រដ្ឋមន្រ្តីការបរទេសអាមេរិកបំពេញទស្សនកិច្ចជុំវិញតំបន់អាស៊ីប៉ាស៊ីហ្វិក ដើម្បីខ្ទប់ឥទ្ធិពលចិន
ក្នុងខណៈដែលវិបត្តិអ៊ុយក្រែននៅតែកំពុងតានតឹងខ្លាំង លោកប្រមុខការទូតអាមេរិក ប្លីងកិន កំពុងបំពេញទស្សនកិច្ចនៅក្នុងប្រទេសអូស្ត្រាលី ពីថ្ងៃពុធទី៩កុម្ភៈ រហូតដល់ថ្ងៃសៅរ៍ទី១២កុម្ភៈ។ បន្ទាប់ពីអូស្ត្រាលី លោក ប្លីងកិន ត្រូវបន្តដំណើរទៅប្រទេសហ្វីជី និងកោះហាវៃរបស់អាមេរិកផ្ទាល់ទៀត។ ជាទស្សនកិច្ចដែលមានកម្មវត្ថុបីធំៗ ដូចជាពង្រឹងភាពជាដៃគូរបស់អាមេរិកក្នុងតំបន់អាស៊ីប៉ាស៊ីហ្វិក ដើម្បីប្រឈមនឹងចិន អាកាសធាតុនិងសំណុំរឿងកូរ៉េខាងជើង តែក្នុងទិសដៅតែមួយគឺប្រឈមនឹងចិន។
ចុះផ្សាយនៅថ្ងៃ៖
ស្តាប់ - ០១:៥៨
នៅអូស្ត្រាលី ដែលបានក្លាយជាប្រទេសយុទ្ធសាស្ត្រក្នុងតំបន់អាស៊ីប៉ាស៊ីហ្វិក លោកប្រមុខការទូតអាមេរិក ត្រូវជួបពិភាក្សាជាមួយអ្នកទទួលខុសត្រូវអូស្ត្រាលីជាច្រើន និងជាពិសេសជាមួយលោក ស្កត់ម៉ារីសុន នាយករដ្ឋមន្ត្រីអូស្ត្រាលីទៀត ដើម្បីពង្រឹងសម្ព័ន្ធភាពយោធា ត្រីភាគី។ សម្ព័ន្ធត្រីភាគី Aukus (អូស្ត្រាលី អាមេរិកនិងអង់គ្លេស) ប្រឈមនឹងចិន ទើបត្រូវបានប្រទេសទាំងបីបានចុះហត្ថលេខាបង្កើតកាលពីថ្ងៃទី ១៥ កញ្ញា២០២១។
ពីក្រុងមែលប៊ន ប្រទេសអូស្ត្រាលីដដែលនេះ លោកប្លីងកិន ត្រូវដឹកនាំជំនួបប្រជុំថ្នាក់រដ្ឋមន្ត្រីការបរទេស ចតុប្រទេស Quad ដែលជាក្រុមសម្ព័ន្ធអាមេរិក-អូស្ត្រាលី-ឥណ្ឌា-ជប៉ុន ដើម្បីជជែកអំពីការដឹកជញ្ជូនថ្នាំវ៉ាក់សាំងប្រឆាំងកូវីដ ជំនួយមនុស្សធម៌បន្ទាន់ សន្តិសុខអ៊ីនធ័រនែតនិងសន្តិសុខផ្លូវទឹក។ វ៉ាស៊ីនតោនចង់បង្ហាញជាពិសេសឱ្យឃើញអំពីសម្ព័ន្ធភាពចតុភាគីដ៏ខ្លាំងក្លាប្រឆាំងនឹងមហិច្ឆតាចង់គ្រប់គ្រងតំបន់របស់ចិន។
ដំណាក់កាលបន្ទាប់មកទៀត លោកប្រមុខការទូតអាមេរិកនឹងបន្តដំណើរទៅកាន់ប្រទេសហ្វីជី ដើម្បីជួបសន្ទនាជាមួយបណ្តាមេដឹកនាំប្រទេសកូនកោះជាច្រើនក្នុងមហាសមុទ្ទប៉ាស៊ីហ្វិក ដែលរងការគំរាមកំហែងលិចទឹក បង្កឡើងដោយឡើងកម្ពស់ទឹកសមុទ្ទ។ ថ្វីបើអាកាសធាតុជាប្រធានបទសំខាន់នៃទស្សនកិច្ចនៅកោះហ្វីជីមែន ប៉ុន្តែកម្មវត្ថុចម្បងនៅតែមួយដដែល គឺអាមេរិកចង់កាងការពារសេរីភាពនៃតំបន់ឥណ្ឌូប៉ាស៊ីហ្វិក ពីចិនដែលចែចង់ក្រុមប្រទេសកូនកោះខ្លាំងណាស់។ លោក ប្លីងកិន ជារដ្ឋមន្ត្រីការបរទេសអាមេរិកដំបូងគេដែលអញ្ជើញទៅបំពេញទស្សនកិច្ចនៅកោះហ្វីជី គិតចាប់តាំងពីឆ្នាំ១៩៨៥មក។
ជាចុងក្រោយ លោកប្លីងកិន បានឆៀងចូលកោះហាវ៉ៃ ដើម្បីទទួលជួបសមភាគីជប៉ុននិងកូរ៉េខាងត្បូង។ ជាជំនួបដែលនឹងត្រូវពិភាក្សាអំពីសំណុំរឿងនុយក្លេអ៊ែរកូរ៉េខាងជើង ព្រោះ នារយៈពេលប៉ុន្មានសប្តាហ៍ ចុងក្រោយនេះ ព្យុងយ៉ាងបានបង្កើនការបាញ់សាកល្បងមីស៊ីលបាលីស្ទិកជាច្រើនលើកច្រើនសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ