ណាសា និងទីភ្នាក់ងារអវកាសអឺរ៉ុប បាញ់បង្ហោះតេឡេស្កុបអវកាស ជេមស៍វេប ដើម្បីឆ្លុះមើលលំហចក្រវាឡ
នៅវេលាម៉ោង ១២ និង ២០នាទី ម៉ោងសកល ថ្ងៃទី២៥ធ្នូនេះ ទីភ្នាក់ងារអវកាសអាមេរិក ណាសា សហការជាមួយទីភ្នាក់ងារអវកាសអឺរ៉ុប នឹងបាញ់បង្ហោះ តេឡេស្កុបអវកាសជេមស៍វេប (James Webb) ដើម្បីទៅឆ្លុះមើល និងសិក្សាពីលំហចក្រវាឡ។ ជេមស៍វេប គឺជាតេឡេស្កុបដ៏មានតម្លៃថ្លៃបំផុត និងត្រូវបានបំពាក់ដោយបច្ចេកវិទ្យាទំនើប ជឿនលឿនបំផុតមិនធ្លាប់មាន នៅក្នុងប្រវត្តិសាស្ត្រនៃការស្រាវជ្រាវអវកាស។
ចុះផ្សាយនៅថ្ងៃ៖
ស្តាប់ - ០២:២៩
បើគ្មានកត្តាអាកាសធាតុនឹងមករំខានទេនោះ យានអារីយ៉ាន-៥ នឹងត្រូវបាញ់បង្ហោះ ចេញពីស្ថានីយ៍អវកាសគូរូ ស្ថិតនៅដែនដីហ្គុយយ៉ានបារាំង នៅវេលាម៉ោង ១២និង២០នាទី ម៉ោងសកល ថ្ងៃទី២៥ធ្នូ។ យានអារីយ៉ាន-៥ នឹងនាំយក តេឡេស្កុបអវកាសជេមស៍វេប (JWST) ឡើងទៅកាន់លំហអាកាស មុននឹងព្រលែងតេឡេស្កុបនេះ ឲ្យហោះអណ្តែត ក្នុងរយៈចំងាយ ១លាន៥សែនគីឡូម៉ែត្រពីផែនដី។
អស់រយៈពេល២៥ឆ្នាំមកហើយ ដែលអ្នកវិទ្យាសាស្ត្រ បានរងចាំចាំថ្ងៃនេះ ជាថ្ងៃដែលតេឡេស្កុបអវកាស ដ៏ទំនើប និងបំពាក់ដោយបច្ចេកវិទ្យាដ៏ស្មុគស្មាញបំផុត នឹងត្រូវបាញ់បង្ហោះដើម្បីបើកទំព័របេសកកម្មស្រាវជ្រាវ ថតផ្តិតយករូបភាពនៅក្នុងលំហចក្រវាឡ ដ៏សែនឆ្ងាយ។ តេឡេស្កុបអវកាសជេមស៍វេប ត្រូវបានកសាងឡើង ដោយចំណាយប្រាក់ប្រមាណ ១ម៉ឺនលានដុល្លារ។
លើសពីកត្តាតម្លៃដ៏ថ្លៃនៃតេឡេស្កុបនេះ បេសកកម្មបាញ់បង្ហោះវាគឺជារឿងដ៏រំជើបរំជួល ភ័យផងអរផង របស់ក្រុមការងារអវកាស។ ណាសា ចាត់ទុកថានេះគឺជាបេសកកម្មប្រចាំសតវត្សទី២១នេះតែម្តង ព្រោះវាមានសារៈសំខាន់ខ្លាំងណាស់ នៅក្នុងការស្រាវជ្រាវ ពីប្រវត្តិ នៃការកកើតចក្រវាឡ និងដែនហ្កាឡាក់ស៊ីឆ្ងាយៗ។ លោក Thomas Zurbuchen ប្រធានបេសកកម្មវិទ្យាសាស្ត្ររបស់ណាសា បានបញ្ជាក់ថា លោកព្រឺឆ្អឹងខ្នង និងភ័យបុកពោះណាស់ ខ្លាចក្រែងតែបេសកកម្មបាញ់បង្ហោះនេះ ជួបបរាជ័យ។
បំពាក់ដោយកែវកញ្ចក់ ដែលមានមុខកាត់ប្រវែង៦ម៉ែត្រកន្លះ តេឡេស្កុបជេមស៍វេប គឺជាតេឡេស្កុបអវកាសដ៏ធំបំផុត ដែលគេមិនធ្លាប់សាងសង់ និងបង្ហោះទៅក្នុងលំហអាកាសទេ។ ជេមស៍វេប នឹងអាចឆ្លុះ ប្រមើរមើលនូវការកកើតដែនហ្កាឡាក់ស៊ីដំបូងៗគេ ក្នុងចក្រវាឡ ដែលមានអាយុតាំងតែពី ១៣០០០លានឆ្នាំមុន នឹងអាចស្ទង់វិភាគបរិយាកាស នៅជុំវិញភពនានា ដែលរណបនឹងតារាធំៗផ្សេងទៀត ក្រៅពីព្រះអាទិត្យ។
លោក Thomas Zurbuchen លើកឡើងថា បេសកកម្មនេះ នឹងអនុញ្ញាតឲ្យអ្នកវិទ្យាសាស្ត្រ ឆ្វេងយល់កាន់តែច្បាស់ ថាតើមានទំរង់ជីវិតផ្សេងទៀត ក្នុងលំហចក្រវាឡ ក្រៅពីនៅលើផែនដីយើង ដែរឬទេ។ វាគឺជាឱកាសមិនអាចកាត់ថ្លៃបាន ដែលនឹងមកបើកចំហការយល់ឃើញ ស្តីពីប្រភព និងដើមកំណើតរបស់មនុស្សជាតិយើងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ