មន្រ្តីអង្គការសហប្រជាជាតិព្រួយបារម្ភពីការសម្លាប់រង្គាល នៅភាគខាងជើងភូមា
អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សភូមា បានសំដែងក្តីបារម្ភពីគ្រោះមហន្តរាយសិទ្ធិមនុស្សធ្ងន់ធ្ងរនៅភូមា នៅចំពោះមុខ យុទ្ធសាស្រ្តបញ្ជូន និងពង្រាយទ័ពភូមា នៅភាគខាងជើងប្រទេស។ នៅក្នុងបទបង្ហាញរបាយការណ៍ ទៅកាន់មហាសន្និបាតអង្គការសហប្រជាជាតិកាលពីថ្ងៃសុក្រម្សិលមិញ អ្នករាយការណ៍ពិសេស របស់អង្គការសហប្រជាជាតិ បានព្រមានពីលទ្ធភាពកើតមានការសម្លាប់រង្គាល បង្កឡើងដោយរបបសឹកភូមា។
ចុះផ្សាយនៅថ្ងៃ៖
ស្តាប់ - ០២:៤២
នៅក្នុងសេចក្តីថ្លែងទៅកាន់មហាសន្និបាតអង្គការសហប្រជាជាតិ នៅទីក្រុងញូវយ៉ក អ្នករាយការណ៍ពិសេសទទួលបន្ទុកផ្នែកសិទ្ធិមនុស្សនៅ ភូមា លោកTom Andrews បានប្រាប់ពិភពលោកឲ្យត្រៀមខ្លួន ដូចប្រជាជនភូមា ដែលកំពុងត្រៀមខ្លួនប្រឈមនឹង ឧក្រិដ្ឋកម្មសម្លាប់រង្គាល នៅភូមា។
អ្នករាយការណ៍ពិសេសររបស់អង្គការសហប្រជាជាតិព្រួយបារម្ភខ្លាចកើតមាន ការសម្លាប់រង្គាលសាជាថ្មី នៅភូមា បន្ទាប់ពីបានទទួលព័ត៌មានថា របបសឹកភូមា បានបញ្ជូន កងទ័ពជាច្រើនម៉ឺននាក់ និងសព្វាវុធ រថក្រោះជាច្រើនគ្រឿង ទៅកាន់តំបន់ភាគខាងជើងភូមា។
តាមទីភ្នាក់ងារព័ត៌មានChindwin ដែលភ្ជាប់ខ្លួនជាមួយក្រុមអ្នកតស៊ូប្រឆាំង របបសឹកភូមា ចាប់តាំងពីថ្ងៃពុធសប្តាហ៍នេះ គេឃើញ ឡាន ដឹកទាហានភូមាជាង៥០គ្រឿង និងរថក្រោះ បើកចូលទីក្រុង Hakha ក្នុងរដ្ឋឈីន ជាប់ព្រំដែនជាមួយប្រទេសឥណ្ឌា។ តាមអ្នកជំនាញមួយចំនួន ក្នុងរយៈពេល ៨ខែ ក្រោយ ធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កងទ័ពភូមាប្រឈមកាន់តែខ្លាំងនឹងការវាយប្រហាររបស់ចលនាតស៊ូ ដែលកើតមានចំនួនកាន់តែច្រើន នៅគ្រប់តំបន់ ជាពិសេសនៅតំបន់ដែលក្រុមប្រដាប់អាវុធ ជនជាតិភាគតិច ចេញមុខ បណ្តុះបណ្តាល និងបំពាក់អាវុធឲ្យចលនាតស៊ូប្រឆាំងរបបសឹក។
តាមមន្រ្តីអង្គការសហប្រជាជាតិ របបសឹកភូមាអាចប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ព្រោះថា កងទ័ពភូមា បានប្រើយុទ្ធសាស្រ្ត ដូចនៅក្នុងយុទ្ធនាការបោសសម្អាត នៅក្នុងរដ្ឋរ៉ាឃីន កាលពីឆ្នាំ ២០១៧។
ការបង្រ្កាបដ៏ហិង្សា និងការធ្វើទុក្ខបុកម្នេញ ដែលបានបណ្តាល ឲ្យប្រជាជនរ៉ូហ៊ីងយ៉ា ជាង ៧សែននាក់ រត់ភៀសខ្លួន ទៅជ្រកកោននៅប្រទេសជិតខាង បង់ក្លាដែស ត្រូវបានអង្គការសហប្រជាជាតិ វាយតម្លៃថា អាចជាសម្លាប់ប្រល័យពូជសាសន៍។
នៅថ្ងៃសុក្រ អ្នករាយការណ៍ពិសេសរបស់អង្គការសហប្រជាជាតិ បានអំពាវនាវឲ្យគេឈប់ផ្តល់ថវិកា លក់អាវុធ និងបដិសេធ មិនទទួលស្គាល់ភាពស្របច្បាប់ របស់របបសឹក។ សម្រាប់មន្រ្តីអង្គការសហប្រជាជាតិ ការដាក់សម្ពាធលើរបបសឹកអាចផ្តល់លទ្ធផលជាផ្លែផ្កា។ ជាក់ស្តែង នៅក្រោយ សមាគមអាស៊ាន បដិសេធមិនឲ្យមេដឹកនាំរបបសឹកភូមា លោកមីន អ៊ុងឡាំង ចូលរួមក្នុងកិច្ចប្រជុំអាស៊ាន របបសឹកភូមាបានសម្រេចដោះលែងអ្នកទោសនយោបាយ ជាង ៥ពាន់នាក់ កាលពីថ្ងៃចន្ទដើមសប្តាហ៍នេះ។
នៅថ្ងៃសុក្រម្សិលមិញ អង្គការក្នុងស្រុកភូមាបានជូនដំណឹងថា សកម្មជនប្រឆាំងភូមា ជាង ១០០ដែលទើបត្រូវដោះលែង ឲ្យមានសេរីភាព ត្រូវបានកងទ័ពភូមាចាប់ខ្លួនសាជាថ្មី នៅក្រោមច្បាប់ប្រយុទ្ធប្រឆាំង ភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ