ភូមា ប្រកាសដោះលែងអ្នកទោសបាតុករ ជាង៥ពាន់នាក់
៥៦៣៦ នេះជាចំនួនអ្នកទោសដែលរបបសឹកភូមា បានប្រកាសលើកលែងទោស និងដោះលែងឱ្យមានសេរីភាព នាឱកាសបុណ្យចេញវស្សាតាមបែបព្រះពុទ្ធសាសនា ដោយមានបង្ហោះភ្លើងគោម ជាប្រពៃណីភូមាដ៏សំខាន់។ នេះជាសេចក្តីប្រកាសរបស់ប្រមុខដឹកនាំសឹកភូមា លោក មីន អ៊ុងឡាំង តាមកញ្ចក់ទូរទស្សន៍ជាតិ នៅថ្ងៃចន្ទទី ១៨តុលា ២០២១។
ចុះផ្សាយនៅថ្ងៃ៖
បាតុករដែលជាប់ឃុំឃាំងពីបទបានចេញតវ៉ាប្រឆាំងនឹងរដ្ឋប្រហារយោធាកាលពីថ្ងៃទី ១កុម្ភៈ ២០២១ នឹងទទួលបានការលើកលែងទោស និងដោះលែង នៅមុនថ្ងៃប្រារព្វពិធីបុណ្យសាសនា ជាប្រពៃណីភូមា។ ប៉ុន្តែមេដឹកនាំសឹក មីន អ៊ុងឡាំង មិនបានលម្អិតទេថាតើអ្នកទោសក្រុមណាខ្លះដែលចាត់ចូលក្នុងបញ្ជីឈ្មោះត្រូវដោះលែង។ ចំណែកអាជ្ញាធរពន្ធនាគារក៏បដិសេធមិនផ្តល់ព័ត៌មានអ្វីដល់ភ្នាក់ងារសារព័ត៌មានបារាំង AFPដែរ។
កាលពីចុងខែមិថុនា អាជ្ញាធរសឹកភូមាបានដោះលែងក្រុមអ្នកប្រឆាំងនឹងរដ្ឋប្រហារចំនួន ២ពាន់ ដែលជាប់ឃុំឃាំងនៅតាមពន្ធនាគារផ្សេងទូទាំងប្រទេស ក្នុងនោះមានអ្នកកាសែតក្នុងស្រុកមួយចំនួនផង។ ប៉ុន្តែនិពន្ធនាយកកាសែត Frontier Myanmar ជាតិអាមេរិក ចាប់ខ្លួនកាលពីថ្ងៃទី ២៤ឧសភា បន្តជាប់ក្នុងមន្ទីរឃុំឃាំងInsein ក្បែរទីក្រុងរ៉ង់ហ្គូនដដែល។
សូមបញ្ជាក់ថា តាំងពីក្រុមយោធាសម្រេចបង្ក្រាបចលនាបាតុកម្មប្រឆាំងនឹងរដ្ឋប្រហារមក មានជនស៊ីវិលប្រមាណ១១០០នាក់បានស្លាប់ និងជាង៧០០០នាក់ ត្រូវចាប់ខ្លួន។ នេះបើតាមការប៉ាន់ស្មានរបស់សមាគមសង្គ្រោះអ្នកទោសនយោបាយ ដែលរាយការណ៍ថាមានករណីធ្វើទារុណកម្ម រំលោភ និងដាក់ទោសដោយគ្មានឆ្លងកាត់តុលាការទេ។
ម្យ៉ាងទៀត សេចក្តីប្រកាសដោះលែងអ្នកទោសជាបាតុករនេះ ប្រព្រឹត្តទៅក្នុងខណៈដែលអាស៊ានទើបចេញវិធានការពិសេសបែបនយោបាយ ដើម្បីព្រមានរដ្ឋាភិបាលភូមា។ សមាគមប្រជាជាតិអាស៊ីអាគ្នេយ៍ (អាស៊ាន) សម្រេចមិនឱ្យលោក មីន អ៊ុងឡាំង មកចូលរួមក្នុងជំនួបកំពូលអាស៊ាន ដែលនឹងប្រព្រឹត្តទៅនៅថ្ងៃ២៦-២៨តុលា ២០២១ ព្រោះតែរដ្ឋាភិបាលសឹកបានបដិសេធមិនឱ្យអន្តរការីអាស៊ានចូលជួបលោកស្រីអ៊ុងសានស៊ូជី និងមិនអនុវត្តផែនការ៥ចំណុច ដើម្បីសម្រួលការផ្តល់ជំនួយមនុស្សធម៌។ តែភូមាបានរិះគន់សេចក្តីសម្រេចរបស់អាស៊ានថារំលោភគោលការណ៍មិនជ្រៀតជ្រែកកិច្ចការផ្ទៃក្នុងរបស់រដ្ឋជាសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ