តៃវ៉ាន់ដឹងគុណអាមេរិកដែលលក់គ្រឿងសព្វាវុធឲ្យខ្លួន ក្នុងតម្លៃ ១០០លានដុល្លារ
តៃវ៉ាន់និយាយអរគុណអាមេរិកដែលយល់ព្រមលក់គ្រឿងសព្វាវុធការពារដែនអាកាស និងការពារប្រឆាំងមីស៊ីល ឲ្យតៃវ៉ាន់។ នៅក្នុងសេចក្តីថ្លែងការណ៍ នៅថ្ងៃអង្គារទី ៨ កុម្ភៈ អ្នកនាំពាក្យប្រធានាធិបតីតៃវ៉ាន់បានអះអាងថា អាមេរិកសម្រេចគ្រឿងបរិក្ខាយោធា និងសេវា ក្នុងតម្លៃ ១០០លានដុល្លារ សម្រាប់ថែទាំ ធានាសមត្ថភាពរបស់ប្រព័ន្ធការពារដែនអាកាស និងប្រព័ន្ធខែលមីស៊ីលតៃវ៉ាន់ នៅចំពោះមុខការគំរាមកំហែង ឈ្លានពានរបស់យន្តហោះចម្បាំងចិន។
ចុះផ្សាយនៅថ្ងៃ៖
ស្តាប់ - ០២:១៣
នៅថ្ងៃអង្គារ វិមានប្រធានាធិបតីតៃវ៉ាន់ តាមរយៈ អ្នកនាំពាក្យ លោកXavier Chang បានសំដែងការដឹងគុណដល់អាមេរិក ដែលបាន យល់ព្រមលក់គ្រឿងបរិក្ខាយោធា និងសេវា តម្លៃ ១០០លានដុល្លារ សម្រាប់ការជួសជុលថែទាំប្រព័ន្ធមីស៊ីលការពារដែនអាកាស Patriotដែលតៃវ៉ាន់ធ្លាប់ទិញពីអាមេរិក។
នេះលើកទី២ ដែលអាមេរិក ក្រោមអាណត្តិដឹកនាំរបស់ចូ បៃដិនសម្រេច លក់គ្រឿងសព្វាវុធទៅតៃវ៉ាន់។ កាលពីខែ សីហាឆ្នាំមុន រដ្ឋបាលលោកចូ បៃដិនបានចុះកិច្ចព្រមព្រៀងលក់រថក្រោះចំនួន៤០គ្រឿងទៅឲ្យតៃវ៉ាន់។ សម្រាប់អ្នកនាំពាក្យវិមានប្រធានាធិបតីតៃវ៉ាន់ ការសម្រេចរដ្ឋបាលលោកចូ បៃដិនស បញ្ជាក់ឲ្យឃើញពីសម្ព័ន្ធភាពរឹងមាំដូចថ្ម រវាងអាមេរិកនិងតៃវ៉ាន់។
តាមគម្រោង តៃវ៉ាន់នឹងទទួលគ្រឿងសព្វាវុធពីអាមេរិកនៅអំឡុងខែមីនាខាងមុខ។ តាមទីភ្នាក់ងារសហប្រតិបត្តិការអាមេរិកផ្នែក ការពារនិងសន្តិសុខ កិច្ចព្រមព្រៀងតៃវ៉ាន់ អាមេរិក ផ្តោតទៅលើការគាំទ្រផ្នែកបច្ចេកទេស និងការជួសជុល ថែទាំ ដើម្បីធានាពង្រឹងសមត្ថភាពរបស់ប្រព័ន្ធការពារដែនអាកាស ប្រព័ន្ធប្រឆាំងមីស៊ីល នៅចំពោះមុខការគំរាមកំហែងនៅក្នុងតំបន់។
តៃវ៉ាន់ត្រូវការពង្រឹងប្រព័ន្ធការពារដែនអាកាសរបស់ខ្លួន ដើម្បីឆ្លើយតបនឹងការហោះរំលោភចូលឈ្លានពានរបស់យន្តហោះចម្បាំងចិន។
ប្រធានាធិបតី ចិន លោកស៊ី ជីនពីង ដែលប្រឆាំងដាច់ខាតនឹងការលក់គ្រឿងសព្វាវុធអាមេរិកទៅឲ្យតៃវ៉ាន់ និងធ្លាប់គំរាមយកតៃវ៉ាន់ មកគ្រប់គ្រងវិញ ទោះបីត្រូវប្រើកម្លាំងយោធា បានបង្កើនការដាក់សម្ពាធកាន់តែខ្លាំងទៅលើតៃវ៉ាន់ ទាំងផ្លូវការទូត យោធា និងសេដ្ឋកិច្ច។ នៅក្នុងមួយឆ្នាំ ២០២១ ចិនបានបញ្ជូនយន្តហោះចម្បាំង៩៦៩គ្រឿង ឲ្យទៅហោះរំលោភចូលក្នុងតំបន់ការពារដែនអាកាសរបស់តៃវ៉ាន់។ វាជាចំនួនដ៏ច្រើនទ្វេដង បើប្រៀបធៀបនឹងឆ្នាំ ២០២០ ដែលគេរាប់ឃើញមានយន្តហោះចម្បាំងចិន តែ៣៨០គ្រឿងប៉ុណ្ណោះ ក្នុងរយៈពេល១ឆ្នាំ។
គួររំលឹកថា ប្រព័ន្ធការពារដែនអាកាស Patriot ដែលតៃវ៉ាន់បានទិញ ពីអាមេរិកសម្រាប់បំពាក់ឲ្យកងទ័ពជើងអាកាសតៃវ៉ាន់ គឺជាប្រភេទមីស៊ីលបាញ់ចេញពីដី ដែលមានសមត្ថភាព ចាប់សញ្ញា និងបាញ់ទម្លាក់យន្តហោះចម្បាំង។
តៃវ៉ាន់ ក្រោមការដឹកនាំរបស់លោកស្រីប្រធានាធិបតី ត្សៃ អ៊ីងវេន បានចុះកិច្ចសន្យាទិញសព្វាវុធអាមេរិក ក្នុងទឹកប្រាក់រាប់ពាន់លានដុល្លារ ជាពិសេសក្នុងអាណត្តិរបស់លោកដូណាល់ ត្រាំ ដែលបានបើកភ្លើងខៀវឲ្យលក់យន្តហោះដ្រូន ប្រព័ន្ធមីស៊ីល និងយន្តហោះចម្បាំងទំនើបទៅឲ្យតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ