិចតួច មិនអាចប្រយុទ្ធយកឈ្នះ លើកងទ័ពភូមា ដែលបំពាក់ដោយសព្វាវុធគ្រប់គ្រាន់ ប៉ុន្តែ ការប៉ះទង្គិចដោយអាវុធ រវាងកងទ័ពភូមា និងក្រុមប្រឆាំងប្រដាប់អាវុធ កាលពីថ្ងៃអង្គារ អាចឲ្យគេយល់បានថា សង្រ្គាមស៊ីវិលនៅភូមា បានចាប់លេចមុខបណ្តើរៗហើយ។ ក្រៅតែជាប់ដៃប្រយុទ្ធជាមួយ ក្រុមប្រឆាំង ប្រដាប់អាវុធ កងទ័ពភូមាកំពុងរងការវាយប្រហារផងដែរ ពីកងកម្លាំងជនជាតិភាគតិច ជាពិសេស ក្រុមទាហានការ៉ែន ដែលបានចេញមុខ គាំទ្រក្រុមប្រឆាំង នឹងរដ្ឋប្រហារយោធាភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ