ជប៉ុនបានសម្រេចចាក់ទឹកប្រមូលពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទៅក្នុងសមុទ្រ
ចុះផ្សាយនៅថ្ងៃ៖
ស្តាប់ - ០៦:៤៨
នៅថ្ងៃអង្គារ ទី១៣ មេសា រដ្ឋាភិបាលជប៉ុនបានសម្រេចចិត្តជាផ្លូវការក្នុងការចាក់ទឹកជាង ១លានតោនដែលប្រមូលពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទៅក្នុងសមុទ្រ។ ការសម្រេចចិត្តនេះបានបិទបញ្ចប់លើភាពចម្រូងចម្រាសរយៈពេល ៧ឆ្នាំក្នុងការរិះរកវិធីដោះស្រាយរំដោះទឹកមានជាតិពុលចេញពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាដែលបានជួបគ្រោះថ្នាក់ដោយរលកយក្សស៊ូណាមីកាលពីថ្ងៃទី១១ មីនា ២០១១។ ក៏ប៉ុន្តែ ការសម្រេចចិត្តនេះបានបង្កឲ្យមានប្រតិកម្មប្រឆាំង និងព្រួយបារម្ភពីក្រុមអ្នកនេសាទក្នុងស្រុក ពីក្រុមអ្នកបរិស្ថាន និងពីក្រុមប្រទេសជិតខាង ពិសេសចិន និងកូរ៉េខាងត្បូង។
ទឹកនៅមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាដែលរដ្ឋាភិបាលជប៉ុនបានសម្រេចចាក់ចូលសមុទ្រមាន ៣ប្រភេទសំខាន់ ទី១ ជាទឹកភ្លៀងដែលប្រមូលបាននៅទីតាំងមជ្ឈមណ្ឌល ទី២ ជាទឹកដែលបូមពីក្រោមដីនៅទីតាំងមជ្ឈមណ្ឌល និងទី៣ ជាទឹកដែលគេបានចាក់ស្រោចលើម៉ាស៊ីនប្រតិកម្មដើម្បីធ្វើឲ្យត្រជាក់នៅពេលមានគ្រោះថ្នាក់ផ្ទុះបង្កឡើងដោយរលកយក្សស៊ូណាមីកាលពី ១០ឆ្នាំមុន។ សរុបទៅ មានទឹកប្រមាណជា ១ ២៥០ ០០០តោនដែលជប៉ុននឹងចាក់ចូលក្នុងសមុទ្រ។ ទឹកទាំងជាង ១លានតោននេះកំពុងស្តុកទុកនៅក្នុងស៊ីទែនជាង ១ ០០០ស៊ីទែននៅក្បែរមជ្ឈមណ្ឌល។ គួររម្លឹកថា ១០ឆ្នាំ ក្រោយគ្រោះថ្នាក់នៅមជ្ឈមណ្ឌលនុយក្លេអ៊ែរហ្វូគូស្ហ៊ីម៉ា រដ្ឋាភិបាលជប៉ុនដេកឈឺក្បាលពីបរិមាណទឹកដ៏ច្រើនសម្បើមដែលប្រមូលបាននៅទីតាំងមជ្ឈមណ្ឌលនោះ។
ដេកឈឺក្បាល ព្រោះទី១ ជាទឹកមានសារធាតុវិទ្យុសកម្មដែលគេមិនអាចយកទៅចាក់ចោលកន្លែងណាក៏បាន និងទី២ ចំនួនទឹកចេះតែកើនឡើងជារៀងរាល់ថ្ងៃនៅទីតាំងមជ្ឈមណ្ឌលនោះ។ ជាក់ស្តែងក្នុងឆ្នាំ ២០២០ កំណើនចំនួនទឹកមានវត្តមានសារធាតុវិទ្យុសកម្មក្នុងមួយថ្ងៃៗមានប្រមាណជា ១៤០ម៉ែត្រគូប។ អ្វីជាការកត់សម្គាល់ ទឹកដែលជប៉ុននឹងចាក់ចូលសមុទ្រជាទឹកដែលត្រូវបានគេបន្សុទ ឬត្រូវបានគេច្រោះយកសារធាតុវិទ្យុសកម្មចេញអស់ហើយ។ យ៉ាងណាក៏ដោយ យុទ្ធនាការរំដោះទឹកនេះមិនមែនធ្វើភ្លាមៗទេ ពោលប្រហែលជានៅ ២ឆ្នាំខាងមុខ។
ហេតុអ្វីបានជាជ្រើសយកជម្រើសចាក់ចូលក្នុងសមុទ្រ?
ការចរចារិះរកវិធីសាស្រ្តដើម្បីរំដោះទឹកចេញពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាបានធ្វើឡើងយ៉ាងប្រទាញប្រទង់អស់រយៈពេល ៧ឆ្នាំកន្លងមក។ រដ្ឋាភិបាលបានរួមប្រជុំជាមួយគ្រប់ភាគីពាក់ព័ន្ធទាំងអស់ មានទាំងភាគីជាតិ និងអន្តរជាតិ ពិសេសជាមួយក្រុមអ្នកជំនាញផ្នែកវិទ្យុសកម្ម ផ្នែកថាមពលបរមាណូ ក្រុមអ្នកវិទ្យាសាស្រ្ត និងក្រុមអ្នកបរិស្ថាន។ សម្រាប់រដ្ឋាភិបាលក្រុងតូក្យូ វាជារឿងបន្ទាន់ខ្លាំងណាស់ដែលគេត្រូវរំដោះទឹកទាំងនោះចេញ។ ជារឿងបន្ទាន់ ព្រោះកន្លែងស្តុកមានកំណត់ និងគ្មានកន្លែងស្តុកទៀតឡើយចាប់ពីឆមាសទី២ ឆ្នាំ ២០២២ ទៅ។ តាមពិត មានជម្រើសមួយចំនួនដែលបានលើកយកទៅជជែកដើម្បីរំដោះទឹកចេញ ដូចជាបំឡែងទឹកទាំងនោះឲ្យទៅជាចំហាយទៅក្នុងអាកាស ស្តុករយៈពេលយូរ ឬមួយក៏បង្ហូរចូលក្នុងសមុទ្រ។
នៅទីបំផុត រដ្ឋាភិបាលបានសម្រេចបង្ហូរចូលសមុទ្រ ក្រោយពីបានពិគ្រោះយោបល់ជាមួយក្រុមអ្នកជំនាញ និងទីភ្នាក់ងារថាមពលបរមាណូអន្តរជាតិហៅកាត់ AIEA។ AIEA យល់ថា ជម្រើសបង្ហូរចូលសមុទ្រជាជម្រើសល្អ និងក៏ធ្លាប់ត្រូវបានប្រើដោយប្រទេសផ្សេងដែរ។ អ្នកនាំពាក្យរដ្ឋាភិបាលជប៉ុនបានធានាក្នុងថ្ងៃអង្គារ ទី១៣ មេសាថា ដំណើរការរំដោះទឹកចូលសមុទ្រនឹងត្រូវចូលរួមត្រួតពិនិត្យដោយ AIEA ដើម្បីបញ្ជាក់ពីតម្លាភាព និងភាពគ្មានគ្រោះថ្នាក់ដែលកើតចេញពីទឹកដែលត្រូវបង្ហូរចូលសមុទ្រ។ តែជម្រើសមួយនេះបានបង្កឲ្យមានក្តីបារម្ភ និងការប្រឆាំងពីក្រុមអ្នកបរិស្ថាន អ្នកនេសាទជប៉ុន និងប្រទេសជិតខាង ពិសេសចិន និងកូរ៉េខាងត្បូង។
វត្តមានកាបោន ១៤ និងសារធាតុទ្រីមីញ៉ូម
តាមការអះអាងរបស់រដ្ឋាភិបាលជប៉ុន និងមានការឯកភាពពីក្រុមភាគីពាក់ព័ន្ធ ទឹកដែលប្រមូលបានពីទីតាំងមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទាំងជាង ១លានតោន និងដែលគ្រោងចាក់ចូលសមុទ្រត្រូវបានបន្សុទយកសារធាតុវិទ្យុសកម្មចេញរួចហើយ។ ពិតណាស់ អ្វីដែលគ្រប់គ្នាបារម្ភខ្លាំងជាងគេ គឺវត្តមានសារធាតុវិទ្យុសកម្មនៅក្នុងទឹកនោះ។ តែមានក្រុមអង្គការបរិស្ថាន ដូចយ៉ាង Greenpeace បានលើកឡើងពីវត្តមានកាបោន១៤ ដែលបង្កហានិភ័យដល់ចំណីអាហារ និងធ្វើឲ្យខូច ADN ក្នុងខ្លួនមនុស្សនៅក្នុងករណីណាដែលមានបរិមាណកាបោន ១៤ច្រើន។ ក្រៅពីវត្តមានកាបោន១៤ ដែលគេមិនអាចបន្សុទដោយប្រើបច្ចេកវិទ្យាបន្សុទសារធាតុវិទ្យុសកម្មបាន ក៏នៅមានវត្តមានសារធាតុទ្រីមីញ៉ូមមួយទៀត។
ជម្រើសដែលក្រុមអង្គការបរិស្ថានចង់បាន គឺចង់ឲ្យរដ្ឋាភិបាលជប៉ុនស្តុកទឹកទាំងអស់សម្រាប់រយៈពេលយូរ។ ក្រុមអ្នកជំនាញ និងអ្នកវិទ្យាសាស្រ្តបានយល់ឃើញដូចគ្នាថា វត្តមានកាបោន១៤ និងវត្តមានសារធាតុទ្រីមីញ៉ូមនៅក្នុងទឹកប្រមូលនៅទីតាំងមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាមានអត្រាទាបដែលមិនបង្កគ្រោះថ្នាក់ដល់ជីវិតសត្វសមុទ្រ និងមនុស្សដែលបរិភោគសត្វសមុទ្រទេ។ តាមក្រុមអ្នកជំនាញ និងអ្នកវិទ្យាសាស្រ្តដដែល វត្តមានសារធាតុពុលផ្សេងទៀតនៅក្នុងសមុទ្រ ដូចជាបារតនឹងបង្កគ្រោះថ្នាក់ខ្លាំងជាងសារធាតុដែលមាននៅក្នុងទឹកប្រមូលពីទីតាំងមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទៅទៀត។
ក្រៅពីក្តីបារម្ភរបស់ក្រុមអ្នកបរិស្ថាន គឺមានការព្រួយបារម្ភពីក្រុមអ្នកនេសាទជប៉ុន រួមទាំងប្រទេសជិតខាងជប៉ុន ពិសេសចិន និងកូរ៉េខាងត្បូង។
ចិនបានចាត់ទុកការសម្រេចចិត្តរបស់ជប៉ុនថាគ្មានការទទួលខុសត្រូវដែលនឹងធ្វើឱ្យប៉ះពាល់ធ្ងន់ធ្ងរដល់សុខភាព និងសុវត្ថិភាពសាធារណៈនៅក្នុងលោក រួមទាំងប៉ះពាល់ដល់ផលប្រយោជន៍រវាងប្រទេសជិតខាង។ ពីកូរ៉េខាងត្បូងវិញ ក្រុងសេអ៊ូលបានឡើងពីហានិភ័យចំពោះបរិស្ថានសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ