ចិនបានដាក់ពាក្យសុំចូលជាសមាជិករបស់កិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក
នៅក្នុងប្រទេសចិន ក្រសួងពាណិជ្ជកម្មបានប្រកាសឲ្យដឹងនាថ្ងៃសុក្រ ទី១៧ កញ្ញាពីការដាក់ពាក្យសុំចូលជាសមាជិករបស់កិច្ចព្រមព្រៀងទូលំទូលាយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក។ គួររម្លឹកថា កិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិកដែលហៅកាត់ជាភាសាអង់គ្លេស CPTPP មួយនេះបានចុះហត្ថលេខាកាលពីឆ្នាំ ២០១៨ និងមានសមាជិកចំនួន ១១ប្រទេស ក្នុងនោះក៏មានអូស្រ្តាលីមួយដែរ។ អូស្រា្តលីដែលគេដឹងថាកំពុងមានទំនាក់ទំនងមិនសូវល្អជាមួយចិន។
ចុះផ្សាយនៅថ្ងៃ៖
ស្តាប់ - ០២:២៨
តាមការបញ្ជាក់របស់រដ្ឋមន្រ្តីក្រសួងពាណិជ្ជកម្មចិនលោកវ៉ាង វេនតាវ ចិនបានផ្ញើពាក្យសុំចូលជាសមាជិករបស់កិច្ចព្រមព្រៀងទូលំទូលាយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក CPTPP ទៅឲ្យរដ្ឋមន្រ្តីក្រសួងពាណិជ្ជកម្មនូវែលសេឡង់លោកដាមៀង អូខុនន័រ។ ចំណែកក្រសួងពាណិជ្ជកម្មចិនបានអះអាងថា នៅក្នុងកិច្ចសន្ទនាតាមទូរស័ព្ទ លោកវ៉ាង វេនតាវ និងសមភាគីនូវែលសេឡង់លោកដាមៀង អូខុនន័របានជជែកគ្នាពីដំណាក់ការបន្ទាប់នៃពាក្យសុំចូលរបស់ចិនទៅក្នុង CPTPP។ ចុះហត្ថលេខាកាលពីឆ្នាំ ២០១៨ CPTPP មានសមាជិកចំនួន ១១ប្រទេស គឺជប៉ុន កាណាដា អូស្រា្តលី វៀតណាម នូវែលសេឡង់ សិង្ហបុរី ម៉ិចស៊ិក ប៉េរូ ព្រុយណេ ឈីលី និងម៉ាឡេស៊ី។
CPTPP តំណាងឲ្យប្រមាណជា ១៣,៥% នៃសេដ្ឋកិច្ចសកល ហើយការដោះដូរពាណិជ្ជកម្មរវាងប្រទេសសមាជិកទទួលបានការរួចពន្ធចំនួន ៩៥%។ គួរបញ្ជាក់ថា នេះមិនមែនជាលើកទី១ ទេដែលចិនបានបង្ហាញពីចំណាប់អារម្មន៍ និងឆន្ទៈចង់ចូលខ្លួនទៅក្នុង CPTPP។ ក្នុងខែមីនាកន្លងទៅថ្មីៗនេះ នាយករដ្ឋមន្រ្តីចិនលោកលី ខឺជាំងបានថ្លែងថា ចិនដែលជាមហាអំណាចសេដ្ឋកិច្ចទី២ ក្នុងលោកកំពុងគិតគូរយ៉ាងសកម្មដើម្បីចូលជាសមាជិករបស់ CPTPP។ ក្នុងរយៈពេលចុងក្រោយនេះ ចិនបានបង្កើនគំនាបដាក់ប្រទេសសមាជិកផ្សេងឲ្យទទួលយកបេក្ខភាពរបស់ខ្លួនដោយគូសបញ្ជាក់ថា សេដ្ឋកិច្ចចិន និងអូស្រា្តលីមានសក្តានុពលធំធេងសម្រាប់កិច្ចសហប្រតិបត្តិការ។
គួរបញ្ជាក់ថា ដើម្បីអាចបន្ថែមសមាជិកថ្មីបាន លុះត្រាណាតែសមាជិកទាំង ១១ប្រទេសរបស់ CPTPP រកឃើញកុងសង់ស៊ុសរួមមួយ។ តែនៅក្នុងជំហានដំបូង ចិនត្រូវសម្រុះសម្រួលជាមួយអូស្រា្តលីជាមុនសិន ព្រោះខណៈនេះ ទំនាក់ទំនងរវាងចិន និងអូស្រា្តលីកំពុងបំពុលដោយរឿងរ៉ាវមួយចំនួន ពិសេសការដែលចិនបានដំឡើងពន្ធលើផលិតអូស្រ្តាលីនាំចូលចិន ពិសេសស្រា និងគ្រាប់ធញ្ញជាតិខ្លះ។ នៅក្នុងរឿងចម្រូងចម្រាសមួយនេះ អូស្ត្រាលីថែមទាំងបានសុំអន្តរាគមន៍ពីអង្គការពាណិជ្ជកម្មពិភពលោកកាលពីថ្ងៃព្រហស្បតិ៍ ទី១៦ កញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ