កងទ័ពកូរ៉េខាងត្បូងថា កូរ៉េខាងជើងទំនងបាញ់មីស៊ីលបាលីស្ទិកចេញពីនាវាមុជទឹក
បន្ទាប់ពីបាញ់សាកល្បងគ្រាប់មីស៊ីលជាបន្តបន្ទាប់គ្នា កាលពីប៉ុន្មានសប្តាហ៍មុន កូរ៉េខាងជើងបានចាប់ធ្វើសកម្មភាពសាជាថ្មី ដោយបានបាញ់សាកល្បងមីស៊ីលបាលីស្ទិក ចូលទៅក្នុងទឹកសមុទ្រជប៉ុន នៅថ្ងៃអង្គារទី ១៩តុលានេះ។ តាមកងទ័ពកូរ៉េខាងត្បូង ដែលជាអ្នកជូនដំណឹងនេះ កូរ៉េខាងជើងទំនងជាបានបាញ់មីស៊ីលបាលីស្ទិកចេញពីនាវាមុជទឹក។ នៅក្នុងមហាសន្និបាតបក្សពលករកូរ៉េខាងជើង នៅដើមឆ្នាំនេះ មេដឹកនាំកូរ៉េខាងជើងធ្លាប់បានប្រកាសថា កូរ៉េខាងជើងមានគំរូប្លង់សាងសង់នាវាមុជទឹកដើរដោយថាមពលនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:៤៨
នៅក្នុងសេចក្តីប្រកាសព័ត៌មាននៅថ្ងៃអង្គារនេះ នាយសេនាធិការកូរ៉េខាងត្បូងបានអះអាងថា គេចាប់បានសញ្ញាមីស៊ីលបាលីស្ទិកចម្ងាយខ្លី ដែលកូរ៉េខាងជើងអាចបាញ់ចេញពីនាវាមុជទឹក។
តាមកងទ័ពកូរ៉េខាងត្បូង មីស៊ីលបាលីស្ទិកបានហោះចេញពីទីក្រុងកំពង់ផែ Sinpo ដែលមានមូលដ្ឋានកងទ័ពជើងទឹកកូរ៉េខាងជើង។ រូបភាពផ្កាយរណបរបស់អាមេរិកដែលបង្ហាញវត្តមាននាវាមុជទឹកនៅទីនោះ បានធ្វើឲ្យកូរ៉េខាងត្បូងជឿថា កូរ៉េខាងជើង បាញ់មីស៊ីលចេញពីនាវាមុជទឹក។ យ៉ាងណាក៏ដោយ នាយសេនាធិការកូរ៉េខាងត្បូង អះអាងថា ភ្នាក់ងារស៊ើបការណ៍សម្ងាត់កូរ៉េខាងត្បូង និងអាមេរិកនឹងវិភាគបន្តទៀត ដើម្បីបានព័ត៌មានលម្អិតបន្ថែម។
ជាមហាអំណាចនុយក្លេអ៊ែរ កូរ៉េខាងជើងកំពុងបង្កើនសមត្ថភាពផលិតមីស៊ីលបាញ់ចេញពីនាវាមុជទឹកមួយទៀត។ នៅ ឆ្នាំ ២០១៦ និងឆ្នាំ ២០១៩ កូរ៉េខាងជើងធ្លាប់បានបាញ់សាកល្បងមីស៊ីល ចេញពីក្នុងទឹក ប៉ុន្តែ រហូតមក គេនៅមិនទាន់ឃើញ កូរ៉េខាងជើងសម្រេចផលិតបាននាវាមុជទឹក ដែលមានសមត្ថភាពបាញ់មីស៊ីលបាលីស្ទិកនៅឡើយទេ។
នៅក្នុងពិព័រណ៌គ្រឿងសព្វាវុធ នៅទីក្រុងព្យុងយ៉ាង កាលពីសប្តាហ៍មុន គេឃើញ មីស៊ីលបាលីស្ទិកដ៏ធំ ដែលមានសមត្ថភាពហោះដល់ទឹកដីអាមេរិក ដែលកូរ៉េខាងជើងធ្លាប់បានបង្ហាញក្នុងព្យុហយាត្រានៅឆ្នាំមុន។
ក្នុងករណី មីស៊ីលបាលីស្ទិករបស់កូរ៉េខាងជើង ពិតជាត្រូវបាញ់ចេញពីនាវាមុជទឹកមែន នោះ គេជឿថា កូរ៉េខាងជើងពិតជាបានបោះជំហានលឿន មួយកម្រិតទៀត ក្នុងបច្ចេកវិទ្យាផលិតសព្វាវុធ។ ព្យុងយ៉ាងនឹងអាចបង្កើតយុទ្ធសាស្រ្តថ្មីៗ ដូចជា អាចចាប់ផ្តើមការវាយប្រហារ ទៅកន្លែងឆ្ងាយៗ ដោយមិនឲ្យសត្រូវដឹងខ្លួនមុន ឬអាចប្រើនាវាមុជទឹករបស់ខ្លួន សម្រាប់វាយបកវិញ ក្នុងករណី មូលដ្ឋានទ័ពរបស់ខ្លួនរងការវាយប្រហារពីសត្រូវ។
កូរ៉េខាងជើងបានបាញ់សាកល្បងមីស៊ីលបាលីស្ទិក ដែលអង្គការសហប្រជាជាតិ បានហាមនិងដាក់ទណ្ឌកម្មរហូតមក។ ដំណឹងស្តីពីការបាញ់មីស៊ីលបាលីស្ទិកចេញពីនាវាមុជទឹក របស់កូរ៉េខាងជើង ធ្វើឲ្យគេបារម្ភពីការប្រកួតប្រជែងផ្នែកសព្វាវុធ នៅឧបទ្វីបកូរ៉េ។ កាលពីពេលថ្មីៗនេះ កូរ៉េខាងត្បូងក៏ទើបសម្រេចបាញ់សាកល្បងដោយជោគជ័យមីស៊ីលចេញពីនាវាមុជទឹក ជាលើកដំបូងរបស់ខ្លួនដែរ។
កូរ៉េខាងជើងបាញ់មីស៊ីលនៅថ្ងៃអង្គារនេះ នៅខណៈពេលដែលប្រធានភា្នក់ងារស៊ើបការណ៍សម្ងាត់របស់អាមេរិកកំពុងស្ថិតនៅទីក្រុងសេអ៊ូល ដើម្បីជួបសមភាគីកូរ៉េខាងត្បូង និងជប៉ុន។ សម្រាប់អ្នកស្រាវជ្រាវ នៅវិទ្យាស្ថានស្រាវជ្រាវយុទ្ធសាស្រ្តជាតិកូរ៉េខាងត្បូង ការដែលអាមេរិកមិនព្រមប្តូរជំហរ ស្តីពីការចរចា ជាហេតុផលមួយដែលធ្វើឲ្យកូរ៉េខាងជើងផ្គើនបាញ់មីស៊ីល។ ដោយបាញ់សាកល្បងមីស៊ីលជាបន្តបន្ទាប់ កូរ៉េខាងជើងចង់បង្ហាញថា ខ្លួននៅតែអាចធ្វើសកម្មភាពញុះញង់ខ្លាំងជាងនេះ ទៅទៀត។
នៅថ្ងៃចន្ទម្សិលមិញ ប្រេសិត អាមេរិកធ្លាប់បានអំពាវនាវឲ្យកូរ៉េខាងជើងបើកការចរចា ប៉ុន្តែ នៅក្នុងពិព័រណ៌សព្វាវុធនៅសប្តាហ៍មុន មេដឹកនាំកូរ៉េខាងជើង បាននិយាយទម្លាក់កំហុសលើអាមេរិកថា ជាដើមហេតុធ្វើឲ្យមានភាពតានតឹងនៅឧបទ្វីបកូរ៉េ និងទាត់ចោលការលើកឡើងរបស់ភាគីអាមេរិកដែលថា គេមានចេតនា បង្កអរិភាព ជាមួយកូរ៉េខាងជើងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ