ពលរដ្ឋថៃចេញធ្វើបាតុកម្មជាថ្មី ទាំងប្រទេសកំពុងផ្ទុះរលកចម្លងកូវីដ១៩ខ្លាំង
មានការប្រមូលផ្តុំធ្វើបាតុកម្មជាថ្មីនៅថ្ងៃព្រហស្បតិ៍ទី ២៤មិថុនា ២០២១នេះ។ សកម្មជនអ្នកប្រជាធិបតេយ្យរាប់ពាន់នាក់ បាននាំគ្នាដង្ហែក្បួនទៅប្រជុំគ្នានៅមុខសភាជាតិ ដើម្បីរំលឹកខួប៨៩ឆ្នាំនៃការងើបបះបោរធ្វើបដិវត្តបិទបញ្ចប់របបរាជនិយមផ្តាច់ការ កាលពីឆ្នាំ១៩៣២។
ចុះផ្សាយនៅថ្ងៃ៖
អាជ្ញាធរថៃបានហាមឃាត់មិនឱ្យមានការជួបជុំគ្នាទេ ព្រោះតាំងពីខែមេសាមក សន្ទុះចម្លងជំងឺកូវីដ១៩បានកើនឡើងខ្លាំង លំដាប់ជាងបីពាន់នាក់ក្នុងមួយថ្ងៃៗ។ ប៉ុន្តែចលនាបាតុកម្មនៅតែហ៊ានល្មើសបម្រាម មកប្រមូលផ្តុំគ្នា ក្នុងចំនួនដ៏ច្រើនរយនាក់។ ក្នុងចំណោមបាតុករ មានច្រើននាក់ជាមេដឹកនាំចលនាប្រជាធិបតេយ្យ ដែលជាប់ចោទពីបទប្រមាថព្រះចេស្តាព្រះមហាក្សត្រ តែបានទទួលសេរីភាពបណ្តោះអាសន្ន។
ជាមួយបដាបរិហារ និងទាមទារការរំលាយមាត្រា១១២ នៃច្បាប់រដ្ឋធម្មនុញ្ញចែងអំពីការដាក់ទោសអ្នកប្រមាថរាជានិយមដល់១៥ឆ្នាំក្នុងពន្ធនាគារ ក្បួនបាតុកម្មបានដើរដង្ហែកាត់ក្រុងបាងកកសំដៅរដ្ឋសភា។ ទីដែលតំណាងរាស្ត្រត្រូវបោះឆ្នោតលើគម្រោងវិសោធនកម្មច្បាប់ រដ្ឋធម្មនុញ្ញចំនួន១៣ នៅពេលយប់ជ្រៅថ្ងៃទី ២៤មិថុនានេះផង។
ចលនាប្រជាធិបតេយ្យបានទាមទារឱ្យលោក ប្រាយុទ្ធចាន់អូចា ដែលជាអតីតឧត្តមសេនីយ៍បានឡើងជានាយករដ្ឋមន្ត្រីតាមរយៈរដ្ឋប្រហារ កាលពីឆ្នាំ២០១៤ និងតាមរយៈការបោះឆ្នោតសភា នៅ៥ឆ្នាំបន្ទាប់ លាលែងចេញពីតំណែង។ ក្រុមបាតុករក៏បានទាមទារទៀត ឱ្យមានការសើរើរដ្ឋធម្មនុញ្ញ ដែលការពារក្រុមយោធាជ្រុល ព្រមទាំងចង់បានការធ្វើកំណែទម្រង់ស៊ីជម្រៅប្រព័ន្ធរាជានិយម ដែលការពារគ្រួសាររាជវង្សបំផុត និងដែលគ្មាននរណាហ៊ាននិយាយប៉ះពាល់សោះពីមុនមក។
លោក ផាឡង ប្រាចារ៉ាត តំណាងរាស្ត្រម្នាក់ នៃបក្សកាន់អំណាចបានចេញមុខ មកធានាអះអាងប្រាប់បាតុករ ថា រដ្ឋាភិបាលដែលរងការរិះគន់យ៉ាងខ្លាំងចំពោះចំណាត់ការសេដ្ឋកិច្ចនិងវិបត្តិកូវីដ១៩ ត្រៀមខ្លួនស្តាប់សំណើរបស់បាតុករហើយ។
ចលនាបាតុកម្មប្រជាធិបតេយ្យ បានឡើងសន្ទុះខ្លាំង កាលពីឆ្នាំទៅ ដោយប្រមូលផ្តុំគ្នាក្នុងទ្រង់ទ្រាយធំ ជាច្រើនម៉ឺននាក់ នៅទីក្រុងបាងកក។ បាតុកម្មដែលរងការបង្ក្រាប និងចាប់ខ្លួនមនុស្សជាច្រើននាក់ ក្នុងនោះប្រមាណ១៥០នាក់ រងការចោទប្រកាន់ពីបទប្រមាថរាជានិយម។ ចលនាប្រឆាំងបានចុះថយឥទ្ធិពលបន្តិចនារយៈពេលចុងក្រោយដោយហេតុអាជ្ញាធរយកច្បាប់ការពាររាជានិយមមកធ្វើជាអាវុធផង និងដោយហេតុមានការផ្ទុះកូវីដ១៩ខ្លាំងផង។ ប៉ុន្តែបាតុកម្មនៅតែបន្តមានយូរៗម្តងដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ