បង់ក្លាដែសចាប់ផ្តើមចាក់វ៉ាក់សាំង បង្ការកូវីដនៅក្នុងជំរំជនភៀសខ្លួនរ៉ូហ៊ីងយ៉ា
ប្រឈមនឹងសន្ទុះឆ្លងរាលដាលខ្លាំងនៃជំងឺកូវីដ ក្នុងជំរំជនភៀសខ្លួន អាជ្ញាធរបង់ក្លាដែស រួមជាមួយទីភ្នាក់ងារអន្តរជាតិចាប់ផ្តើម នៅថ្ងៃអង្គារនេះ យុទ្ធនាការ ចាក់វ៉ាក់សាំង រយៈពេល ៣ថ្ងៃ ដល់ប្រជាជនរ៉ូហ៊ីងយ៉ា ដែលកំពុងរស់នៅភៀសខ្លួន ក្នុងទឹកដីបង់ក្លាដែស។ ក្រៅតែពីជំរំភៀសខ្លួន នៅស្រុកCox’s Bazar យុទ្ធនាការចាក់វ៉ាក់សាំងត្រូវចាប់ផ្តើមផងដែរ សម្រាប់ជនភៀសខ្លួនរ៉ូហ៊ីងយ៉ា ជិត ២ពាន់នាក់ ដែលអាជ្ញាធរបង់ក្លាដែស បានចាប់បញ្ជូនយកទៅដាក់នៅកូនកោះ Bhashan Char។
ចុះផ្សាយនៅថ្ងៃ៖
ស្តាប់ - ០២:៤៧
មានករណីឆ្លងកូវីដ សរុបជាង ១លាន ៣សែននាក់ និងមានមនុស្សស្លាប់២២ ៨៩៧នាក់ បង់ក្លាដែស កំពុងប្រឈមនឹងរលកឆ្លងថ្មី នៅគ្រប់ទីកន្លែង ដោយសារមេរោគបំប្លែងខ្លួន “ដែលតា”។
ក្នុងជំរំជនភៀសខ្លួន ក្នុងស្រុកCox’s Bazar ដែលប្រមូលផ្តុំជនជាតិភាគតិច រ៉ូហ៊ីងយ៉ា ជាង៨សែននាក់ មេរោគកូវីដ បានឆ្លងរាតត្បាតទៅមនុស្សជាង ២ម៉ឺននាក់ និងសម្លាប់មនុស្ស២០០០នាក់។ ដើម្បីទប់ស្កាត់ ការឆ្លងរាលដាលលឿន នៃមេរោគកូវីដ រដ្ឋាភិបាលបង់ក្លាដែស បានរួមគ្នាជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន អង្គការគ្រូពេទ្យគ្មានព្រំដែន និងកាកបាទក្រហមអន្តរជាតិ ដើម្បីផ្តើមយុទ្ធនាការចាក់វ៉ាក់សាំងដល់ជនភៀសខ្លួនរ៉ូហ៊ីងយ៉ា ក្នុងជំរំភៀសខ្លួន នៅស្រុក Cox’s Bazar។
តាមអ្នកទទួលខុសត្រូវផ្នែកសុខភាពរបស់ស្រុក Cox’sBazar ក្នុងយុទ្ធនាការចាក់វ៉ាក់សាំង រយៈពេល ៣ថ្ងៃ ដែលចាប់ផ្តើម នៅថ្ងៃអង្គារនេះ គេគ្រោងនឹងចាក់វ៉ាក់សាំងដល់ជនជាតិរ៉ូហ៊ីងយ៉ា ឲ្យបាន ជាង ៤ម៉ឺននាក់។ ប្រធានសហគមន៍ រ៉ូហ៊ីងយ៉ា បុគ្គលិកស្ម័គ្រចិត្តដែលធ្វើការនៅក្នុងជំរំ ហើយនិងជនជាតិរ៉ូហ៊ីងយ៉ា ដែលមានអាយុចាប់ពី ៥៥ឆ្នាំឡើងទៅ ជា ក្រុមមនុស្សដែលត្រូវទទួលថ្នាំបង្ការជំងឺកូវីដ Sinopharmដែលផលិតឡើងនៅប្រទេសចិន។
អ្នកទទួលខុសត្រូវរបស់អង្គការគ្រូពេទ្យគ្មានព្រំដែន ប្រចាំនៅបង់ក្លាដែស លោក Romain Briey បាននិយាយថា អ្នកដែលបញ្ហាសុខភាព ដូចជា ជំងឺលើសឈាម ជំងឺបេះដូង ទឹកនោមផ្អែម រោគហឺត ឬជំងឺធាត់ជ្រុលនឹងទទួលបានអាទិភាព ចាក់វ៉ាក់សាំងបង្ការកូវីដ។ សម្រាប់លោក ការចាក់វ៉ាក់សាំងដល់មនុស្សគ្រប់អាយុ នឹងជួយទប់ស្កាត់ ការរីករាតត្បាតជំងឺកូវីដក្នុងចំណោមប្រជាជនភៀសខ្លួនរ៉ូហ៊ីងយ៉ា។
នៅក្នុងសេចក្តីប្រកាស នៅថ្ងៃអង្គារនេះ អង្គការកាកបាទក្រហម បានអះអាងថា វ៉ាក់សាំងបង្ការកូវីដ អំណោយដ៏សំខាន់ សម្រាប់ឲ្យគ្រួសាររ៉ូហ៊ីងយ៉ា ត្រលប់ទៅរស់នៅក្នុងភាពថ្លៃថ្នូរ ព្រោះថា ដោយសារកូវីដ ជនជាតិរ៉ូហ៊ីងយ៉ា ត្រូវរស់នៅបិទខ្ទប់ គ្មានសេរីភាព នៅក្នុងជំរំមួយ ដែលពួកគេ ពិបាកនឹងទទួលបានទឹកស្អាត និងសេវាពេទ្យ រួចស្រាប់ហើយនោះ។
មកជ្រកកោនក្នុងជំរំភៀសខ្លួន ក្នុងទឹកដីបង់ក្លាដែស នៅក្រោយរត់គេចចេញពីអំពើហិង្សា ការធ្វើទុក្ខម្នេញ ក្នុងរដ្ឋរ៉ាឃីន ប្រទេសភូមា ប្រជាជនរ៉ូហ៊ីងយ៉ាកាន់សាសនាអ៊ីស្លាមជាង ១លាននាក់ គ្មានសង្ឃឹមនឹងត្រលប់ទៅរស់នៅ ក្នុងទឹកដីភូមា ក្នុងពេលឆាប់ៗខាងមុខនេះទេ។
ជាមួយយន្តការកូវ៉ាក់ ដែលសន្យាផ្តល់វ៉ាក់សាំងជាង១០លានដូសដល់បង់ក្លាដែស អង្គការអន្តរជាតិបានទាមទារឲ្យរដ្ឋាភិបាលបង់ក្លាដែស រក្សាទុកវ៉ាក់សាំង មួយផ្នែកសម្រាប់ជនភៀសខ្លួន រ៉ូហ៊ីងយ៉ា។ ប៉ុន្តែ យុទ្ធនាការចាក់វ៉ាក់សាំង បង្ការកូវីដដល់ប្រជាជនភៀសខ្លួនរ៉ូហ៊ីងយ៉ា ត្រូវបានលើកពេល ជាច្រើនដង ដោយសារ បង់ក្លាដែស ខ្វះខាត មិនដែលបានទទួលវ៉ាក់សាំងពីយន្តការកូវ៉ាក់ ឬវ៉ាក់សាំង ដែលបង់ក្លាដែសបានកុម្ម៉ង់ទិញពីឥណ្ឌា នៅក្រោយ ឥណ្ឌាប្រកាសផ្អាក នាំចេញវ៉ាក់សាំង សម្រាប់ការប្រើប្រាស់ក្នុងស្រុក កាលពីខែមេសាកន្លងទៅ។
គិតរហូតមកដល់ពេលនេះ មានតែ ៥%នៃប្រជាជន សរុប ១៦០លាននាក់ របស់បង់ក្លាដែស ដែលបានទទួលថ្នាំបង្ការកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ