កូវីដ១៩ ៖ "ដែលតា" កំពុងរុញច្រានប្រព័ន្ធសុខាភិបាលថៃ ឱ្យជួបការលំបាក
ដើម្បីបង្កើនប្រសិទ្ធភាពវ៉ាក់សាំងទល់នឹងការបំប្លែងខ្លួនរបស់មេរោគកូវីដ១៩ គេគួរតែចាក់វ៉ាក់សាំងចំនួនបីដូស។ នេះបើតាមគម្រោងសំណើរបស់ក្រុមហ៊ុនផលិតឱសថPfizer/BioNTech ដែលនឹងចេញផ្សាយនៅសប្តាហ៍ខាងមុខ។ សេចក្តីប្រកាសរបស់Pfizer/BioNTech ធ្វើឡើងក្នុងខណៈដែលមេរោគកូវីដបំប្លែងខ្លួន “ដែលតា” កំពុងរាតត្បាតខ្លាំង នៅអាហ្វ្រិក អាស៊ី... ថៃដែលធ្លាប់ល្បីមានចំណាត់ការ ល្អ ជាគំរូរបស់អង្គការសុខភាពពិភពលោកផងនោះ កំពុងផុងនិងរងរលកចម្លងលើកទីបី បង្កឡើងដោយ “ដែលតា” យ៉ាងធ្ងន់ធ្ងរ និងបានប្រកាសដាក់បម្រាមគោចរក្រុងបាងកកចាប់ពីសប្តាហ៍ក្រោយទៅ។
ចុះផ្សាយនៅថ្ងៃ៖
ស្តាប់ - ០២:៣០
ជិត១ម៉ឺនករណីក្នុងមួយថ្ងៃ និងស្លាប់៧៥នាក់ ក្នុងរយៈពេល២៤ម៉ោងចុងក្រោយនេះ។ ដោយហេតុតែមេរោគកូវីដបំប្លែងខ្លួន « ដែលតា » ចំនួនអ្នកវិជ្ជមាន និងស្លាប់ កើនឡើងជាលំដាប់នៅប្រទេសថៃ ដែលសម្រេចហាមឃាត់មិនឱ្យមានការធ្វើដំណើរឆ្លងពីខេត្តមួយទៅខេត្តមួយទៀតទេ។ រដ្ឋាភិបាលថៃបានព្រលយថាក្រុងបាកកកអាចនឹងបិទខ្ទប់តែម្តងផង នៅប៉ុន្មានថ្ងៃខាងមុខ។ បម្រាមគោចរ ពីម៉ោង ៩យប់ដល់ម៉ោង៤ភ្លឺនឹងចូលជាធរមាន ចាប់ពីថ្ងៃចន្ទទី ១២កក្កដា២០២១ទៅ។
ប្រឈមនឹងសន្ទុះកំណើនករណីឆ្លងថ្មី មន្ទីរពេទ្យក្រុងបាងកកនិងតំបន់ជុំវិញរដ្ឋធានីចាប់ផ្តើមជួបការលំបាក និងបំពេញដោយអ្នកជំងឺកូវីដ ក្នុងកំរិតប្រមាណ៩០%។ គ្រែសម្រាប់ទទួលអ្នកជំងឺនៅសល់ទំនេរតែប្រមាណ១០%ប៉ុណ្ណោះ។ ក្រសួងសុខាភិបាលនិងគ្រូពេទ្យនៅមជ្ឈមណ្ឌលប្រយុទ្ធប្រឆាំងនឹងកូវីដ បានចេញសេចក្តីណែនាំឱ្យអ្នកវិជ្ជមានកូវីដ១៩ ធ្វើការនៅក្រុងបាកកកទៅស្វែងរកការព្យាបាលនៅតាមខេត្ត ឬទៅស្រុកកំណើត ដោយមន្ទីរពេទ្យជាអ្នកទទួលបន្ទុកដឹកបញ្ជូនទៅ ប្រសិនបើអ្នកជំងឺស្ម័គ្រចិត្ត។
កាលពីឆ្នាំ២០២០ នៅពេលផ្ទុះកូវីដ១៩ដំបូង ថៃគ្រប់គ្រងវិបត្តិបានល្អ ដោយបានបិទព្រំប្រទល់ ទាន់ពេលវេលានិងត្រួតពិនិត្យយ៉ាងតឹងតែងខ្លាំង។ ប៉ុន្តែថៃ និងប្រទេសជិតខាងហាក់មិនបានត្រៀមលក្ខណៈជាមុនសម្រាប់ប្រឈមនឹងរលកចម្លងកូវីដ១៩ទីបីនេះទេ។ គ្មានកញ្ចប់ថវិកាធំសម្រាប់យុទ្ធនាការថ្នាំបង្ការ ដូចប្រទេសលោកខាងលិច គ្រប់គ្នាបានបន្ទោសរដ្ឋាភិបាលថៃ ថាមានសកម្មភាពយឺតយ៉ាវខ្លាំងក្នុងផ្តល់វ៉ាក់សាំងជូនប្រជាពលរដ្ឋ។
ក្នុងពេលដែលថៃ ព្រមទាំងបណ្តាប្រទេសនៅក្នុងតំបន់ដូចជាឥណ្ឌូណេស៊ី កម្ពុជា ភូមា ឡាវ វៀតណាមកំពុងមានកំណើនអ្នកឆ្លងថ្មីខ្ពស់ខ្លាំង ដោយហេតុ “ដែលតា” ក្រុមហ៊ុនផលិតឱសថPfizer/BioNTech គ្រោងនឹងលើកសំណើទៅអឺរ៉ុបនិងសហរដ្ឋអាមេរិក ឱ្យចាក់ថ្នាំបង្ការកូវីដ ដូសទីបី ដើម្បីបង្កើនប្រសិទ្ធភាពវ៉ាក់សាំងទល់នឹងការបំប្លែងខ្លួនរបស់មេរោគ។
បើតាមសិក្សារបស់ក្រុមហ៊ុន ការចាក់ថ្នាំបង្ការរំលឹកម្ជុលទីបី នៅ៦ខែក្រោយដូសទីពីរ អាចបង្កើនកំរិតអង់ទីក័របាន៥ទៅ៦ដងលើសការចាក់តែពីរដូស និងមានប្រសិទ្ធភាពកម្ចាត់មេរោគកូវីដបំប្លែងខ្លួនអាហ្វ្រិកខាងត្បូង Beta ផង និង “ដែលតា” ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ