កូរ៉េខាងជើងស្វាគមន៍ឆ្នាំថ្មី ដោយបាញ់មីស៊ីលដែលសង្ស័យថាជាប្រភេទបាលីស្ទីក
គ្រាន់តែចូលឆ្លងចូលឆ្នាំថ្មី២០២២ភ្លាម កូរ៉េខាងជើងបានសាកល្បងមីស៊ីលភ្លាមដែរ។ នៅថ្ងៃពុធទី ៥មករានេះ កូរ៉េខាងជើងបានបាញ់មីស៊ីលមួយប្រភេទទៅក្នុងសមុទ្ទជប៉ុន។ មីស៊ីលដែលអាចហោះបានប្រមាណ៥០០គីឡូម៉ែត្រ ទំនងជាមីស៊ីលប្រភេទបាលីស្ទិកផង។ នេះបើតាមការសន្និដ្ឋានរបស់កូរ៉េខាងត្បូង និងជប៉ុន។
ចុះផ្សាយនៅថ្ងៃ៖
ស្តាប់ - ០១:៥៧
បើតាមកូរ៉េខាងត្បូង និងជប៉ុន ព្យុងយ៉ាងបានបាញ់សាកល្បងមីស៊ីល ដែលទំនងជាមីស៊ីលបាលីស្ទិក ទៅក្នុងសមុទ្ទជប៉ុន ឬសមុទ្ទខាងកើត បើហៅតាមអ្នកកូរ៉េ នៅវេលាម៉ោង៨និង១០នាទី ព្រឹក ម៉ោងនៅក្នុងស្រុក។ អ្នកជំនាញកូរ៉េខាងត្បូងនិងអាមេរិក កំពុងតែវិភាគយ៉ាងហ្មត់ចត់ ដើម្បីបានព័ត៌មានល្អិតល្អន់។ នេះបើតាមគូសបញ្ជាក់របស់អគ្គមេបញ្ជាការយោធាកូរ៉េខាងត្បូងនៅក្នុងសេចក្តីថ្លែងការណ៍។
ចំណែកខាងជប៉ុនវិញ លោកនាយករដ្ឋមន្ត្រី ហ្វូមីអូ គីស្ហ៊ីដា បានប្រើពាក្យថា ការបាញ់នៅលើកនេះ អាចជាមីស៊ីលបាលីស្ទិក និងបានសម្តែងការសោកស្តាយចំពោះទង្វើរបស់ព្យុងយ៉ាងដែលបន្តសាកល្បងមីស៊ីលជាប់ឥតដាច់តាំងពីឆ្នាំមុនមក។ មីស៊ីលបាញ់ហោះផ្លោងបានចម្ងាយប្រមាណ៥០០គីឡូម៉ែត្រ និងធ្លាក់នៅក្រៅតំបន់សេដ្ឋកិច្ចផ្តាច់មុខរបស់ជប៉ុនទេ។ ប៉ុន្តែថ្វីបើគ្មានបង្កការខូចខាតជាសម្ភារៈ ប៉ះពាល់ដល់យន្តហោះ ឬនាវាក៏៏ដោយ ក៏ជប៉ុននឹងធ្វើការវិភាគដើម្បីបានដឹងថាតើការបាញ់សាកល្បងនេះមានមីស៊ីលប៉ុន្មានគ្រាប់។
ការបាញ់សាកល្បងមីស៊ីលជាលើកទីមួយសម្រាប់ឆ្នាំ២០២២នេះ ប្រព្រឹត្តទៅក្នុងខណៈដែលកូរ៉េខាងជើង មិនឆ្លើយតបទៅនឹងសំណើរបស់វ៉ាស៊ីនតោន សុំឱ្យតំណាងអាមេរិកចូលជួប ដើម្បីរៀបចំកិច្ចចរចាឡើងវិញ។ កិច្ចចរចាអាមេរិក-កូរ៉េខាងជើង ត្រូវជាប់គាំងតាំងពីជំនួបរវាងលោកដូណាល់ត្រាំនិងលោកគីមជុងអ៊ុន នៅក្រុងហាណូយឆ្នាំ២០១៩បរាជ័យមក។ តាំងពីឡើងគ្រប់គ្រងអាមេរិកនៅឆ្នាំ២០២១ រដ្ឋបាលលោកចូបៃដិន បានប្រកាសត្រៀមខ្លួនជួបតំណាងកូរ៉េខាងជើងដែរ តែត្រូវព្យុងយ៉ាងបដិសេធជារហូត។
ថ្លែងនៅចំពោះមុខមហាសន្និបាតបក្សពលករកូរ៉េខាងជើងកាលពីសប្តាហ៍មុន លោក គីម ជុងអ៊ុន បានថែមទាំងប្រកាសចង់បន្តកម្មវិធីនុយក្លេអ៊ែរ និងពង្រឹងសមត្ថភាពយោធា ដោយមិនខ្វល់នឹងសហរដ្ឋអាមេរិក និងទណ្ឌកម្មអន្តរជាតិទេ។ សមត្ថភាពយោធារបស់កូរ៉េខាងជើង បានរីកលូតលាស់និងចម្រើនទៅច្រើន។ នៅឆ្នាំ២០២១ កូរ៉េខាងជើងបានអះអាងថាមានជោគជ័យ ក្នុងការបាញ់សាកល្បង មីស៊ីលបាលីស្ទិកប្រភេទថ្មីចេញពីនាវាមុជទឹក មីស៊ីលបណ្តែតបាញ់បានឆ្ងាយ មីស៊ីលបាញ់ចេញពីរថភ្លើង និងមីស៊ីលអ៊ីពែរសូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ