ចិននឹងជួយសាងសង់មូលដ្ឋានទ័ពនៅព្រំដែន តាហ្ស៊ីគីស្ថាននិងអាហ្វហ្កានីស្ថាន
ចិននឹងសង់មូលដ្ឋានទ័ពមួយ ឲ្យប៉ូលិសតាហ្ស៊ីគីស្ថាន។ តាមប្រភពមន្រ្តីតាហ្សីគីស្ថាន មូលដ្ឋានដែលចិនសង់ឲ្យប៉ូលិសតាហ្ស៊ីគីស្ថាន ស្ថិតនៅព្រំដែន តាហ្ស៊ីគីស្ថាន ជាមួយប្រទេសអាហ្វហ្កានីស្ថាន។ ក្រសួងការបរទេសចិនបានបដិសេធថា គ្មានវត្តមានមូលដ្ឋានទ័ពនៅអាស៊ីកណ្តាល នោះទេ។
ចុះផ្សាយនៅថ្ងៃ៖
ស្តាប់ - ០២:៥៩
នៅថ្ងៃព្រហស្បតិ៍ អ្នកនាំពាក្យរបស់សភាតាហ្ស៊ីគីស្ថានបាននិយាយប្រាប់ទីភ្នាក់ងារព័ត៌មានបារាំងថា សភាជាន់ទាបតាហ្ស៊ីគីស្ថានបានបោះឆ្នោត យល់ព្រមឲ្យចិនសាងសង់មូលដ្ឋានទ័ព នៅព្រំដែនតាហ្ស៊ីគីស្ថាន និងអាហ្វហ្កានីស្ថាន។
តាមអ្នកនាំពាក្យខាងលើ ចិនជាអ្នកចេញលុយទាំងស្រុង សម្រាប់ការសាងសង់មូលដ្ឋានទ័ព ដែលមានតម្លៃ ៨,៥លានដុល្លារ។ នៅក្រោយ ចប់ការសាងសង់ មូលដ្ឋាននឹងត្រូវផ្ទេរទៅឲ្យប៉ូលិសតាហ្ស៊ីគីស្ថានជាអ្នកគ្រប់គ្រង។
ចិនជួយសាងសង់មូលដ្ឋានទ័ពឲ្យប៉ូលិសតាហ្ស៊ីគីស្ថាន នៅព្រំដែន ជាមួយអាហ្វហ្កានីស្ថាន នៅក្នុងបរិបទមួយ ដែលចិនខ្លាចមានការគំរាមកំហែង វាយប្រហារពីសំណាក់ របស់ក្រុមភេរវនិយម ដែលមានប្រភពចេញមកពីអាហ្វហ្កានីស្ថាន។
នៅក្រោយ តាលីបង់ឈ្នះសង្រ្គាម ត្រលប់ចូលកាន់អំណាចនៅអាហ្វហ្កានីស្ថាន ប៉េកាំងបានសំឡឹង កសាងទំនាក់ទំនងល្អ ជាមួយពួកតាលីបង់ ប៉ុន្តែ បានអំពាវនាវឲ្យក្រុមនេះ ជួយប្រយុទ្ធប្រឆាំង ក្រុមភេរវនិយម ដែលគាំទ្របុព្វហេតុជនជាតិភាគតិចអ៊ុយហ្គួរ។ ក្រុមជីហាតអង្គការរដ្ឋអ៊ីស្លាម ខូរ៉ាសាន់ Khorasan ជាដើម ដែលជាសត្រូវរបស់ពួកតាលីបង់ ធ្លាប់បានសំដែងការគាំទ្រ ក្រុមអ៊ីស្លាមភាគតិចអ៊ុយហ្គួរ ដែលរងការជិះជាន់ ធ្វើទុក្ខបុកម្នេញ នៅខេត្តស៊ីនជាំងក្នុងប្រទេសចិន។ មួយវិញទៀត ចិនបារម្ភថា ក្រុមជ្រុលនិយមអាចប្រើទឹកដីតាហ្ស៊ីគីស្ថាន ដើម្បីប្រជ្រៀតខ្លួនចូលទៅក្នុងខេត្តស៊ីនជាំង ដែលនៅជាប់ព្រំដែនតាហ្ស៊ីគីស្ថាន។
សម្រាប់ តាហ្ស៊ីគីស្ថាន ដែលផ្ទុយពីប្រទេសអាស៊ីកណ្តាលផ្សេងទៀត រដ្ឋាភិបាលរបស់ប្រទេសនេះនៅមិនទាន់ទទួលស្គាល់ របបដឹកនាំតាលីបង់ ដែលខ្លួនចាត់ទុកជាក្រុមជ្រុលនិយមនោះទេ។ នៅក្រោយតាលីបង់ចូលកាន់អំណាចនៅអាហ្វហ្កានីស្ថាន ប្រធានាធិបតីតាហ្ស៊ីគីស្ថាន កាលពីខែកញ្ញា ធ្លាប់បានអំពាវនាវឲ្យគេសាងសង់ ខ្សែក្រវ៉ាត់សុវត្ថិភាព ជុំវិញ អាហ្វហ្កានីស្ថាន។
តាហ្ស៊ីគីស្ថាន ដែលមានប្រជាជនរស់នៅ ជាង ៩លាននាក់ មានព្រំដែនជាប់អាហ្វហ្កានីស្ថាន ប្រមាណ ១៣៥៧គីឡូម៉ែត្រ។ ប្រទេសនេះមានមូលដ្ឋានទ័ពរុស្ស៊ី មានចំណងសហប្រតិបត្តិការយោធា ជាមួយអាមេរិក និងធ្លាប់ទទួល ហិរញ្ញវត្ថុពីប្រទេសចិន។ ដំណឹងដែលចិនគ្រោងសាងសង់មូលដ្ឋានទ័ពឲ្យតាហ្ស៊ីគីស្ថាន នៅជាប់ព្រំដែនអាហ្វហ្កានីស្ថាន កើតឡើងនៅក្រោយ កាសែតក្នុងស្រុកតាហ្ស៊ីគីស្ថាន ចុះផ្សាយពីការផ្ទេរមូលដ្ឋានទ័ពរបស់តាហ្ស៊ីគីស្ថាន មួយនៅជាប់ព្រំដែនជាមួយខេត្តស៊ីនជាំងទៅឲ្យចិនកាន់កាប់ ជាថ្នូរនឹងប្រាក់ជំនួយរបស់រដ្ឋាភិបាលចិន។
នៅថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសចិនបានបដិសេធថា ចិនគ្មានមូលដ្ឋានទ័ពនៅទឹកដីបរទេស នៅប្រទេសអាស៊ីកណ្តាល នោះទេ។ ជាផ្លូវការ ចិន មានមូលដ្ឋានទ័ព នៅទឹកដីបរទេស តែមួយគត់ នៅក្នុងនៅប្រទេសហ្ស៊ីបូទី ក្នុងទឹកដីអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ