ស្រីលង្កាប្រកាសអាសន្នពីកង្វះស្បៀងអាហារ ខណៈដែលប្រទេសបន្តផុងខ្លួនក្នុងវិបត្តិសេដ្ឋកិច្ច
នៅថ្ងៃអង្គារ ទី៣១ សីហា ប្រធានាធិបតីស្រីលង្កាលោកហ្គោតាបាយ៉ា រ៉ាយ៉ាប៉ាក់សាបានប្រកាសដាក់ប្រទេសក្នុងស្ថានភាពអាសន្នស្បៀងអាហារ។ ការប្រកាសនេះបានធ្វើឡើង ខណៈដែលប្រទេសកំពុងជួបវិបត្តិសេដ្ឋកិច្ច និងរូបិយវត្ថុធ្ងន់ធ្ងរ។ នៅក្នុងវិធានការបន្ទាន់ពេលនេះ លោករ៉ាយ៉ាប៉ាក់សាបានបញ្ជាឲ្យចាត់វិធានការប្រឆាំងនឹងការប្រមូលស្តុកទុកនូវផលិតផលចាំបាច់មួយចំនួន ដូចជាស្ករ អង្ករ និងផលិតចាំបាច់ផ្សេងទៀត។
ចុះផ្សាយនៅថ្ងៃ៖
ដើម្បីប្រឈមទប់នឹងកង្វះស្បៀងអាហារ ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាបានបញ្ជាក់ថា លោកបានបញ្ជាឲ្យបង្កើតវិធានការបន្ទាន់មួយចំនួនដើម្បីប្រឆាំងទប់នឹងការប្រមូលស្តុកទុកនូវផលិតផលស្ករ អង្ករ និងផលិតផលចាំបាច់ផ្សេងទៀត។ ទន្ទឹមនឹងប្រឆាំងនឹងការប្រមូលស្តុកទុក រដ្ឋាភិបាលក៏បានសម្រេចរឹតបន្តឹងទណ្ឌកម្មលើការស្តុកទុកនូវគ្រាប់ធញ្ញជាតិដែរ ខណៈដែលមានមនុស្សជាច្រើនកំពុងតម្រង់ជួរនៅតាមហាងលក់ទំនិញ។ ចំណាត់ការរបស់រដ្ឋាភិបាលពេលនេះបានធ្វើឡើង ខណៈដែលតម្លៃស្ករ អង្ករ ខ្ទឹមបារាំង និងដំឡូងបារាំងបានឡើងថ្លៃខ្ពស់ខ្លាំង។ ទន្ទឹមគ្នានេះ ប្រទេសដែលមានពលរដ្ឋចំនួន ២១លាននាក់ក៏កំពុងជួបការខ្វះខាតទឹកដោះគោម្សៅ និងហ្គាសសម្រាប់ចំអិនអាហារ។
កង្វះផលិតផលទាំងនេះបានកើតមានឡើងក្នុងពេលដែលប្រទេសកំពុងប្រឈមនឹងជំងឺកូវីដ១៩ ដោយមានអ្នកស្លាប់ចំនួន ២០០នាក់ក្នុងមួយថ្ងៃ។ តាំងពីថ្ងៃផ្ទុះកូវីដ១៩ ដំបូង ស្រីលង្កាមានករណីឆ្លងផ្លូវការចំនួន ៤៣៦ ០៨១ និងមានអ្នកស្លាប់ចំនួន ៨ ៩៩១នាក់។ ការធ្លាក់ចុះយ៉ាងគំហុកនូវវិស័យទេសចរណ៍តាំងពីខែមីនា ឆ្នាំ ២០២០ ដោយសារវិបត្តិកូវីដ១៩ បានធ្វើឲ្យសេដ្ឋកិច្ចធ្លាក់ចុះ ៣,៦% ក្រោមសូន្យក្នុងឆ្នាំ ២០២០ និងបានធ្វើឲ្យប្រទេសខ្វះសាច់ប្រាក់បរទេស។ ដើម្បីសន្សំសំចៃ រដ្ឋាភិបាលបានហាមការនាំចូលនូវផលិផលមិនចាំបាច់មួយចំនួន ដូចជារថយន្ត ឬសម្ភារៈអនាម័យ។
ទន្ទឹមគ្នានេះ រដ្ឋមន្រ្តីក្រសួងថាមពលបានអំពាវនាវឲ្យអ្នកប្រើរថយន្តកុំឲ្យប្រើប្រេងច្រើនពេកដើម្បីឲ្យរដ្ឋាភិបាលយកលុយទៅទិញរបស់របរចាំបាច់ផ្សេង ដូចជាថ្នាំពេទ្យ និងវ៉ាក់សាំង។ អ្នកជំនួយការប្រធានាធិបតីម្នាក់បានព្រមានថា រដ្ឋាភិបាលអាចនឹងដំឡើងតម្លៃប្រេងពីពេលនេះទៅចុងឆ្នាំ បើការប្រើប្រាស់មិនមានការធ្លាក់ចុះទេនោះ។ គួររម្លឹកថាកាលពី ២សប្តាហ៍មុន ធនាគារកណ្តាលបានដំឡើងអត្រាការប្រាក់ក្នុងគោលដៅជួយគាំទ្រតម្លៃប្រាក់រូពី។ តាមទិន្នន័យផ្លូវការ ប្រាក់រូពីបានបាត់បង់តម្លៃជាង ២០% បើធៀបនឹងតម្លៃប្រាក់ដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ