តៃវ៉ាន់បង្កើតមូលនិធិ ២០០លានដុល្លារដើម្បីវិនិយោគនៅលីទុយអានី
តៃវ៉ាន់បានប្រកាសនៅថ្ងៃពុធ ទី៥ មករា ឆ្នាំ២០២២ថានឹងបង្កើតមូលនិធិចំនួន ២០០លានដុល្លារ ដើម្បីវិនិយោគនៅក្នុងប្រទេសលីទុយអានី ខណៈម្ចាស់អាជីវកម្មជាច្រើននៅទីនោះត្អូញត្អែរអំពីការខាតបង់របស់ពួកគេពីទំនាក់ទំនងតានតឹងរវាងចិននិងលីទុយអានី។ លីទុយអានីដែលបច្ចុប្បន្ន កំពុងរងទាំងសម្ពាធការទូតនិងពាណិជ្ជកម្មពីចិន ក្រោយប្រទេសអឺរ៉ុបមួយនេះអនុញ្ញាតឲ្យតៃវ៉ាន់ បើកការិយាល័យតំណាងនៅក្នុងប្រទេសខ្លួន។
ចុះផ្សាយនៅថ្ងៃ៖
ស្តាប់ - ០២:០៥
ក្រៅតែពីបានសន្យាបង្កើតមូលនិធិ ២០០លានដុល្លារសម្រាប់លីទុយអានី ទីក្រុងតៃប៉ិក៏បានសន្យាផងដែរបើកចំហទីផ្សាររបស់ខ្លួនទៅកាន់រដ្ឋបាល់ទិកមួយនេះ។ គេរំពឹងថាការវិនិយោគដំបូងរបស់តៃវ៉ាន់តាររយៈមូលនិធិខាងលើនឹងធ្វើឡើងនៅឆ្នាំ ២០២២។
ប្រធានការិយាល័យតំណាងតៃវ៉ាន់ប្រចាំនៅប្រទេសលីទុយអានីលោក Eric Huang និយាយថា តៃវ៉ាន់នឹងប្រើប្រាស់មូលនិធិដើម្បីវិនិយោគលើផ្នែកជាច្រើនរួមាន semiconductors ឡាស៊ែរ ជីវបច្ចេកវិទ្យា និងការស្រាវជ្រាវផ្សេងទៀតនៅក្នុងប្រទេសលីទុយអានី។ ការវិនិយោគនេះគឺជាផ្នែកមួយនៃផែនការរបស់តៃវ៉ាន់ក្នុងការអភិវឌ្ឍទំនាក់ទំនងសេដ្ឋកិច្ចជាមួយលីទុយអានីដែលរងសម្ពាធសេដ្ឋកិច្ចពីចិនប៉េកាំង។
នៅក្នុងពេលប្រកាសអំពីការបង្កើតមូលនិធិនេះនៅឯសន្និសីទសារព័ត៌មាន អនុរដ្ឋមន្ត្រីការបរទេសតៃវ៉ាន់លោក Harry Ho-jen Tseng មានប្រកាសដែរថាដល់វេលាហើយដែលតៃវ៉ាន់ត្រូវចូលជួយដោះស្រាយទុក្ខលំបាករបស់ទុយអានី។
គួររំឭកថា ប្រទេសលីទុយអានីដែលផ្គើនចំពោះសម្ពាធរបស់ទីក្រុងប៉េកាំងបានប្រកាសកាលពីខែកក្កដាឆ្នាំទៅមិញបើកភ្លើងខៀវឲ្យតៃវ៉ាន់បើកការិយាល័យតំណាងនៅក្នុងទីក្រុងវីលនីញូស។ នេះជាលើកទី១ គិតតាំងពី១៨ឆ្នាំកន្លងមកនេះដែលមានប្រទេសអឺរ៉ុបមួយយល់ព្រមឲ្យតៃវ៉ាន់បង្កើតការិយាល័យតំណាង។ ភ្លាមមួយរំពេចចិនបានសម្តែងការមិនពេញចិត្ត និងបានចាត់ទុកចំណាត់ការនេះថាជាការរំលោភលើគោលការណ៍ចិនតែមួយរបស់ខ្លួន។
ដើម្បីជាការឆ្លើយតប ចិនបានសម្រេចកាលពីខែវិច្ឆិកាកាត់បន្ថយជាផ្លូវការនូវទំនាក់ទំនងការទូតជាមួយប្រទេសលីទុយអានី និងបានផ្តើមវិធានការរារាំងការនាំចូលទំនិញរបស់អឺរ៉ុបដែលផលិតទាំងស្រុង ឬមួយផ្នែកនៅក្នុងប្រទេសលីទុយអានី។
ក្រុមហ៊ុនស្រារបស់តៃវ៉ាន់មួយបានឲ្យដឹងនៅសប្តាហ៍នេះថាខ្លួនបានជួយទិញយកស្រារបស់លីទុយអានីជាង ២ម៉ឺនដបដែលត្រូវបានហាមឃាត់ដោយចិន។ ក្រៅពីនេះបើតាមមន្ត្រីតៃប៉ិ នៅមានទំនិញជាច្រើនផ្សេងទៀតរបស់លីទុយអានីដែលត្រូវបានតៃវ៉ាន់ទិញយកដើម្បីជួយទប់ទល់នឹងសម្ពាធរបស់ចិនលើប្រទេសអឺរ៉ុបមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ