ក្រុមតាលីបង់បង្កើនការវាយប្រហារ និងសម្លាប់បានមន្រ្តីជាន់ខ្ពស់រដ្ឋាភិបាលអាហ្វហ្កានីស្ថាន
ក្រុមតាលីបង់បានសម្លាប់ មន្រ្តីជាន់ខ្ពស់រដ្ឋាភិបាលអាហ្វហ្កានីស្ថាន និងវាយដណ្តើមយកបាន ជាលើកដំបូង ទីក្រុងមួយរបស់រដ្ឋាភិបាលអាហ្វហ្កានីស្ថាន។ កំពុងជាប់ដៃប្រយុទ្ធជាមួយកងទ័ពរដ្ឋាភិបាល ក្រុមតាលីបង់ដែលចង់បង្កើតរបបគ្រប់គ្រងបែបអ៊ីស្លាមតឹងរ៉ឹង បានប្រកាសទទួលខុសត្រូវលើឃាតកម្មសម្លាប់ប្រធានមជ្ឈមណ្ឌលព័ត៌មានរបស់រដ្ឋាភិបាលអាហ្វហ្កានីស្ថាន កាលពីថ្ងៃសុក្រ ទី ៦សីហា។
ចុះផ្សាយនៅថ្ងៃ៖
ប្រធានមជ្ឈមណ្ឌលផ្សព្វផ្សាយ ព័ត៌មានរបស់រដ្ឋាភិបាល អាហ្វហ្កានីស្ថាន លោកDawa Khan Menapal ត្រូវបានជនប្រដាប់អាវុធតាលីបង់ បាញ់សម្លាប់ នៅក្នុងពិធីសូត្រធម៌ នៅព្រះវិហារអ៊ីស្លាម ក្នុងរដ្ឋធានីកាប៊ូល កាលពីល្ងាចថ្ងៃសុក្រ។ លោកជាមន្រ្តីម្នាក់ក្នុងចំណោមមន្រ្តីជាន់ខ្ពស់របស់រដ្ឋាភិបាលអាហ្វហ្កានីស្ថាន ជាច្រើននាក់ដែលបានក្លាយជាផ្ទាំងស៊ីបវាយប្រហារ របស់ពួកតាលីបង់ នៅប៉ុន្មានថ្ងៃមកនេះ។ កាលពីថ្ងៃអង្គារ រដ្ឋមន្រ្តីការពារជាតិអាហ្វហ្កានីស្ថាន បានរួចរស់ផុតពីការប៉ុនប៉ងធ្វើឃាតបំផ្ទុះគ្រាប់បែក របស់ពួកទាហានតាលីបង់ ដែលបានបន្លំខ្លួន ចូលវាយប្រហារក្នុងទីក្រុងកាប៊ូល។
នៅថ្ងៃសុក្រនេះ អ្នកនាំពាក្យរបស់ពួកតាលីបង់ បានចេញមុខប្រកាសទទួលស្គាល់ឃាតកម្ម ទៅលើមន្រ្តីព័ត៌មានអាហ្វហា្កនីស្ថានថា ជាស្នាដៃរបស់កងកម្លាំងពិសេស របស់តាលីបង់។ នៅក្រោយបរាជ័យ មិនអាចសម្លាប់រដ្ឋមន្រ្តីការពារជាតិអាហ្វហ្កានីស្ថាន ក្រុមតាលីបង់ធ្លាប់បានព្រមានតាំងពីថ្ងៃពុធថា នឹងតាមសម្លាប់មន្រ្តីរដ្ឋាភិបាលអាហ្វហ្កានីស្ថាន ដើម្បីសងសឹកនឹងការវាយប្រហារ របស់កងទ័ពអាហ្វហ្កានីស្ថានទៅលើក្រុមតាលីបង់ នៅតំបន់ភាគខាងត្បូង អាហ្វហ្កានីស្ថាន។
នៅប៉ុន្មានសប្តាហ៍មកនេះ កងទ័ពរដ្ឋាភិបាលអាហ្វហ្កានីស្ថាន រួមជាមួយ អាមេរិកបានបង្កើនការវាយប្រហារតាមផ្លូវអាកាស ទៅលើក្រុមតាលីបង់ ដែល កំពុងវាយសម្រុក ចូលកាន់តែកៀក ឡោមព័ទ្ធ ទីក្រុងធំៗនៅភាគខាងត្បូង អាហ្វហ្កានីស្ថាន ដូចជា Kandahar និងHérat ជាដើម។ នៅថ្ងៃសុក្រ ទីក្រុង Zaranj ក្នុងខេត្តNimroz ភាគនិរតី ជាប់ព្រំដែនអ៊ីរ៉ង់បានក្លាយជាទីក្រុងលើកដំបូង គេរបស់រដ្ឋាភិបាលដែលបានធ្លាក់ក្នុងដៃរបស់ពួកតាលីបង់។
បេសកកម្មរបស់អង្គការសហប្រជាជាតិសម្រាប់អាហ្វហ្កានីស្ថានធ្លាប់បានសំដែងក្តីបារម្ភ ពីសុវត្ថិភាព សន្តិសុខរបស់ប្រជាជនស៊ីវិល រាប់ម៉ឺននាក់ដែលនៅជាប់គាំង ក្នុងសមរភូមិ ប្រយុទ្ធរវាងពួកតាលីបង់ និងកងទ័ពរដ្ឋាភិបាល។
ការវាយសម្រុក បោះជំហានទៅមុខ របស់ពួកតាលីបង់ នៅអាហ្វហ្កានីស្ថាន ក៏ជាប្រធានបទសំខាន់មួយដែរ នៃជំនួបកំពូលរបស់មេដឹកនាំបណ្តាប្រទេសអាស៊ីកណ្តាល កាលពីថ្ងៃសុក្រ។ ថ្វីត្បិតថា ក្រុមតាលីបង់ ធ្លាប់សន្យាថា នឹងមិនគំរាមកំហែងប្រទេសជិតខាង នៅតំបន់អាស៊ីកណ្តាល ដោយបានកសាងទំនាក់ទំនងការទូតជាមួយប្រទេសអ៊ូសបេគីស្ថាន និងតួកមេនីស្ថានក្តី ប៉ុន្តែ អ្នកជំនាញវាយតម្លៃថា ស្ថានភាពសន្តិសុខ កាន់តែធ្លាក់ចុះអាក្រក់ នៅអាហ្វហ្កានីស្ថាន នឹងគំរាមកំហែងទាំងស្រុង ដល់តំបន់អាស៊ីកណ្តាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ