ថៃដាក់ចេញវិធានការរឹតត្បិតក្នុងក្រុងបាងកកនិងខេត្ត៩ផ្សេងទៀតដើម្បីទប់ស្កាត់កូវីដ
នៅក្នុងទីក្រុងបាងកកប្រទេសថៃ ប្រជាជនជាង ១០ លាននាក់ ត្រូវបានអាជ្ញាធរដាក់ឲ្យនៅក្រោមវិធានការរឹតបន្តឹង និងបម្រាមគោចរ នាថ្ងៃចន្ទ ១២ កក្កដានេះ។ ក្រៅពីក្រុងបាងកក អាជ្ញាធរថៃ ក៏បានសម្រេចដាក់ខេត្ត ៩ផ្សេងទៀតនៅក្រោមវិធានការរឹតត្បិតដែរដើម្បីទប់ស្កាត់ការឆ្លងរាលដាលកូវីដខ្លាំងបង្កឡើងដោយមេរោគបំប្លែងខ្លួន “ដែលតា” និង “អាល់ហ្វា”។
ចុះផ្សាយនៅថ្ងៃ៖
ស្តាប់ - ០២:១៤
គិតមកដល់ពេលនេះ ប្រទេសថៃបានកត់ត្រាតួលេខឆ្លងកូវីដជាង ៣២៦ ០០០ ករណី និងមានស្លាប់ចំនួន ២ ៧១១ នាក់។ ករណីឆ្លងនិងស្លាប់ជាច្រើនបានកើតឡើងក្រាយរលកកូវីដថ្មីចាប់វាយលុកប្រទេសថៃក្នុងខែមេសាមក។
ការផ្ទុះករណីឆ្លងជាថ្មី ត្រូវបានរកឃើញដំបូងនៅក្នុងក្លឹបជាច្រើនស្ថិតក្នុងមណ្ឌលកម្សាន្តរាត្រីទីក្រុងបាងកកដែលជាកន្លែងគេឧស្សាហ៍ក្រុមអ្នកមានលុយ និងអ្នកនយោបាយថៃ។ ករណីឆ្លងកូវីដនៅថៃបានកើនឡើងខ្លាំងដោយហេតុថាការចាក់វ៉ាក់សាំងយឺត ហើយសមត្ថភាពធ្វើតេសត្តរកកូវីដនៅមានកំណត់។
ក្រៅពីរាជធានីបាងកក ខេត្តរបស់ថៃចំនួន៩ផ្សេងទៀតក៏កំពុងប្រឈមនឹងការកើនឡើងនៃករណីឆ្លងកូវីដជាលំដាប់ និងត្រូវបានដាក់ឲ្យស្ថិតនៅក្រោមវិធានការរឹតត្បិតដែរ។ វិធានការរឹតបន្តឹង ដើម្បីទប់ស្កាត់ការឆ្លងរាលដាលជំងឺកូវីដ១៩ បានចូលជាធរមាននៅថ្ងៃចន្ទ ទី១២ កក្កដា ឆ្នាំ ២០២១នេះ។
ប៉ុស្តិ៍ត្រួតពិនិត្យរបស់ប៉ូលិសជាច្រើន ត្រូវបានដំឡើងនៅពាសពេញទីក្រុងបាងកកនាព្រឹកថ្ងៃចន្ទនេះ ខណៈបម្រាមគោចរចាប់ផ្តើមពីម៉ោង ៩ យប់ ដល់ម៉ោង ៤ ទៀបភ្លឺ។ ប្រជាពលរដ្ឋមិនត្រូវបានអនុញ្ញាតឲ្យប្រមូលផ្តុំគ្នាជាក្រុមដែលមានមនុស្សច្រើនជាង ៥ នាក់នោះទេ។ ចំណែកបណ្តាញដឹកជញ្ជូនសាធារណៈវិញ នឹងត្រូវបិទចាប់ពីម៉ោង ៩ យប់។
ផ្សារទំនើប ភោជនីយដ្ឋាន ធនាគារ ឱសថស្ថាន និងហាងលក់គ្រឿងអេឡិចត្រូនិកនៅតាមផ្សារនានានឹងអាចនៅបន្តបើកទ្វារបាន ប៉ុន្តែហាងផ្សេងទៀតត្រូវបានតម្រូវឲ្យបិទទ្វារ។
រដ្ឋាភិបាលដឹកនាំដោយលោកនាយករដ្ឋមន្ត្រី ប្រាយុទ្ធ ចាន់អូចា បានរងនូវការរិះគន់យ៉ាងខ្លាំង ជុំវិញចំណាត់ការគ្រប់គ្រងជំងឺកូវីដ ហើយប្រជាជនថៃជាច្រើនកាន់តែមានកំហឹងខ្លាំងទៅទៀត ចំពោះវិធានការថ្មីដែលទើបដាក់ចូលជាធរមាននៅថ្ងៃចន្ទនេះ។ ពលរដ្ឋថៃមួយចំនួនបាននិយាយថាអាជ្ញាធរ គួរណាស់តែឆាប់ចាត់វិធានការរឹតបន្តឹងឲ្យលឿនជាងនេះ ពោលគឺមុនពេលដែលករណីឆ្លងថ្មីចាប់ផ្ទុះរីករាលដាលខ្លាំងក្នុងចំណោមប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ