ចិនហាមឃាត់ទំនិញអឺរ៉ុប ដែលផលិតនៅលីទុយអានី ដោយសារប្រទេសនេះមានទំនាក់ទំនងជាមួយតៃវ៉ាន់
អាជ្ញាធរចិន បានចាប់ផ្តើមរារាំងការនាំចូលទំនិញរបស់អឺរ៉ុប ដែលផលិតទាំងស្រុង ឬមួយផ្នែកនៅក្នុងប្រទេសលីទូអានី។ នេះបើផ្អែកតាមលើកឡើង របស់មន្ត្រីអឺរ៉ុបទទួលបន្ទុកពាណិជ្ជកម្ម កាលពីថ្ងៃសុក្រម្សិលមិញ។ វិធានការរារាំងរបស់ចិននេះ គឺជាវិធានការសងសិក ទៅលើប្រទេសលីទុយអានី ដោយសារប្រទេសអឺរ៉ុបមួយនេះ បានអនុញ្ញាតឲ្យកោះតៃវ៉ាន់ ដាក់តំណាងទូតផ្លូវការ នៅក្នុងប្រទេសខ្លួន។
ចុះផ្សាយនៅថ្ងៃ៖
ស្តាប់ - ០២:០៩
លោក Valdis Dombrovskis មន្ត្រីអឺរ៉ុបទទួលបន្ទុកពាណិជ្ជកម្ម បានបញ្ជាក់ប្រាប់កាសែត Die Welt, ថា អាជ្ញាធរគយរបស់ចិន បានបដិសេធ ធ្វើលិខិតស្នាម អនុញ្ញាតឲ្យទំនិញអឺរ៉ុបចូលទៅចិន ឲ្យតែទំនិញទាំងនោះ មានប្រភពមកពីប្រទេសលីទុយអានី ទោះទាំងស្រុង ឬមួយផ្នែកតូចក្តី។ វិធានការរារាំងនេះ គឺប៉ះពាល់ ដល់ដល់ការដឹកជញ្ជូនទំនិញគ្រប់មុខ ទាំងទំហំតិចតួច និងទំហំធំៗ ហើយមានតម្លៃថវិកាច្រើនខ្លាំងណាស់។ លោកបានបន្ថែមថា ដោយសារតែទំហំដ៏ធំ នៃការដោះដូរពាណិជ្ជកម្ម រវាងចិន និងសហភាពអឺរ៉ុប គឺផលប៉ះពាល់អាចនឹងមានតម្លៃកើនឡើងខ្លាំងថែមទៀត យ៉ាងរហ័ស ប្រសិនបើគ្មានដំណោះស្រាយទេនោះ។
មន្ត្រីអឺរ៉ុបរូបនេះ បានអះអាងថា ក្រុមការងារលោកកំពុងតែចរចា សុំការពន្យល់ពីភាគីចិន ទាក់ទិននឹងការរាំងខ្ទប់ការនាំចូល។ លោកបន្ថែមថា បើគ្មានដំណោះស្រាយតាមសម្រួលទេនោះ សហភាពអឺរ៉ុប អាចនឹងដាក់ពាក្យប្តឹង ទៅអង្គការពាណិជ្ជកម្មពិភពលោក។
គួរបញ្ជាក់ថា វិធានការរបស់ចិននេះ គឺជាវិធានការសងសឹកយ៉ាងច្បាស់ ទៅលើប្រទេសលីទុយអានី។ កាលពីខែកក្កដា រដ្ឋាភិបាលលីទុយអានី បានអនុញ្ញាត ឲ្យកោះតៃវ៉ាន់ បើកការិយាល័យការទូត ជាផ្លូវការ ប្រចាំនៅទីក្រុងវីលនូស។ ជាការសម្រេច ដែលចិនបានបដិសេធដាច់អហង្ការ ព្រោះចិនមិនយល់ព្រមឲ្យគេទទួលស្គាល់ តៃវ៉ាន់ ជាផ្លូវការនៅក្នុងទំនាក់ទំនងការទូតជាដាច់ខាត។
គួររំលឹកដែរថា មុននឹងមានវិធានការសងសឹក លើទំនិញអឺរ៉ុបផលិតនៅលីទុយអានីនេះ ចិនបានសម្រេច កាលពីថ្ងៃទី២៥វិច្ឆិកា ឈប់ឲ្យស្ថានទូតខ្លួននៅលីទុយអានី ចេញទិដ្ឋាកាទៅឲ្យប្រជាជនលីទុយអានី។ ជាការឆ្លើយតបវិញ នៅថ្ងៃទី១៥ធ្នូ លីទុយអានី បានកោះហៅមន្ត្រីទូតខ្លួនប្រចាំក្រុងប៉េកាំង ឲ្យចូលស្រុកវិញ រងចាំទាល់តែមានដំណោះស្រាយជាមួយចិន។ វិធានការសងសឹកលើទំនិញនៅពេលនេះ គឺមិនមែនប៉ះពាល់តែទៅលើលីទុយអានីទេ តែវាប៉ះពាល់ដល់ទំនិញអឺរ៉ុបទាំងមូលតែម្តង ឲ្យតែទំនិញមានធាតុផ្សំមួយផ្នែកតូចក្តី ផលិតនៅលីទុយអានី។ នៅក្នុងជម្លោះនេះ គេពិបាកសង្ឃឹមណាស់ ថាលីទុយអានី អាចនឹងបន្តរឹង ចចេសជាមួយចិន ចង់ភ្ជាប់ទំនាក់ទំនងជាមួយតៃវ៉ាន់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ