ហេតុអ្វីបានកើតមានភាពតានតឹង នៅព្រំដែនអ៊ីរ៉ង់ជាមួយប៉ាគីស្ថាន និងអាហ្វហ្កានីស្ថាន?
ការប្រយុទ្ធគ្នា រវាងកងទ័ពឆ្មាំបដិវត្តអ៊ីរ៉ង់ និងក្រុមប្រដាប់អាវុធ នៅតំបន់ជាប់ព្រំដែនប៉ាគីស្ថាន និងអាហ្វហ្កានីស្ថាន បានបណ្តាលឲ្យមានមនុស្សស្លាប់ ៩នាក់ ដែលនៅក្នុងនោះ ៣នាក់ ជាទាហានអ៊ីរ៉ង់។ នេះបើតាមសេចក្តីថ្លែងការណ៍របស់ឆ្មាំបដិវត្តអ៊ីរ៉ង់ កាលពីថ្ងៃសៅរ៍ ទី ២ធ្នូ។ ការប៉ះទង្គិចអាវុធរវាងកងទ័ពអ៊ីរ៉ង់ ជាមួយក្រុមចោរប្លន់ប្រដាប់អាវុធ កើតឡើងនៅខេត្តSistan-Baloutchistan ភាគអាគ្នេយ៍ របស់អ៊ីរ៉ង់ ដែលជាប់ព្រំដែនជាមួយ អាហ្វហ្កានីស្ថាន និងប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ឆ្មាំបដិវត្តអ៊ីរ៉ង់ ដែលជាឈ្មោះកងទ័ពពិសេសរបស់អ៊ីរ៉ង់ បានបើកការវាយប្រហារ២ថ្ងៃជាប់គ្នា ទៅលើក្រុមប្រដាប់អាវុធ ដែល ឆ្មាំបដិវត្តអ៊ីរ៉ង់ចោទប្រកាន់ថា ជាក្រុមចោរប្លន់ នៅតំបន់ជាប់ព្រំដែនអាហ្វហ្កានីស្ថាន និងប៉ាគីស្ថាន។
តាមឆ្មាំបដិវត្តអ៊ីរ៉ង់ នៅថ្ងៃសៅរ៍ គេបានបាញ់សម្លាប់មេក្លោង និងសមាជិកក្រុមប្រដាប់អាវុធ៦នាក់ ចំណែកឆ្មាំបដិវត្តអ៊ីរ៉ង់បានបាត់បង់សមាជិករបស់ខ្លួន ៣នាក់។ ទីភ្នាក់ងារព័ត៌មានអ៊ីរ៉ង់បានចុះផ្សាយកាលពីថ្ងៃសៅរ៍ថា នៅក្នុងការប្រយុទ្ធគ្នា កាលពីថ្ងៃសុក្រ ឆ្មាំបដិវត្តអ៊ីរ៉ង់ បានបាញ់សម្លាប់ក្រុមប្រដាប់អាវុធ ៣នាក់ ដែលជាប់ពាក់ព័ន្ធនឹងការសម្លាប់ទាហានអ៊ីរ៉ង់២នាក់ កាលពីសប្តាហ៍មុន។
នៅខេត្តដ៏ក្រីក្រ និងដាច់ស្រយាលរបស់អ៊ីរ៉ង់ Sistan-Baloutchistan ដែលជាប់ព្រំដែនជាមួយប៉ាគីស្ថានផង និងអាហ្វហ្កានីស្ថានផង ការប៉ះទង្គិចផ្នែកអាវុធឧស្សាហ៍កើតឡើងរវាងកងទ័ពរដ្ឋាភិបាល ជាមួយ ក្រុមប្រដាប់អាវុធ ដែលអាចជាក្រុមជួញដូរគ្រឿងញៀន ក្រុមបំបែកទឹកដីអ៊ីរ៉ង់ ឬក្រុមជីហាត។
នៅក្នុងប្រទេសដែលគ្រប់គ្រងដោយអាជ្ញាធរកាន់និកាយស្ហ៊ីអ៊ីត សកម្មជនអ៊ីស្លាមនិកាយស៊ុននីត ដែលសំបូររស់នៅភាគច្រើននៅខេត្ត Sistan-Baloutchistanឧស្សាហ៍ផ្ទុះអាវុធជាមួយកងទ័ពរដ្ឋាភិបាលអ៊ីរ៉ង់ ដែលប្រជាជនចោទប្រកាន់ថា ប្រកាន់រើងអើងប្រជាជនកាន់និកាយស៊ុននីត។
កន្លងមក អ៊ីរ៉ង់ធ្លាប់បានចោទប្រកាន់ប្រទេសជិតខាងប៉ាគីស្ថានថា បានគាំទ្រ និងផ្តល់ជំរក ឲ្យក្រុមឧទ្ទាមបំបែកទឹកដីនៅខេត្ត Sistan-Baloutchistan វាយប្រហារផលប្រយោជន៍អ៊ីរ៉ង់។ ក្រៅពីមានព្រំដែនជាប់ប៉ាគីស្ថាន ខេត្ត Sistan-Baloutchistanមានព្រំប្រទល់ជាប់ផងដែរអាហ្វហ្កានីស្ថាន ជាទីដែលក្រុមតាលីបង់ ធ្វើសង្រ្គាមចូលគ្រប់គ្រង កាលពីខែសីហាឆ្នាំមុន។ កាលពីប៉ុន្មានសប្តាហ៍នេះ កងទ័ពអ៊ីរ៉ង់បានប្រយុទ្ធគ្នាជាមួយពួកតាលីបង់ ដោយមិនបានបង្កឲ្យមានអ្នករបួស ឬស្លាប់នោះទេ។ អ្នកជំនាញបារម្ភថា ជាមួយការឡើងកាន់អំណាច នៅអាហ្វហ្កានីស្ថាន ពួកតាលីបង់ ដែលជាក្រុមស៊ុននីតនិយមជ្រុល នឹងអាចចិញ្ចឹមសង្រ្គាម បង្កអសន្តិសុខ នៅក្នុងតំបន់ តាមរយៈ ការផ្តល់កម្លាំង ជំនួយគាំទ្រ ដល់ក្រុមឧទ្ទាមបំបែកទឹកដីអ៊ីរ៉ង់ ដើម្បីឈ្លោះប្រយុទ្ធនឹងឆ្មាំបដិវត្តអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ