ជប៉ុន៖គណៈប្រតិភូ AIEA ទៅហ្វូគូស្ហ៊ីម៉ាដើម្បីវាយតម្លៃលើទឹកមានវិទ្យុសកម្មដែលជប៉ុនចង់បង្ហូរចូលសមុទ្រ
នៅក្នុងប្រទេសជប៉ុន រដ្ឋាភិបាលបានសម្រេចចិត្តចាក់ទឹកចំនួនជាង ១លានតោនដែលមានសារធាតុវិទ្យុសកម្មទៅក្នុងសមុទ្រ។ ទឹកមានវត្តមានវិទ្យុសកម្មនេះត្រូវបានជប៉ុនប្រមូលទុកនៅក្រោយគ្រោះថ្នាក់នុយក្លេអ៊ែរនៅមជ្ឈមណ្ឌលហ្វូគូស្ហ៊ីម៉ាកាលពីឆ្នាំ ២០១១។ ប្រតិបត្តិការចាក់ទឹកទាំងនេះទៅក្នុងសមុទ្រត្រូវចាប់ផ្តើមនៅឆ្នាំ ២០២៣ ក្រោមការត្រួតពិនិត្យពីទីភ្នាក់ងារថាមពលបរមាណូអន្តរជាតិ។ គណៈប្រតិភូមួយក្រុមរបស់ទីភ្នាក់ងារថាមពលបរិមាណូអន្តរជាតិបានទៅដល់ក្រុងតូក្យូដើម្បីវាយតម្លៃលើគម្រោងផែនការមួយនេះរបស់ជប៉ុន។
ចុះផ្សាយនៅថ្ងៃ៖
ស្តាប់ - ០២:២៣
គណៈប្រតិភូរបស់ទីភ្នាក់ងារថាមពលបរិមាណូអន្តរជាតិមានសមាជិកជាអ្នកជំនាញបស្ចិមលោក អ្នកជំនាញចិន និងអ្នកជំនាញកូរ៉េខាងត្បូង។ ក្រុមការងាររបស់អ្នកជំនាញនេះមានតួនាទីផ្ទៀងផ្ទាត់ពីតម្លាភាព និងសន្តិសុខនៃគម្រោងរបស់ជប៉ុន។ នៅក្នុងគម្រោងនោះ ជប៉ុននឹងបង្ហូរចូលសមុទ្រនូវទឹកជាង ១លានតោនដែលប្រមូលបានពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ានៅក្រោយគ្រោះថ្នាក់កាលពីឆ្នាំ ២០១១។ ទឹកដែលប្រមូលបាន គឺសុទ្ធសឹងជាទឹកដែលគេប្រើសម្រាប់ធ្វើឲ្យត្រជាក់ម៉ាស៊ីនប្រតិកម្ម និងទឹកក្រោមដីដែលជ្រាបចូលទៅក្រោមអគាររបស់ម៉ាស៊ីនប្រតិកម្ម។
ក្រុមហ៊ុន Tepco ដែលជាអ្នកទទួលបន្ទុកសំអាត និងរុះរើមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាបានប្រកាសនាដំណាច់ខែសីហាថា គម្រោងនៃការបង្ហូរទឹកជាង ១លានតោនទៅក្នុងសមុទ្រនឹងត្រូវធ្វើឡើងតាមបំពង់មួយដែលមានវិជ្ជមាត្រ ២,៥ម៉ែត្រ ហើយបំពង់នេះនឹងត្រូវទាញទម្លាក់ចូលបាតសមុទ្រឲ្យបានចម្ងាយប្រមាណ ១គីឡូម៉ែត្រ។ តាមក្រុមហ៊ុន Tepco ដដែល ដំណើរការសាងសង់បំពង់នេះនឹងត្រូវចាប់ផ្តើមពីពេលនេះទៅខែមីនាឆ្នាំ ២០២២។ គួរបញ្ជាក់ថាពេលនេះ បរិមាណទឹកនៅមជ្ឈមណ្ឌលហ្វូគូស្ហ៊ីម៉ាបានកើនប្រមាណ ១៤០តោនក្នុងមួយថ្ងៃៗ។
តែមុននឹងបង្ហូរចូលសមុទ្រ ទឹកទាំងនោះនឹងត្រូវបន្សាបចម្រោះយកសារធាតុវិទ្យុសកម្មចេញទាំងអស់។ វាលើកលែងតែសារធាតុទ្រីត្យូម (Tritium) មួយចេញដែលនឹងបន្តមានវត្តមាន។ នៅត្រង់ចំណុចនេះ ទីភ្នាក់ងារថាមពលបរិមាណូអន្តរជាតិចង់ធានាថា ទឹកដែលបានច្រោះយកធាតុវិទ្យុសកម្មរួចនឹងមានកម្រិតអត្រាសារធាតុទ្រីត្យូមកាន់តែតិចនៅពេលរលាយចូលជាមួយទឹកសមុទ្រ។ គួរបញ្ជាក់ថា ប្រតិបត្តិការចាក់ទឹកទាំងជាង ១លានតោនទៅក្នុងសមុទ្រដែលត្រូវចាប់ផ្តើមនៅឆ្នាំ ២០២៣នឹងត្រូវប្រើពេល ៣០ឆ្នាំ ឬ ៤០ឆ្នាំដែលជារយៈពេលនៃការរុះរើ កម្ទេចមជ្ឈមណ្ឌលហ្វូគូស្ហ៊ីម៉ា។
សម្រាប់ជប៉ុន វាជារឿងបន្ទាន់បំផុតដែលត្រូវជម្លៀសទឹកចេញពីមជ្ឈមណ្ឌលហ្វូគូស្ហ៊ីម៉ា ព្រោះទី១ ជិតអស់កន្លែងស្តុកទុក និងទី២ ក្រុមហ៊ុន Tepco បានចំណាយជិត ៨០០លានអឺរ៉ូក្នុងមួយឆ្នាំដើម្បីថែរក្សា និងតាមដានលើការស្តុកទឹកទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ