តៃវ៉ាន់ជាដែនដីជ្រកកោនសម្រាប់ប្រជាជនហុងកុងដែលភៀសខ្លួនគេចពីក្រញាំចិនដីគោក
នៅហុងកុង ៣ឆ្នាំក្រោយការចាប់ផ្តើមផ្ទុះបាតុកម្មដំបូង មានប្រជាជនហុងកុងជាច្រើនកំពុងបន្តចាកចេញពីអតីតដែនដីអាណានិគមនិយមអង់គ្លេសមួយនេះ។ ដែនដីតៃវ៉ាន់ដែលមានចម្ងាយ ៧០០គីឡូម៉ែត្រពីហុងកុងក៏ជាទីកន្លែងមួយសម្រាប់ការជ្រកកោនរបស់ប្រជាជនហុងកុងភៀសខ្លួនដែរ។ បើយោងតាមតួលេខផ្តល់ដោយរដ្ឋាភិបាលទីក្រុងតៃប៉ិក មានប្រជាជនហុងកុងភៀសខ្លួនជាង ១១ ០០០នាក់បានទទួលលិខិតស្នាក់នៅតៃវ៉ាន់កាលពីឆ្នាំ ២០២១។
ចុះផ្សាយនៅថ្ងៃ៖
ស្តាប់ - ០២:០៨
ពាក់មួកកន្ទិប និងមានបង់កន្សែង ក យុវជនហុងកុងម្នាក់អាយុ ២២ឆ្នាំបានប្រាប់ពីការភៀសខ្លួនចេញពីទឹកដីហុងកុងដោយបារម្ភពីការចាប់ខ្លួន។ សព្វថ្ងៃជានិស្សិតកំពុងសិក្សា រៀនសូត្រក្នុងទីក្រុងតៃប៉ិក យុវជនហុងកុងរូបនេះបានបញ្ជាក់ថា ជម្រើសភៀសខ្លួនទៅជ្រកកោននៅតៃវ៉ាន់ដោយសារតែតៃវ៉ាន់ជាទឹកដីប្រជាធិបតេយ្យមួយនៅអាស៊ី។ ចំណែកភាសាទៀតសោតក៏ស្រដៀងគ្នា ព្រោះប្រជាជនតៃវ៉ាន់ប្រើភាសាចិនបុរាណដូចប្រជាជនហុងកុងដែរ នេះជាការបន្ថែមរបស់យុវជនហុងកុងអាយុ ២២ឆ្នាំ។ បន្ទាប់មក យុវជនហុងកុងរូបនេះដដែលមិនភ្លេចបញ្ជាក់ពីមិត្តភាពដែលប្រជាជនតៃវ៉ាន់មានជាមួយប្រជាជនហុងកុង ពិសេសបានគាំទ្រប្រជាជនហុងកុងក្នុងពេលធ្វើបាតុកម្ម។
ចំណែកអ្នកថតរូបហុងកុងម្នាក់អាយុ ២២ឆ្នាំក៏បានទទួលស្គាល់ពីសាមគ្គីភាពរបស់តៃវ៉ាន់ចំពោះប្រជាជនហុងកុងដែរ។ តែបានលើកឡើងពីកង្វះវិធានការជាក់ស្តែងរបស់រដ្ឋាភិបាលក្រុងតៃប៉ិក។ « ខ្ញុំគិតថា រដ្ឋាភិបាលតៃវ៉ាន់ចង់ជួយប្រជាជនហុងកុង តែការពិតទៅ ច្បាប់តៃវ៉ាន់មិនបានចែងពីការទទួលប្រជាជនហុងកុងទេ » នេះជាការគូសបញ្ជាក់បន្ថែមរបស់អ្នកថតរូបហុងកុងដដែល។ អ្នកថតរូបហុងកុងរូបនេះបានលើកឧទាហរណ៍ថា ដើម្បីទទួលបានកាតស្នាក់នៅលើកោះតៃវ៉ាន់ គេត្រូវធ្វើការងាររយៈពេល ៥ឆ្នាំ និងត្រូវមានប្រាក់ខែ ២ដងច្រើនជាងប្រាក់ខែអប្បបរមានៅតៃវ៉ាន់។ « នេះពិតជារឿងពិបាកសម្រាប់យុវជនដែលទើបមានសញ្ញាប័ត្រ » នេះជាការបន្ថែមរបស់អ្នកថតរូបហុងកុងដដែល។
ប្រឈមនឹងឧបសគ្គទាំងនេះ មានយុវជនហុងកុងជាច្រើនកំពុងគិតគូររកច្រកចេញពីតៃវ៉ាន់។ តែខណៈនេះ ការវិលត្រឡប់ទៅកាន់ហុងកុងវិញជារឿងដែលមិនអាចទៅរួចសម្រាប់យុវជនហុងកុងភៀសខ្លួនភាគច្រើន។ « ពិតណាស់ ខ្ញុំចង់ត្រឡប់ចូលហុងកុងវិញ។ តែមិនអាចទៅរួចទេជាមួយនឹងច្បាប់សន្តិសុខជាតិ។ វាជារឿងហានិភ័យ ពោលមិនមែនជាជម្រើសផ្ទាល់ខ្លួនទេ » នេះជាការគូសបញ្ជាក់របស់អ្នកថតរូបហុងកុងអាយុ ២២ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ