តុលាការបារាំងអង្កេតលើក្រុមហ៊ុនលក់សំលៀកបំពាក់ដែលជាប់សង្ស័យបិទបាំងឧក្រិដ្ឋកម្មលើជនជាតិអ៊ុយហ្គួរ
នាយកដ្ឋានឧក្រិដ្ឋកម្មប្រឆាំងមនុស្សជាតិនៃអយ្យការជាតិបារាំងប្រឆាំងភេរវនិយមបានសម្រេចបើកការស៊ើបអង្កេតលើក្រុមហ៊ុនលក់សំលៀកបំពាក់ចំនួន ៤ ក្នុងបទចោទប្រកាន់លាក់បាំងឧក្រិដ្ឋកម្មប្រឆាំងមនុស្សជាតិប្រព្រឹត្តទៅលើជនជាតិ អ៊ុយហ្គួរក្នុងខេត្តស៊ីនជាំង ភាគពាយ័ព្យប្រទេសចិន។ នៅថ្ងៃព្រហស្បតិ៍ទី ១កក្កដា មេធាវីរបស់ដើមបណ្តឹង បាននិយាយប្រាប់ទីភ្នាក់ងារព័ត៌មានបារាំង AFPថា ក្រុមហ៊ុនលក់សំលៀកបំពាក់ម៉ាកជប៉ុនUniqlo ប្រចាំប្រទេសបារាំង និងក្រុមហ៊ុនម្ចាស់ហាងសំលៀកបំពាក់ ស្បែកជើង ចំនួន ៣ទៀត បានក្លាយជាផ្ទាំងស៊ីបស៊ើបអង្កេតរបស់រដ្ឋអាជ្ញាបារាំង តាំងពីចុងខែ មិថុនា។
ចុះផ្សាយនៅថ្ងៃ៖
ស្តាប់ - ០២:០៧
តាមមេធាវីរបស់ក្រុមដើមបណ្តឹង គឺលោក William Bourdon ក្រុមឧក្រិដ្ឋកម្មប្រឆាំងមនុស្សជាតិនៃអយ្យការជាតិបារាំងបានសម្រេចបើកការស៊ើបអង្កេតលើក្រុមហ៊ុនសំលៀកបំពាក់ ៤ នៅបន្ទាប់ពីបានទទួលពាក្យបណ្តឹង ពី សមាគមប្រឆាំងអំពើពុករលួយ ក្រុមការពារវិជ្ជាជីវៈ វិទ្យាស្ថានអ៊ុយហ្គួរនៅអឺរ៉ុប និងស្រ្តីអ៊ុយហ្គួរម្នាក់ ដែលធ្លាប់ជាប់ក្នុងមណ្ឌលលត់ដំក្នុងខេត្តស៊ីនជាំង។
នៅក្នុងពាក្យបណ្តឹងទៅកាន់អយ្យការបារាំង ក្រុមសមាគម និងជនជាតិអ៊ុយហ្គួរខាងលើបានចោទប្រកាន់ ក្រុមហ៊ុននាំចូល និងលក់សំលៀកបំពាក់ ស្បែកជើង ទាំង៤ ពីបទលាក់បាំង ឧក្រិដ្ឋកម្មដែលបានចាប់បង្ខំមនុស្សឲ្យធ្វើការធ្ងន់ធ្ងរ ឧក្រិដ្ឋកម្មរៀបចំជាក្រុម ឧក្រិដ្ឋកម្មប្រល័យពូជសាសន៍ និងឧកិ្រដ្ឋកម្មប្រឆាំងមនុស្សជាតិ។
ដោយពឹងផ្អែកលើរបាយការណ៍របស់វិទ្យាស្ថានអូស្រ្តាលី ឈ្មោះ Australian Strategic Policy Institute សមាគមខាងលើស្តីបន្ទោសក្រុមហ៊ុន ៤ ដូចជាក្រុមហ៊ុន សំលៀកបំពាក់ម៉ាកជប៉ុន Uniqlo ក្រុមហ៊ុនInditex ដែលជាម្ចាស់ម៉ាកZara Massimo Duti ក្រុមហ៊ុន SMCP ម្ចាស់ម៉ាក Sandro Maje និងក្រុមហ៊ុនស្បែកជើង Skechers ថា ធ្វើជំនួញ លក់ផលិតផល ដែលផលិតឡើងទាំងស្រុង ឬ មួយផ្នែក នៅតាមរោងចក្រ ដែលជនជាតិអ៊ុយហ្គួរធ្វើការដោយចាប់បង្ខំ។
សម្រាប់សមាគមដើម្បីបុព្វហេតុជនជាតិអ៊ុយហ្គួរ ក្រុមហ៊ុនជប៉ុន អេស្ប៉ាញ បារាំង អាមេរិកាំងទាំង ៤មិនបានយកចិត្តទុកដាក់ ឬប្រឹងប្រែងត្រួតពិនិត្យ ដើម្បីធានាថា ផលិតផលសំលៀកបំពាក់របស់ខ្លួន គ្មានជាប់ពាក់ព័ន្ធនឹងការរំលោភ ធ្វើទុក្ខបុកម្នេញលើជនជាតិអ៊ុយហ្គួរ។
សម្រាប់សមាជិកសភាអឺរ៉ុប លោក Raphaël Glucksmann ក្រុមហ៊ុនពហុជាតិខាងលើបានរកប្រាក់ចំណេញលើខ្នងជនជាតិភាគតិចអ៊ុយហ្គួរ ដែលត្រូវធ្វើការងារដោយបង្ខំនៅប្រទេសចិន។ ក្រុមហ៊ុនដែលរងការចោទប្រកាន់ដូចជា Uniqlo បានរុញច្រានការចោទប្រកាន់។ ក្រុមហ៊ុនUniqlo ផ្ទាល់ ធ្លាប់បានចូលរួម ជាមួយ ក្រុមហ៊ុនសំលៀកបំពាក់ដទៃទៀត ដូចជា H&M Nike Adidasដើម្បីធ្វើពហិការមិនប្រើសរសៃកប្បាសដាំ នៅខេត្តស៊ីនជាំង ដើម្បីប្រឆាំងនឹងការងារចាប់បង្ខំលើប្រជាជនអ៊ុយហ្គួរ។ ប៉ុន្តែ ជាលទ្ធផលទទួលបានមកវិញ ក្រុមហ៊ុនអឺរ៉ុប និងអាមេរិកាំងខាងលើបានក្លាយជាផ្ទាំងស៊ីបរបស់ក្រុមជាតិនិយមចិនដែលបានអំពាវនាវឲ្យគេធ្វើពហិការមិនទិញ ផលិតផលរបស់ក្រុមហ៊ុនអឺរ៉ុប ក្រុមហ៊ុនអាមេរិកាំង។
អង្គការការពារសិទ្ធិមនុស្សបានចោទរដ្ឋអំណាចប៉េកាំងថា បានចាប់ឃុំជនជាតិអ៊ុយហ្គួរ ជាង១លាននាក់ ក្នុងមណ្ឌលលត់ដំ និងចាប់ធ្វើការដោយបង្ខំ នៅតាមរោងចក្រនានាក្នុងប្រទេសចិន។ របបកុម្មុយនិស្តចិនបានបដិសេធការចោទប្រកាន់ និងអះអាងថា មណ្ឌលអប់រំជួយប្រជាជនអ៊ុយហ្គួរឲ្យឃ្លាតឆ្ងាយពីចលនាភេរវនិយម និងក្រុមអ៊ីស្លាមជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ