ប៉ូលិសហុងកុងចាប់ខ្លួនជនសង្ស័យ ៩នាក់ពីបទរៀបចំផែនការបង្កភេរវកម្ម
នៅហុងកុង ប៉ូលិសបានប្រកាសនាថ្ងៃអង្គារ ទី៦ កក្កដានេះ អំពីការចាប់ខ្លួនជនសង្ស័យចំនួន ៩នាក់ពីបទព្យាយាមផលិតគ្រឿងផ្ទុះដើម្បីត្រៀមបង្កសកម្មភាពភេវរកម្ម។ ក្នុងចំណោមជនសង្ស័យទាំងអស់ មាន ៦ នាក់ គឺជាសិស្សអនុវិទ្យាល័យ។
ចុះផ្សាយនៅថ្ងៃ៖
ស្តាប់ - ០២:២៨
បើតាមប៉ូលិសហុងកុង មនុស្សប្រុស ៥នាក់ និងស្រី ៤ នាក់មានអាយុចន្លោះពី ១៥ ទៅ ៣៩ឆ្នាំ ត្រូវបានចាប់ខ្លួនកាលពីថ្ងៃចន្ទម្សិលមិញពីបទសមគំនិតគ្នាក្នុងការប៉ុនប៉ងប្រើប្រាស់អាវុធជាតិផ្ទុះសម្រាប់សកម្មភាពភេរវកម្ម។
“ប្រតិបត្តិការចាប់ខ្លួនធ្វើឡើងដើម្បីប្រឆាំងនឹងក្រុមក្មេងទំនើងដែលបានព្យាយាមផលិតគ្រឿងផ្ទុះ TATP នៅក្នុងបន្ទប់ពិសោធន៍មួយដែលគេបង្កើតឡើងខាងក្នុងអគារសម្រាប់ជួលស្នាក់នៅមួយកន្លែង”។ នេះគឺជាប្រសាសន៍របស់លោក ស្ទីវ លី (Steve Li) ដែលជាមេដឹកនាំប្រតិបត្តិការ មកពីអង្គភាពសន្តិសុខជាតិថ្មីរបស់ក្រុងហុងកុង។ លោកបានប្រាប់ក្រុមអ្នកយកព័ត៌មានថា TATP គឺជាប្រភេទគ្រឿងផ្ទុះដែលមានថាមពលខ្លាំង។
ប៉ូលិសហុងកុងបាននិយាយថាជនសង្ស័យទាំង៩ នាក់គឺជាសមាជិករបស់ក្រុមគាំទ្រឯករាជ្យមួយ ដែលបានហៅខ្លួនឯងថា “Returning Valiant” ឬប្រែជាភាសាខ្មែរថា “ការត្រឡប់មកវិញនៃភាពក្លាហាន”។ ជនដែលត្រូវបានចាប់ខ្លួនរួមមានសិស្សវ័យជំទង់ ៦ នាក់ និងមនុស្សពេញវ័យ ៣ នាក់ ដែលពីរនាក់ធ្លាប់ធ្វើការនៅសាកលវិទ្យាល័យនិងអនុវិទ្យាល័យមួយកន្លែង ហើយម្នាក់ចុងក្រោយគេមានមុខរបបរជាអ្នកបើកបរ។
ប្រធានដឹកនាំប្រតិបត្តិការបង្ក្រាប លោកលី បានឲ្យដឹងថា ពួកគេទាំង៩ នាក់ បានរៀបគម្រោងវាយប្រហារទីតាំងសាធារណៈជាច្រើន មានដូចជា ផ្លូវរូងក្រោមដី បណ្តាញផ្លូវដែក និងបន្ទប់សវនាការ។
គួរជ្រាបថា ដំណឹងអំពីការចាប់ខ្លួនជនសង្ស័យទាំង ៩នាក់ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីបុរសវ័យ ៥០ ឆ្នាំម្នាក់បានសម្លាប់ជីវិតខ្លួនឯង បន្ទាប់ពីបានធ្វើសកម្មភាពចាក់ទៅលើប៉ូលិសម្នាក់រួចមក។ គួរជ្រាបដែរថា អាជ្ញាធរហុងកុង បានចេញប្រតិបត្តិការចាប់ខ្លួនជាច្រើនដងក្នុងរយៈពេលពីរឆ្នាំចុងក្រោយនេះពាក់ព័ន្ធការចោទប្រកាន់ពីបទប៉ុនប៉ងបំផ្ទុះគ្រាប់បែក ទោះបីជាគ្មានការវាយប្រហារធំណាមួយត្រូវបានអនុវត្តដោយជោគជ័យក៏ដោយ។
សម្រាប់ប្រតិបត្តិការចុងក្រោយនេះ ប៉ូលិសហុងកុងបានឲ្យដឹងថាពួកគេរឹបអូសយកវត្ថុតាងផ្សេងៗរួមមាន វត្ថុមានជាតិផ្ទុះ វត្ថុធាតុដើមដើម្បីផលិតគ្រឿងផ្ទុះ TATP កាំភ្លើងខ្យល់ ទូរស័ព្ទចល័ត និងស៊ីមកាតជាដើម។ ក្រៅពីនេះ ពួកគេក៏បានរកឃើញសាច់ប្រាក់ចំនួនប្រមាណ ១១ ៥៨៥ ដុល្លារ និងលុយបង្កកក្នុងគណនីធនាគារប្រមាណ ៧ ៧២៥ ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ