ថៃកំពុងប្រឈមនឹងការបំពុលបរិស្ថានសមុទ្រ ក្រោយការលេចធ្លាយប្រេងបំពង់បង្ហូរប្រេងក្រោមសមុទ្រ
ថៃ កំពុងប្រមូលផ្តុំកម្លាំងគ្នានៅថ្ងៃចន្ទទី ៣១មករានេះ សម្អាតឈូងសមុទ្ទ ដែលរងការបំពុលបរិស្ថាន បន្ទាប់ពីមានករណីលេចធ្លាយចេញប្រេងប្រមាណ៦០តោន (៦០០០០លីត្រ) ពីបំពង់បង្ហូរប្រេងក្រោមសមុទ្ទ។ បំពង់បង្ហូរប្រេងក្រោមសមុទ្ទរបស់ក្រុមហ៊ុន Star Petroleum Refining Public Company Limited (SPRC)បានលេចធ្លាយតាំងពីថ្ងៃទី ២៥មករា២០២២មក និងទើបជួសជុលបិទបានវិញ។
ចុះផ្សាយនៅថ្ងៃ៖
ស្តាប់ - ០១:៥៩
បើតាមរូបភាពផ្កាយរណបថតនៅថ្ងៃអាទិត្យទី ៣០មករា ការលេចធ្លាយប្រេងប្រមាណ៦ម៉ឺនលីត្រ បានបំពុលបរិស្ថានឈូងសមុទ្ទថៃ ក្នុងទំហំ ជាង៥០គីឡូម៉ែត្រការ៉េ។ ដោយសារមានខ្យល់បោកបក់ខ្លាំង ប្រេងអណ្តែតលើផ្ទៃសមុទ្ទ បានហូរមកដល់ឆ្នេរហើយ និងបន្តបំពុលឆ្នេរជាច្រើនកន្លែងជាបន្តបន្ទាប់ទៀត ក្នុងរយៈពេលប៉ុន្មានថ្ងៃខាងមុខនេះ។ កោះទេសចរណ៍ សាម៉េត ក៏កំពុងរងការគំរាមកំហែងខ្លាំង។
ជាផលវិបាក អ្នកនេសាទក្នុងតំបន់រងគ្រោះបរិស្ថានត្រូវផ្អាកសកម្មភាពយ៉ាងហោចមួយខែ ជាថ្នូរនឹងជំនួយឧបត្ថម្ភខ្លះមកវិញ។ សកម្មភាពទេសចរណ៍ដែលទើបចាប់កំរើក ត្រូវរងការរំខានជាថ្មី ដោយឆ្នេរត្រូវបិទ មានជាអាទិ៍ឆ្នេរម៉ែរ៉ាំភឺនមិនឱ្យមនុស្សម្នាមុជហែលលេង គឺមានតែក្រុមសម្អាតបរិស្ថាន និងនាវា១២គ្រឿង កំពុងសម្អាតផ្ទៃសមុទ្ទ ដោយបាញ់សារធាតុគីមី រាប់ពាន់លីត្រ។
សារធាតុគីមីនោះនឹងទៅបំបែកប្រេងដែលអណ្តែតលើទឹក ឱ្យក្លាយជាធាតុល្អិត រួចធ្លាក់ទៅក្នុងបាតសមុទ្ទ តែទៅចម្លងនិងបំពុលសត្វរុក្ខជាតិក្រោមសមុទ្ទ។ នេះបើតាមការអះអាងរបស់លោក ថាណុមស័ក ប៊ូនភ័ក្រដេ Thanomsak Boonphakdee សាស្ត្រាចារ្យនៅសាកលវិទ្យាល័យប៊ូរ៉ាផា ដោយបានរំលឹកបន្ថែមទៀតថា កាលពីឆ្នាំ២០១៣ មានករណីលេចធ្លាយប្រេងឆៅចំនួនជាង៥ម៉ឺនលីត្រម្តងដែរ ពីបំពង់បង្ហូរប្រេងដដែលនេះ។ ក្រោយគ្រោះថ្នាក់ សត្វរុក្ខជាតិក្នុងទឹក ត្រូវការពេលយ៉ាងហោច៥ឆ្នាំទម្រាំអាចវិលមករកភាពធម្មតាវិញបាន។ ក្តាម កូនត្រីនិងបង្គា រងគ្រោះខ្លាំងជាងគេពីការបំពុលបរិស្ថានធ្លាយប្រេងនេះ។
បើតាមអង្គការការពារបរិស្ថាន Greenpeace ដែលទាមទារឱ្យរដ្ឋាភិបាលបើកអង្កេតឯករាជ្យ បានថ្ងូចថ្ងូរថា តាំងពីឆ្នាំ១៩៧៤មកទល់សព្វថ្ងៃនេះ ថៃជួបគ្រោះលេចធ្លាយប្រេងតាមបំពង់បង្ហូរក្រោមសមុទ្ទ ចំនួន២៤០ដងហើយ។ ចំណែករដ្ឋមន្ត្រីក្រសួងធនធានធម្មជាតិនិងបរិស្ថានថៃ បានជំរុញក្រុមហ៊ុនប្រេងពង្រឹងវិធានការការពារ បង្កើនការត្រួតពិនិត្យនិងបង្កើនសកម្មភាពជួលជុលថែទាំបំពង់បង្ហូរប្រេងក្រោមសមុទ្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ