ប្រមុខការទូតក្នុង ៤ប្រទេសនៅតំបន់ឈូងសមុទ្រពែក្សទៅបំពេញទស្សនកិច្ចនៅចិន
នៅថ្ងៃចន្ទ ទី១០ មករា រដ្ឋមន្រ្តីការបរទេសពី ៤ប្រទេសនៃក្រុមប្រឹក្សាកិច្ចសហប្រតិបត្តិការឈូងសមុទ្រពែក្សផ្តើមទស្សនកិច្ចរយៈពេល ៥ថ្ងៃនៅក្នុងប្រទេសចិន។ ប្រទេសអារ៉ាប់ទាំង ៤ គឺអារ៉ាប៊ីសាអូឌីត កូវ៉ែត អូម៉ង់ និងបារ៉ែន។ អ្វីជាការកត់សម្គាល់ ទស្សនកិច្ចរបស់ប្រមុខការទូតទាំង ៤ នៅឈូងសមុទ្រពែក្សនៅចិនធ្វើឡើង ខណៈដែលប្រេងកំពុងឡើងថ្ងៃ និងដែលចិនកំពុងត្រូវការប្រេងខ្លាំងសម្រាប់ចិញ្ចឹមបំប៉នកំណើនសេដ្ឋកិច្ចរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:២២
តាមសេចក្តីប្រកាសព័ត៌មានរបស់ក្រសួងការបរទេសចិន ដំណើរទស្សនកិច្ចរួមគ្នានៅចិនរយៈពេល ៥ថ្ងៃរបស់ប្រមុខការទូតនៃប្រទេសអារ៉ាប៊ីសាអូឌីត កូវ៉ែត អូម៉ង់ និងបារ៉ែនធ្វើឡើងតាមការអញ្ជើញរបស់ប្រមុខការទូតចិនលោកវ៉ាង យី។ តែសេចក្តីប្រកាសព័ត៌មានដដែលមិនបានប្រាប់ពីកម្មវិធី និងកម្មវត្ថុនៃទស្សនកិច្ចនោះទេ។ ចំណែកកាសែតប្រចាំថ្ងៃចិនជាភាសាអង់គ្លេស Global Times បានអះអាងថា ទស្សនកិច្ចអាចផ្តោតលើការផ្តល់សន្ទុះនៃកិច្ចចរចាស្តីពីកិច្ចព្រមព្រៀងដោះដូរសេរីរវាងចិន និងក្រុមប្រឹក្សាកិច្ចសហប្រតិបត្តិការឈូងសមុទ្រពែក្ស។
ក្នុងរយៈពេលប៉ុន្មានឆ្នាំចុងក្រោយនេះ ចិនបានព្យាយាមពង្រឹងទំនាក់ទំនងជាមួយក្រុមប្រទេសនៅតំបន់ឈូងសមុទ្រពែក្ស។ ក្នុងឆ្នាំ ២០១៤ ប្រធានាធិបតីចិនលោកស៊ី ជីនពីងបានសន្យាបង្កើនការដោះដូរពាណិជ្ជកម្មទ្វេដងជាមួយតំបន់ពីពេលនេះទៅឆ្នាំ ២០២៣។ មានការកត់សម្គាល់ចំនួនពីរនៃដំណើរទស្សនកិច្ចនៅចិនរបស់ប្រមុខការទូតទាំង ៤ប្រទេសនៅតំបន់ឈូងសមុទ្រពែក្ស ទី១ នៅក្នុងបរិបទនៃការឡើងថ្លៃប្រេង និងទី២ នៅក្នុងពេលដែលប្រទេសកាហ្សាក់ស្ថានកំពុងស្គាល់ភាពបះបោរសង្គមដែលអាចធ្វើឲ្យមានភាពរអាក់រអួលក្នុងការបូមប្រេង។
ក្នុងនាមជាប្រទេសសមាជិកនៃក្រុមប្រទេសផលិតប្រេង Opep+ កាហ្សាក់ស្ថានជាប្រទេសផលិតប្រេងធំជាងគេនៅអាស៊ីកណ្តាលដោយមានបរិមាណស្តុកលំដាប់ទី១២ ក្នុងលោក។ ក្នុងឆ្នាំ ២០២០ កាហ្សាក់ស្ថានបានផលិតប្រេងប្រមាណ ១លាន ៨សែនធុងបារីលក្នុងមួយថ្ងៃ។ ចំណែកចិនជាប្រទេសនាំចូលប្រេងឆៅទី១ ក្នុងលោក ហើយតាំងពីសេដ្ឋកិច្ចសកលផ្តើមមានសន្ទុះឡើងវិញមក តម្លៃថាមពលគ្រប់ប្រភេទ ពិសេសប្រេង និងឧស្ម័នបានឡើងថ្លៃខ្លាំងនារយៈពេលប៉ុន្មានខែចុងក្រោយនេះ។
តាមគំនិតផ្តួចផ្តើមរបស់អាមេរិកដើម្បីទម្លាក់តម្លៃប្រេងនៅលើទីផ្សារអន្តរជាតិ ចិនបានប្រកាសក្នុងខែវិច្ឆិកា ឆ្នាំ ២០២១ កន្លងទៅពីការប្រើប្រេងបម្រុងរបស់ខ្លួន។ តែប្រេងបម្រុងមានបរិមាណកំណត់ដែលចិនមិនអាចបន្តប្រើរហូតបានទេ។ ដូច្នេះ ប្រេងអាចជាប្រធានបទសំខាន់មិនអាចខ្វះបាននៃដំណើរទស្សនកិច្ចនៅចិនរបស់ប្រមុខការទូតទាំង ៤ប្រទេសនៅតំបន់ឈូងសមុទ្រពែក្សពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ