នៅប្រទេសថៃ គ្រោះទឹកជំនន់ទឹកភ្លៀងកំពុងគំរាម ជន់លិចរាជធានីបាងកក
ប្រឈមនឹងទឹកជំនន់ ដែលបានសម្លាប់មនុស្ស៦នាក់ ក្នុងទូទាំងប្រទេស អាជ្ញាធរថៃ កំពុងព្យាយាមការពារសង្កាត់ ជាច្រើនក្នុងក្រុងបាងកក។ នៅថ្ងៃអង្គារទី២៨កញ្ញា ក្រៅពីក្រុងបាងកក កងទ័ពបានដាក់ពង្រាយ របាំងបាវដីខ្សាច់ ដើម្បីការពារទីតាំងបុរាណវិទ្យា ដូចជា ទីក្រុងបុរាណ អាយុធ្យា ដែលស្ថិតនៅចម្ងាយ ៦០គីឡូម៉ែត្រ ភាគខាងជើង ក្រុងបាងកក។
ចុះផ្សាយនៅថ្ងៃ៖
ស្តាប់ - ០២:៣៣
រាជធានី បាងកកកំពុងត្រៀមខ្លួនប្រឈមនឹងគ្រោះអាសន្នទឹកជំនន់ ដែលបានសម្លាប់មនុស្ស៦នាក់ និងជន់លិចខេត្ត ចំនួន ៣០របស់ប្រទេសថៃ។ តាមនាយកដ្ឋាន បង្ការ និងកាត់បន្ថយ គ្រោះមហន្តរាយ ថៃ គ្រោះទឹកជំនន់ ដែលបង្កឡើងដោយ ខ្យល់ព្យុះត្រូពិក Dianmu បានប៉ះពាល់ខ្លាំងជាងគេ តំបន់កណ្តាល និងភាគខាងត្បូង ប្រទេសថៃ ដោយបានជន់លិចផ្ទះសម្បែង ជាង ៧ម៉ឺនខ្នង នៅទូទាំងប្រទេសថៃ។
ចាប់តាំងពីថ្ងៃចន្ទ អាជ្ញាធរក្នុងក្រុងបាងកកចាប់ផ្តើម ដាក់របាំង ការពារ សង្កាត់ពាណិជ្ជកម្ម មួយចំនួន ដោយដាក់ គរត្រួតបាវដីខ្សាច់ នៅតាមមាត់ទន្លេ ចៅប្រាយ៉ា ជាទីដែលកំពស់ទឹក ចាប់ឡើងស្រឺតៗ ដោយសារ ការបើកបង្ហូរ រំដោះទឹកចេញពី តំបន់ជន់លិច ភាគខាងជើង ក្រុងបាងកក។ អាជ្ញាធរក្រុងបាងកកសង្ឃឹមថា នឹងអាចជៀសផុតពីវិបត្តិគ្រោះទឹកជំនន់ ដូចដែលបាងកកធ្លាប់ជួបប្រទះ កាលពី ១០ឆ្នាំមុន។ នៅឆ្នាំ ២០១១ ទឹកជំនន់បានជន់លិចទឹកដី ១ភាគ៥របស់ក្រុងបាងកក និងបានសម្លាប់មនុស្សជាង ៥០០នាក់។
នៅថ្ងៃអង្គារ ចៅហ្វាយក្រុងបាងកក លោកអាស្វីន ក្ខាន់មួង បានសរសេរនៅលើទំព័រហ្វេសប៊ុករបស់លោកថា ឧតុនិយមថៃ បានព្រមានពីភ្លៀងធ្លាក់ជោគជាំ ពីពេលនេះ រហូតដល់ថ្ងៃព្រហស្បតិ៍។ តាម អភិបាលក្រុងបាងកក គេនឹងប្រកាសជូនដំណឹងទៅប្រជាជនភ្លាម បើសិនជាឃើញមានសញ្ញា ទឹកជោរជន់ ហៀរចេញពី ទន្លេចៅប្រាយ៉ា។ នៅក្នុងដំណាក់កាលនេះ ក្រុងបានត្រៀមរៀបចំជាស្រេច ម៉ាស៊ីនបូមទឹក និងបាវខ្សាច់ សម្រាប់ទប់ទល់ទឹកជំនន់ទឹកទន្លេ។ ក្នុងអតីតកាល ទឹកជំនន់ទឹកភ្លៀង តែងហូរ ចាក់ចូលទៅតាមដី ចំការ ដីស្រែ វាលទំនាប ប៉ុន្តែ ការអភិវឌ្ឍក្រុងបានប្រែក្លាយទីតាំងស្រូប ស្តុកទឹកទាំងអស់ ជាតំបន់អចលនទ្រព្យដ៏មានតម្លៃ។
តាមកាសែតក្នុងស្រុកថៃ ផែនការមេ សម្រាប់ បង្កើតអាងស្តុក ទឹកក្រោមដី សម្រាប់បញ្ជៀសទឹកជំនន់ក៏ត្រូវជាប់គាំង ដោយសារបញ្ហាដីធ្លីជាមួយប្រជាជន។
ជាប់ឈ្មោះ ជាទីក្រុងវឺនីស ខាងកើត រាជធានីបាងកករបស់ប្រទេសថៃ ត្រូវបានសាងសង់ ឡើងនៅលើដីវាលភក់ល្បាប់ និងមានកំពស់ខ្ពស់ជាង កំពស់ទឹកសមុទ្រតែ ១,៥ម៉ែត្រប៉ុណ្ណោះ។
បាងកកផ្ទាល់ជាប់ឈ្មោះក្នុងបញ្ជីក្រុង ក្នុងពិភពលោក ដូចជា ក្រុងហ្សាការតា សិង្ហបុរី ហូជីមិញ សៀងហៃ ដាកា និងតូក្យូជាដើម ដែលត្រូវប្រឈមនឹងការជន់លិចលង់ នៅពេលកំពស់ទឹកសមុទ្រកើនឡើង ដោយសារការឡើងកំដៅផែនដី ១,៥អង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ