ក្រុមតាលីបង់វាយដណ្តើមកាន់កាប់ទីក្រុងកាន់តែច្រើនរបស់រដ្ឋាភិបាលអាហ្វហ្កានីស្ថាន
បន្ទាប់ពីវាយដណ្តើមយកបានទីក្រុងទី២របស់រដ្ឋាភិបាលអាហ្វហ្កានីស្ថាន ក្នុងរយៈពេល តែ២៤ម៉ោង ក្រុមតាលីបង់បានប្រកាសនៅថ្ងៃអាទិត្យទី ៨ សីហាថា ខ្លួនទើបវាយចូលគ្រប់គ្រងទីក្រុងមួយទៀត គឺទីក្រុងKunduz នៅប៉ែកខាងជើងអាហ្វហ្កានីស្ថាន។ នៅថ្ងៃសៅរ៍ ស្ថានទូតអាមេរិកប្រចាំទីក្រុងកាប៊ូលបានអំពាវនាវឲ្យពលរដ្ឋអាមេរិកចាកចេញជាបន្ទាន់ពីអាហ្វហ្កានីស្ថាន ដោយយោងទៅលើស្ថានភាពសន្តិសុខ និងការវិវឌ្ឍន៍ចុងក្រោយ នៅអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០៣:០៣
ក្នុងរយៈពេលតែ ៣ថ្ងៃ ក្រុមតាលីបង់ បានវាយដណ្តើម យកបានទីក្រុង ចំនួន៤ របស់រដ្ឋាភិបាលអាហ្វហ្កានីស្ថាន។ នៅថ្ងៃអាទិត្យ បន្ទាប់ពីទីក្រុង Kunduz ទីក្រុងSar e Pul នៅប៉ែកពាយ័ព្យបានក្លាយជាទីក្រុងទី៤របស់អាហ្វហ្កានីស្ថាន ដែលធ្លាក់ក្នុងដៃរបស់ពួកតាលីបង់។
តាមក្រុមប្រឹក្សាខេត្តSar e Pul ទីក្រុងទាំងមូលស្ថិតក្រោមការគ្រប់គ្រងរបស់ពួកតាលីបង់ដែលកំពុងបន្តឡោមព័ទ្ធ កងពលអាហ្វហ្កានីស្ថាន នៅជាយក្រុង។
ឆ្លៀតឱកាសដែលកងទ័ពបរទេស ជាពិសេស កងទ័ពអាមេរិកត្រូវដកចេញពីអាហ្វហ្កានីស្ថាន យ៉ាងយូរបំផុត នៅថ្ងៃទី ៣១សីហា ក្រុមតាលីបង់បានបើកការវាយប្រហារទៅលើកងទ័ពរដ្ឋាភិបាល៣ខែមកនេះ ដោយបានចូលទៅឡោមព័ទ្ធទីក្រុងធំៗ របស់អាហ្វហ្កានីស្ថាន
កាលពីថ្ងៃសុក្រ ក្រុមតាលីបង់បានវាយចូលគ្រប់គ្រងជាលើកទី១ទីក្រុង Zaranj ជាប់ព្រំដែនអ៊ីរ៉ង់។ តាមសាក្សីដែលទីភ្នាក់ងារព័ត៌មានបារាំង បានសម្ភាសន៍សាកសួរ បន្ទាប់ពីឮសន្ធឹកគ្រាប់កាំភ្លើង និងគ្រាប់បែក គេឃើញពួកទាហានតាលីបង់ដើរចូលទីក្រុង ដោយគ្មានការបាញ់តដៃច្រើនពីកងទ័ពរដ្ឋាភិបាល។ សាក្សីជាច្រើននិយាយថា គេឃើញកងទ័ពរដ្ឋាភិបាលអាហ្វហ្កានីស្ថានបានដកខ្លួនថយចេញពីសមរភូមិប្រយុទ្ធ ដោយបណ្តោយទុកឲ្យពួកតាលីបង់ចូលកាន់កាប់ទីក្រុង។
ហេតុអ្វីបានជាកងទ័ពរដ្ឋាភិបាល មិនតស៊ូប្រយុទ្ធតទល់នឹងពួកតាលីបង់?
កន្លងមក មន្រ្តីរដ្ឋាភិបាលអាហ្វហ្កានីស្ថានធ្លាប់អះអាងថា ប្រឈមនឹងការវាយប្រហាររបស់ពួកតាលីបង់ នៅគ្រប់មុខព្រួញ កងទ័ពរដ្ឋាភិបាលសម្រេចដកខ្លួនមកការពារទីក្រុងធំៗរបស់អាហ្វហ្កានីស្ថាន។ ប៉ុន្តែ អ្នកជំនាញមួយចំនួនយល់ថា យុទ្ធនាការឃោសនារបស់ពួកតាលីបង់ដែលផ្សព្វផ្សាយមិនឈប់ពីជ័យជំនះ និងការវាយដណ្តើមយកបាន ជាបន្តបន្ទាប់ទីតាំងរបស់រដ្ឋាភិបាលអាហ្វហ្កានីស្ថាន បានធ្វើឲ្យកងទ័ពអាហ្វហ្កានីស្ថានបាក់ទឹកចិត្ត ដោយពេលខ្លះ ពួកគេមួយចំនួន បានទម្លាក់អាវុធ រត់ចោលសមរភូមិប្រយុទ្ធ។ ក្រុមតាលីបង់បានវាយដណ្តើមគ្រប់គ្រងតំបន់ និងប៉ុស្តត្រួតពិនិត្យព្រំដែន ជាច្រើន ដែលសុទ្ធសឹងជាច្រកចេញចូល នាំប្រភពចំណូលសំខាន់សម្រាប់រដ្ឋាភិបាលអាហ្វហ្កានីស្ថាន ដូចជានៅព្រំដែនអ៊ីរ៉ង់ ប៉ាគីស្ថាន តាហ្ស៊ីគីស្ថាន តួកមេនីស្ថាន។
ការបោះជំហាន លឿនទៅមុខ របស់ពួកតាលីបង់ ដោយវាយដណ្តើមចូលកាន់កាប់ទីក្រុងកាន់តែច្រើនរបស់អាហ្វហ្កានីស្ថាន បានបង្កើតឲ្យមានក្តីបារម្ភពីសន្តិសុខ សុវត្ថិភាព ក្នុងរដ្ឋធានីកាប៊ូល។
ការវាយប្រហារភេរវកម្ម រៀបចំឡើងដោយក្រុមតាលីបង់ នៅកាប៊ូល ដែលបានសម្លាប់ ប្រធានមជ្ឈមណ្ឌលព័ត៌មានរបស់រដ្ឋាភិបាល អាហ្វហ្កានីស្ថាន ជាសញ្ញានៃអសន្តិសុខ មួយទៀត ដែលធ្វើឲ្យស្ថានទូតអាមេរិកចាត់វិធានការដូចស្ថានទូតអង់គ្លេស ដោយបានប្រកាសឲ្យពលរដ្ឋរបស់ខ្លួនចាកចេញពីអាហ្វហ្កានីស្ថាន។ តាមការប្រកាសរបស់ស្ថានទូតអាមេរិក នៅទីក្រុងកាប៊ូល ដោយយោងទៅលើស្ថានភាពអសន្តិសុខ ហើយនិង កម្លាំងការពារ សន្តិសុខមានចំនួនកំណត់ ពលរដ្ឋអាមេរិកត្រូវចាកចេញជាបន្ទាន់ពីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ