កូរ៉េខាងជើងបាញ់សាកល្បងមីស៊ីលម្តងទៀត នៅមួយថ្ងៃមុន ក្រុមប្រឹក្សាសន្តិសុខកោះប្រជុំបន្ទាន់
កូរ៉េខាងជើងបានអះអាងនៅថ្ងៃសុក្រទី១តុលាថា បានបាញ់សាកល្បងមីស៊ីលប្រឆាំងយន្តហោះ ដែលកូរ៉េខាងជើងទើបបានអភិវឌ្ឍកាលពីពេលថ្មីៗនេះ។ តាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA មីស៊ីលប្រឆាំងយន្តហោះត្រូវបានគេតេស្តសាកល្បង កាលពីថ្ងៃព្រហស្បតិ៍ ពោលគឺនៅតែមួយថ្ងៃមុនដែលក្រុមប្រឹក្សាសន្តិសុខអង្គការសហប្រជាជាតិ ត្រូវកោះប្រជុំបន្ទាន់ដើម្បីនិយាយពីកម្មវិធីផលិតមីស៊ីល របស់កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:៤៤
ទៅតាមការស្នើសុំរបស់អាមេរិក បារាំង និងអង់គ្លេស ក្រុមប្រឹក្សាសន្តិសុខអង្គការសហប្រជាជាតិត្រូវបើកកិច្ចប្រជុំបន្ទាន់នៅថ្ងៃព្រហស្បតិ៍ ប៉ុន្តែ រុស្ស៊ី និងចិន ដែលជាសម្ព័ន្ធមិត្តរបស់កូរ៉េខាងជើងបានទាមទារឲ្យលើកពេលមកធ្វើ នៅថ្ងៃសុក្រនេះវិញ។
បារាំង អង់គ្លេស និងអាមេរិកចង់ឲ្យក្រុមប្រឹក្សាសន្តិសុខបើកកិច្ចប្រជុំបន្ទាន់ ដើម្បី និយាយពីបញ្ហាមីស៊ីលអ៊ីពែរសូនិក មីស៊ីលហោះលឿនជាងសំឡេង ដែលកូរ៉េខាងជើងបានធ្វើតេស្ត បាញ់សាកល្បង កាលពីថ្ងៃ អង្គារ ដើមសប្តាហ៍នេះ។
នៅថ្ងៃសុក្រនេះ នៅប៉ុន្មានម៉ោង មុនក្រុមប្រឹក្សាសន្តិសុខបើកកិច្ចប្រជុំ ទីភ្នាក់ងារព័ត៌មានរដ្ឋកូរ៉េខាងជើង KCNA ស្រាប់តែចុះផ្សាយថា កូរ៉េខាងជើងទើបបានបាញ់សាកល្បង មីស៊ីលមួយប្រភេទទៀត គឺមីស៊ីលប្រឆាំងយន្តហោះម្តង កាលពីថ្ងៃព្រហស្បតិ៍ម្សិលមិញ។
តាមទីភ្នាក់ងារKCNA ការបាញ់សាកល្បងបានបង្ហាញថា មីស៊ីលប្រឆាំងយន្តហោះ ពិតជាមានសមត្ថភាពវាយប្រហារ ជាមួយនឹងការដាក់បញ្ចូលបច្ចេកវិទ្យាគន្លឹះថ្មី។
ក្នុងរយៈពេលតែ១សប្តាហ៍ នេះជាលើកទី២ ដែលកូរ៉េខាងជើងបាញ់សាកល្បងមីស៊ីល ពោលគឺបន្ទាប់ពីបានបាញ់សាកល្បងដោយជោគជ័យ មីស៊ីលអ៊ីពែរសូនិក ប្រភេទមីស៊ីលដែលមានល្បឿនលឿនជាងសំឡេងដល់ទៅ៥ដង ដែលអ្នកជំនាញវាយតម្លៃដែរថា មានសមត្ថភាពដឹកក្បាលគ្រាប់នុយក្លេអ៊ែរ។
នៅក្នុងខែ កញ្ញានេះ កូរ៉េខាងជើងបានបាញ់សាកល្បង មីស៊ីលរបស់ខ្លួនដល់ទៅ៤ដង ដែលមានតាំងពីមីស៊ីលបាញ់ចេញពីក្នុងនាវាមុជទឹក មីស៊ីលរយៈចម្ងាយឆ្ងាយ មីស៊ីលអ៊ីពែរសូនិក និងចុងក្រោយ គឺមីស៊ីលប្រឆាំងយន្តហោះ ដែលកូរ៉េខាងជើងបានបាញ់បង្អួត កាលពីថ្ងៃ ព្រហស្បតិ៍ទី ៣០កញ្ញា។
សម្រាប់អ្នកជំនាញ តាមរយៈ ការបាញ់សាកល្បង មីស៊ីលដ៏ញឹកញាប់ របបព្យុងយ៉ាងចង់បង្ហាញទៅកាន់សហគមន៍អន្តរជាតិថា ក្នុងនាមជាប្រទេសមហាអំណាចនុយក្លេអ៊ែរ កូរ៉េខាងជើងបានបោះជំហានទៅមុខ ខាងផ្នែកបច្ចេកវិទ្យា ផលិតសព្វាវុធ។ ម្យ៉ាង វាជាអាចជាតេស្តសាកល្បង ភាពអត់ធ្មត់របស់រដ្ឋបាលលោកចូ បៃដិន។ កូរ៉េខាងជើងអាចចង់ដឹងថា តើខ្លួនអាចបាញ់សាកល្បងមីស៊ីល រហូតដល់ពេលណា ទើបធ្វើឲ្យរដ្ឋបាលលោកចូ បៃដិន ចាប់បន្ទន់ជំហរ មកចរចា និងដកទណ្ឌកម្មសេដ្ឋកិច្ចពីកូរ៉េខាងជើង។
ចាប់តាំង ពី ត្រូវជាប់ទណ្ឌកម្មសេដ្ឋកិច្ចសាជាថ្មីរបស់ក្រុមប្រឹក្សាសន្តិសុខ នៅឆ្នាំ ២០១៧ ដោយសារផ្គើនបាញ់មីស៊ីលបាលីស្ទិក កូរ៉េខាងជើង បានសាកល្បងបាញ់មីស៊ីលជាច្រើនលើក ប៉ុន្តែ កូរ៉េខាងជើងបានបាញ់សាកល្បងមីស៊ីល ចម្ងាយជិត ឬចម្ងាយឆ្ងាយ ពោលគឺមិនដែលប្រកាសថា ខ្លួនបាញ់សាកល្បងមីស៊ីលបាលីស្ទិក ដែលហាមដាច់ខាត ដោយប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ