រដ្ឋាភិបាលបង្រួបបង្រួមជាតិភូមា ប្រកាសបង្កើត « កងកម្លាំង » ដើម្បីការពារប្រជាជនភូមា
រដ្ឋាភិបាលក្រៅផ្លូវការភូមា ដែលមានឈ្មោះថា រដ្ឋាភិបាលបង្រួបបង្រួមជាតិ បានប្រកាសកាលពីល្ងាចថ្ងៃពុធម្សិលមិញថា ខ្លួនទើបតែបានបង្កើត កងកម្លាំងដើម្បីការពារប្រជាជនភូមា ពីការវាយប្រហារ និងការប្រើអំពើហិង្សា របស់កងទ័ពជាតិភូមា។ ទោះយ៉ាង រដ្ឋាភិបាលក្រៅផ្លូវការនេះ មិនបានលំអិតច្រើនទេ ថាតើកងកម្លាំងនេះ មានកាន់អាវុធឬយ៉ាងណា។ ទោះជាយ៉ាងនេះក្តីនេះ ការបារម្ភដែលថាអាចផ្ទុះជាសង្គ្រាមស៊ីវីលនៅភូមា កំពុងតែក្លាយជាការពិតហើយ។
ចុះផ្សាយនៅថ្ងៃ៖
ស្តាប់ - ០២:៣៤
យោងតាមសេចក្តីប្រកាស របស់រដ្ឋាភិបាលបង្រួបបង្រួមជាតិភូមា បានឲ្យដឹងថា កងកម្លាំងរួមមួយ ត្រូវបានបង្កើតឡើង ដើម្បីជួយការពារប្រជាជនភូមា ដែលធ្វើបាតុកម្មប្រឆាំងនឹងរដ្ឋប្រហារយោធា។ កងកម្លាំងនេះ នឹងប្រឈមជាមួយសមត្ថកិច្ច ដែលទទួលបញ្ជាពីរបបសិកភូមា ឲ្យមានវាយប្រហារ បង្រ្កាបប្រជាជន។ ហើយទៅថ្ងៃខាងមុខ កងកម្លាំងនេះ នឹងមានតួនាទីរៀបចំ កសាងជាងកងទ័ពសម្ព័ន្ធជាតិភូមាតែម្តង ដើម្បីប្រយុទ្ធយកឈ្នះ បិទបញ្ចប់របបផ្តាច់ការយោធា។
ដោយឡែក នៅពេលអ្នកកាសែត ព្យាយាមទាក់ទងទៅកាន់អ្នកនាំពាក្យរដ្ឋាភិបាលក្រៅផ្លូវការនេះ គឺពុំមានចម្លើយទេ។ គ្មានការបញ្ជាក់លំអិតណាមួយ ស្តីអំពីការរៀបចំបង្កើតកងកម្លាំងពិសេសនេះ ដោយរបៀបណា ហើយថាតើ មានកាន់អាវុធដែរឬទេ។ ដូចគ្នា រហូតមកទល់ពេលនេះ ខាងក្រុមកងទ័ពជាតិភូមា ក៏មិនបានប្រតិកម្មអ្វីនឹងការប្រកាសនេះដែរ។
សូមបញ្ជាក់ថា រដ្ឋាភិបាលក្រៅផ្លូវការ ឈ្មោះថា រដ្ឋាភិបាលបង្រួបបង្រួមជាតិភូមា (GUN) ត្រូវបានបង្កើតឡើងក្នុងខែមេសាកន្លងទៅ ដោយក្រុមសមាជិកសភាមួយចំនួន មកពីគណបក្សសម្ព័ន្ធជាតិដើម្បីប្រជាធិបតេយ្យ ដែលត្រូវបានក្រុមយោធាភូមាបណ្តេញចេញពីសភា។ សមាជិករដ្ឋាភិបាលក្រៅផ្លូវការនេះ ក៏មានផងដែរក្រុមតំណាងជនជាតិភាគតិចមួយចំនួន។
ក៏ប៉ុន្តែ លោក Khu Oo Reh អ្នកទទួលបន្ទុកនយោបាយម្នាក់ នៃក្រុមកម្លាំងរំដោះជាតិការ៉ែន បានលើកឡើងប្រាប់អ្នកយកព័ត៌មានបារាំង ថាលោកនឹងតំណាងក្រុមការ៉ែនផ្សេងទៀត ពុំសូវមានទំនុកចិត្តទៅលើរដ្ឋាភិបាលបង្រួមបង្រួមជាតិនេះទេ ព្រោះវាដឹកនាំទាំងស្រុក ដោយពួកជនជាតិភូមា។ លោកបានអះអាងថា មានសកម្មជនអ្នកប្រជាធិបតេយ្យជាច្រើន បានស្ម័គ្រចិត្តរត់ចូលព្រៃ ដើម្បីហ្វឹកហាត់ប្រយុទ្ធ ទៅតទល់ជាមួយរបបសិក ពោលគឺពួកគេមិនមែនស្ម័គ្រ ដើរតាមការអំពាវនាវ ឬការរៀបចំបង្កើតកងកម្លាំង របស់រដ្ឋាភិបាលក្រៅផ្លូវការនេះទេ។
គួរកត់សំគាល់ថា ក្តីបារម្ភខ្លាចផ្ទុះជាសង្គ្រាមស៊ីវីលនៅភូមា មានកាន់តែខ្លាំង ខណៈសកម្មជនប្រឆាំងរបបសិក ក៏ដូចជាក្រុមកម្លាំងជនជាតិភាគតិចកាន់តែច្រើន បានប្រកាសប្រមូលផ្តុំកម្លាំង ប្រយុទ្ធ។ ប៉ុន្មានថ្ងៃចុងក្រោយនេះ មានការដាក់បង្កៃគ្រាប់បែកឆ្នៃ បំផ្ទុះជាច្រើនគ្រាប់ ជាអាទិ៍នៅទីក្រុងរ៉ង់ហ្គូន តែពុំបានធ្វើឲ្យមនុស្សរបួសឬស្លាប់ទេ។ ការតស៊ូ រើបំរាស់ ដើម្បីប្រជាធិបតេយ្យ និងសិទ្ធិសេរីភាព ដែលផ្តើមឡើងដោយការធ្វើបាតុកម្មដង្ហែរក្បួនអហិង្សា ពេលនេះបានក្លាយបន្តិចម្តងៗ ទៅជាសកម្មភាពវាយប្រហារដោយហិង្សា ទៅលើសមត្ថកិច្ចនិងកងទ័ពជាតិភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ